3
Ka pegkatalu ni Ug
(Num. 21:31-35)
1 “Ne nataman, migmambatiku kid peendiye te Basan. Ne miglihawang si Ug ne Hari te Basan duma te langun ne sundalu rin eyew egpakiggira kanta diye te Idrii.
2 Piru ingkahiyan a te Magbebaye, ‘Kene ka kaaldek kandin su igbehey ku sikandin keykew lagkes ka langun ne keet-etawan din wey ka intiru ne tane din. Himuwa nu diye te kandin ka inggimu nu ki Sihun, ka matig-Hisbun ne Hari te me Amurihanen.’
3 “Purisu imbehey kanta te Magbebaye ne Manama ta si Ug ne Hari te Basan lagkes ka langun ne sundalu rin. Ne warad iya insame ta minsan sabeka.
4 Ne impangahew ta ka hen‑em ne pulu (60) ne me lungsud ni Ug diye te intiru ne inged te Argub ne sakup te migharian din ne iyan ka Basan.
5 Ka seini langun ne me lungsud, inlingutan te me matikang wey makepal ne alad ne batu, wey me putew ka me pagul te me gumawan kayi. Ne nenaahew ta degma ka langun ne me lungsud ne nakalingut kayi ne ware me alad.
6 Ne impanlundus ta patamtamani ka me lungsud ni Ug iling te inggimu ta te me lungsud ni Sihun, wey impangimatayan ta ka langun ne etew, wey warad iya insame ta minsan sabeka.
7 Ne impanuyuk ta ka langun ne ayam wey impanguyan ta ka langun ne karatuan ne naahew ta puun te me lungsud dan.
8 “Purisu nenaahew ta puun te daruwa ne Hari ne me Amurihanen ka tane ne diye te talipag te Weyig ne Hurdan puun te Weyig ne Arnun taman te Bubungan ne Hirmun.
9 (Ka Bubungan ne Hirmun, Siryun ka igngengaran te me matig-Sidun, wey Sinir ka igngengaran kayi te me Amurihanen.)
10 Nenaahew ta ka langun ne siyudad diye te me napu ne diye te igkakawanan ne balabahan, lagkes ka intiru ne Gilyad taman te Salika wey Idrii; me siyudad ne sakup te migharian ni Ug ne iyan ka Basan.”
11 (Si Ug naan de ka nasame ne kabuhalan te me Ripaimhanen. Putew ka lungun din ne hep‑at ne mitrus ka kalayat, wey daruwa ne mitrus ka kaluag, ne inseked te saamulan ne sekeranan. Ne diye pad iya kuntee seini te Raba ne siyudad te me Amunihanen.)
Ka me tribu diye te talipag te Hurdan
(Num. 32:1-42)
12 Ne ingkahiyan e man‑e ni Muwisis ka me kabuhalan ni Israil, “Te nenaahew tad seini ne tane, imbehey ku te me kabuhalan ni Rubin wey ni Gad ka me inged ne diye te igkahibang ne balabahan te Aruwir ne diye te marani te Weyig ne Arnun lagkes ka katenge te inged te Gilyad wey ka me lungsud.
13 Ne imbehey ku te katenge te kabuhalan ni Husi ne iyan ka me kabuhalan ni Manasis ka duma ne baad te inged te Gilyad wey ka intiru ne Basan ne iyan ka migharian ni Ug.”
(Neilaan dengan ka Basan ne inged te Ripaimhanen.
14 Ne si Hair ne kabuhalan ni Manasis, iyan nakaangken te intiru ne inged te Argub ne sakup te Basan, taman te eletanan te Gisur wey Maaka. Ne ka me bariyu kayi ingngaranan din te “Me bariyu ni Hair” taman kuntee ne me timpu.)
15 “Ne imbehey ku ka Gilyad diye te me kabuhalan ni Makir ne anak ni Manasis
16 wey imbehey ku te me tribu ni Rubin wey ni Gad ka tane puun te Gilyad taman te Weyig ne Arnun. Ne iyan eletanan diye te igkakawanan ne balabahan ka Weyig ne Arnun wey iyan eletanan diye te igkahibang ne balabahan ka Weyig ne Habuk ne eletanan degma te me Amunihanen.
17 “Ka eletanan te inged te tatelu ne tribu dapit te iglineb, iyan ka Weyig ne Hurdan, wey puun man‑e te Galiliya taman diye te Namatey ne Dahat, marani te kalandihan te Bubungan ne Pisga.
18 “Te seeye ne timpu, ingkahiyan ku ka me kabuhalan ni Rubin, ni Gad, wey ka katenge te kabuhalan ni Husi ne iyan ka me kabuhalan ni Manasis, ‘Imbehey e kaniyu te Magbebaye ne Manama niyu ka seini ne tane ne talipag te Weyig ne Hurdan dapit te igsile, lagkes ka me lungsud kayi. Piru keilangan ne egmanlapas te Hurdan ka langun ne sundalu niyu eyew egbulig te duma niyu ne me kabuhalan ni Israil te peg-angken te tane dan.
19 Ne ka me asawa wey anak niyu, duma te me ayam niyu, egkaayun ne egpalunggaat de kayi te me lungsud ne imbehey ku kaniyu su nakanengneng a ne masulug ka me ayam niyu.
20 Keilangan ne egbulihan niyu ka me karumaan niyu ne me kabuhalan ni Israil te pegtalu te me kuntere dan eyew egkaangken dan e degma ka tane ne diye te talipag te Hurdan dapit te iglineb ne igbehey kandan te Magbebaye ne Manama niyu. Ne egkaayun e ne eglibed kew te tane ne imbehey kaniyu.’
21 “Te seeye ne timpu, ingkahiyan ku si Huswi, ‘Nakita nu ka langun ne inggimu te Magbebaye te daruwa ne Hari ne si Sihun wey si Ug. Ne iling degma due ka eggimuwen din diye te langun ne migharian ne egmangendiyaan niyu.
22 Ne kene kew kaaldek kandan, su iyan egpakiggira kandan ka Magbebaye ne Manama niyu.’ ”
Ware tuhuti si Muwisis ne egpekeendiye te Kanaan
23 “Purisu te seeye ne timpu, migpangananey a te Magbebaye te migkahi,
24 ‘He Magbebaye, impapitew nud kuntee te suluhuanen nu ka karesen nu, su warad lein ne manama due te langit wey kayi te tane ne egpekeyimu te kein-inuwan ne inggimu nu.
25 Purisu ke egkaayun ubag ne tuhuti a ubag nikeykew ne eglapas te Hurdan eyew egpakakite e pad ubag te meupiya ne tane diye te talipag te Hurdan, wey te me mateles ne bubungan wey te Libanun.’
26 “Piru nabelu keddi ka Magbebaye tenged kaniyu wey wara a nikandin pammineha. Ingkahiyan e re iya nikandin te, ‘Eleg e! Kena ad e lalahi nikeykew meyitenged due.
27 Takereg ka diye te puntul te Bubungan ne Pisga wey pamantew ka minsan hendei, piru kene ka lapas te Hurdan.
28 Si Huswi ka egpangulu te me kabuhalan ni Israil te peglapas te Hurdan eyew te peg-angken te tane ne egkakita nu. Purisu pepakannekala nu sikandin wey panulua nu te keilangan ne eggimuwen din.’
29 “Purisu migpalunggaat ki re diye te napu ne egkatalipag te lungsud te Bit-Piyur.”