4
Ka pegbagget ni Muwisis te me kabuhalan ni Israil te pegtuman te suhu
1 Ne ingkahiyan ni Muwisis ka me kabuhalan ni Israil, “Tumana niyu ka langun ne balaud wey me suhu ne impanulu ku kaniyu, eyew egpekeendiye kew wey egpekeugpe te inged te Kanaan; ka inged ne insaad te Magbebaye ne Manama te me kaap-apuan ta.
2 Kene niyud timuli te minsan nekey wey ke eg-awaan niyu naa ka suhu te Magbebaye ne Manama ta. Keilangan ne egtumanen niyu iya seini.
3 Nakita niyu mismu ka inggimu te Magbebaye diye te Bubungan ne Piyur. Impangimatayan din ka langun ne migsimba ki Baal.
4 Piru sikaniyu mule se migmatinumanen te Magbebaye ne Manama niyu, neuyag kew pad mule taman kuntee.
5 “Impanulu kud kaniyu ka me balaud wey me suhu ne imbehey keddi te Magbebaye ne Manama ku ne insimba ku, eyew egtumanen niyu seini diye te tane ne eggendiyaan wey eg-angkenen niyu.
6 Tumana niyu seini te mapahetpet su pinaahi kayi, igpakapapitew niyu diye te duma ne nasud ka katagseb wey salabutan niyu. Ke egpakarineg sikandan te seini ne me balaud, egkahi sikandan, ‘Malehet iya ne me matagseb wey me masinabuten ka keet-etawan te seini se maresen ne nasud.’
7 Warad lein ne nasud, deisek ma wey se dakel ne due manama ne iling te Magbebaye ne Manama ta, su alistu sikandin ne egbulig kanta, wey egtabaken ki iya nikandin ke egpangananey ki kandin.
8 Warad iya lein ne mabantug ne nasud ne due me balaud wey me suhu ne iling te impanulu ku kaniyu kuntee.
9 “Bantayi niyu re ne kene niyu egkalingawan ka langun ne nenakita niyu ne inggimu te Manama ta. Tantanuri niyu layun seini taman te duem pad umul niyu.
10 Tantanuri niyu ka timpu ne migmanasindeg kew diye te tangkaan te Magbebaye niyu diye te Sinay ne ingkahiyan kew te, ‘Palibulunga nu ka me kabuhalan ni Israil kayi te tangkaan ku su egkeupian a ne egpakiglalag kandan, eyew egkateu sikandan ne egtahud keddi taman te duen pad umul ran, wey eyew igpakapanulu dan degma te me anak dan.’
11 “Ne migparani wey migmanasindeg kew diye te pabunsuranan te Bubungan ne Sinay taheed te nabukusan seini te makepal ne gapun wey migkanlabkanlab ne hendue te nekeuma ka legleg diye te langit.
12 Ne migpakiglalag kaniyu ka Magbebaye puun te taliware te hapuy. Nakarineg kew te laheng piru ware etew ne nakita niyu.
13 Ne ingguhuran kew e nikandin te kasabutan din kaniyu wey insuhu kew nikandin te pegtuman kayi. Iyan sika ka Sapulu ne Balaud ne ingkulit din diye te daruwa ne malumpayag ne batu.
14 Te seeye ne timpu, insuhu a te Magbebaye ne egpanuluen ku sikaniyu meyitenged te me balaud wey me suhu ne egtumanen niyu diye te tane ne eg-angkenen niyu.”
Ka me pegpaney-paney meyitenged te diyus-diyus
15 Ne ingkahiyan ni Muwisis ka me kabuhalan ni Israil, “Te timpu ne migpakiglalag kaniyu ka Magbebaye puun te taliware te hapuy diye te Bubungan ne Sinay, ware niyu sikandin nakita. Purisu bantey kew
16 ne kene kew egpakasupak kandin pinaahi te pegpangimu te larawan te minsan nekey ne ulaula—lukes ma wey se malitan,
17 mananap ma ne eggipanew wey se eglayang,
18 mananap ma ne egdul‑ug wey se eg-anuy.
19 Ne kene niyu simbaa ka aldew, ka bulan, wey ka me bituen, su immangimu re sika te Magbebaye ne Manama niyu para te langun ne etew te intiru ne kalibutan.
20 Piru impalihawang kew te Magbebaye puun te Ihiptu, ka inged ne migbayad-bayad kaniyu iling te iiniti ne sugnu, eyew egkeyimu kew ne keet-etawan din ne sikaniyud iya kuntee.
21 Piru nabelu keddi ka Magbebaye tenged kaniyu, wey migpahunlibet sikandin ne kena a egpakalapas te Hurdan wey kena a egpekeendiye te meupiya ne tane ne igbehey rin kaniyu,
22 su kayi e re egpatey te inged te Muwab—kena a egkaayun ne eglapas te Hurdan—piru sikaniyu, egkaayun kew mule ne eglapas eyew te peg-angken te meupiya ne tane.
23 Piru keilangan ne kene niyu eglingawan ka kasabutan niyu te Magbebaye ne Manama niyu. Kene kew supak pinaahi te pegpangimu te minsan nekey ne larawan, su ingkene sika kaniyu te Magbebaye niyu,
24 su egkabelu ka Magbebaye ke egsimba kew te lein ne me manama, wey egpekeiling sikandin te hapuy ne egpakasilab te minsan nekey.
25 “Ne emun ke egkaluhey kew e ka eg-ugpe diye te inged te Kanaan, wey duen e me anak niyu wey eg-apuanan kew e, kene kew supak pinaahi te pegpangimu te minsan nekey ne larawan, su mareet iya sika diye te tangkaan te Magbebaye ne Manama niyu, wey egpakapabelu sika kandin.
26 Kuntee ne aldew, egdawiten ku ka langit wey ka tane eyew egpamalehet te mareet meyitenged kaniyu, ne emun ke egmangimu kew te me diyus-diyus, sahuhune ne egkengaawe kew puun te tane ne eg-angkenen niyu diye te talipag te Hurdan. Kene kew kaluhey diye su egkammatey kew iya langun.
27 Ne egmegsusuwayen kew te Magbebaye diye te duma ne me nasud wey pila-pila naan de kaniyu ka egkeuyag.
28 Ne diye, egsimba kew e te me diyus-diyus ne inggimu re te etew puun te kayu wey batu ne kene egpakakita, kene egpakarineg, kene egpakakeen wey ke egpakaarek naa.
29-30 Taheed te diye kew wey egpakasalerep kew te langun ne keyirapan, ke egpakasuman-suman kew e ne eglibed te Magbebaye ne Manama niyu, wey egtumanen niyud sikandin, wey emun ke eg-ampu kew e te mapahetpet, egtabaken kew nikandin,
31 su hiimenawen ka Manama niyu. Kene kew nikandin eg-engkeran wey ke egdereetan naa. Kene din egkalingawan ka kasabutan din te me kaap-apuan niyu ne impamalehetan din pinaahi te me pahunlibet.
32 “Pitawa niyu ka neneyitabu puun te aldew ne inggimu te Manama ka etew kayi te kalibutan taman kuntee. Ne pitawa niyu ka intiru ne kalibutan ke duen naa kein-inuwan ne neyitabu wey ke nahuhud naa ne iling due.
33 Duen naa duma ne me etew ne nakarineg te laheng te Manama puun te hapuy ne ware migpatey?
34 Duen naa duma ne manama ne miggeram migkuwa te keet-etawan puun te lein ne nasud eyew egkakandin pinaahi te me peg-eleg-eleg, me palinneu, me kein-inuwan, gubut, keseg, geem, wey makaliyas-liyas ne me himu iling te inggimu te Magbebaye ne Manama niyu para kaniyu diye te Ihiptu wey sikaniyu mismu ka nakakita kayi.
35 Impapitew sika kaniyu te Manama, eyew te pegpamalehet kaniyu ne sikandin de iya ka Manama wey warad lein.
36 Imparineg kew nikandin te laheng din puun te langit eyew te pegpanulu kaniyu. Ne impapitew rin kaniyu kayi te kalibutan ka egkanlabkanlab ne hapuy rin, wey egkarineg niyu ka laheng din puun te taliware te sika ne hapuy.
37 Ne tenged te inggeyinawaan din ka me kaap-apuan niyu, in-alam kew nikandin se me kabuhalan dan, wey impalihawang kew nikandin puun te Ihiptu pinaahi te dakel ne geem din.
38 Immandeldel rin ka susuluhi ne punduk te keet-etawan ne maddesen pad kaniyu eyew egpakaseled kew diye te tane dan eyew igpakabehey rin e kaniyu isip egkapanunud niyu.
39 Purisu kuntee, sumsumana niyu ne ka Manama re iya ka Manama te langit wey kalibutan wey warad lein.
40 Purisu tumana niyu ka langun ne balaud din ne ingkahi ku kaniyu kuntee, eyew egmeupiya ka peg-ugpe niyu wey te me kabuhalan niyu, wey eyew egpekeugpe kew te egkaluhey diye te tane ne igbehey kaniyu te Magbebaye ne Manama niyu wey egkaangken niyu seini te ware egtamanan.”
Ka me aputanan ne siyudad
41 Te nekeimpus e si Muwisis ka migpakiglalag te me kabuhalan ni Israil, in-alam din e ka tatelu ne siyudad diye te talipag te Hurdan dapit te igsile,
42 eyew eggimuwen ne aputanan te etew ne egpakapatey te senge-etew ne ware tuyui, wey kene ne kuntere din. Egkaayun sikandin ne eg-aput te minsan hendei te seini ne me aputanan ne siyudad eyew kene sikandin egkamenu.
43 Ne seini ka me siyudad: ka Bisir ne diye te ampew te bubungan ne mapatag, para te me sakup te me kabuhalan ni Rubin, ka Ramut te inged te Gilyad para te me sakup te me kabuhalan ni Gad, wey ka Gulan te inged te Basan, para te me sakup te me kabuhalan ni Manasis.
Ka pegbehey te balaud
44 Ne seini ka me balaud te Manama ne ingkahi ni Muwisis te me kabuhalan ni Israil.
45-46 Te seeye ne timpu, nakalihawang e ka me kabuhalan ni Israil puun te Ihiptu, wey diyad nangekampu te talipag te Hurdan dapit te igsile ne marani te lungsud te Bit-Piyur. Ne diye ibehey ni Muwisis kandan ka me balaud wey me suhu. Ka seeye ne ingkampuwan dan, inged dengan ni Sihun, ka matig-Hisbun ne Hari te me Amurihanen ne natalu ni Muwisis.
47 Naahew ni Muwisis wey te me kabuhalan ni Israil ka tane ni Sihun wey ka inged ni Ug, ka matig-Basan ne Hari te me Amurihanen. Sikandan ka daruwa ne Hari te me Amurihanen diye te talipag te Hurdan dapit te igsile.
48 Ka tane dan ne nenaahew te me kabuhalan ni Israil, nakapuun de iya te Aruwir ne dibdibabew te Weyig ne Arnun wey nakapabulus diye te Bubungan ne Siryun, ne ingngaranan degma te Hirmun,
49 lagkes ka intiru ne napu ne diye te talipag te Hurdan dapit te igsile, taman te Namatey ne Dahat ne diye te lenlen te Bubungan ne Pisga.