37
Ka napu ne neempet te me tul‑an
1 Ne in-umaan a te Panisingan te Manama wey in-uyan a diye te taliware te bangalug ne neempet te me tul‑an.
2 Ne impapitew rin keddi ka intiru ne bangalug ne neempet te me tul‑an ne me mammara naan de iya.
3 Ne mig-insaan a te Magbebaye, “Etew, egkeuyag bu pad ka seini ne me tul‑an?”
Ne migtabak a, “Magbebaye, sikeykew re ka nakanengneng due.”
4 Ne ingkahiyan a nikandin, “Lalahi nu seini ne me tul‑an te keilangan ne egpammineg sikandan te eglalahen ku.
5 Kahii nu sikandan te migkahi a se Magbebaye ne Manama, ‘Egpaheheyinaween ku sikaniyu, wey egkengeuyag kew e man‑e.
6 Egpangimuwan ku sikaniyu te sapu, me uhat, wey laplap. Ne egpakanengneng kew e ne sikeddi ka Magbebaye.’ ”
7 Purisu intuman ku ka insuhu keddi te Magbebaye. Ne taheed te eglalag e pad, due narineg ku ne masigehenikis. Nenekegsumpul e man‑e ka me tul‑an, wey nenateyul e man‑e ka intiru ne me lawa.
8 Te pegtengteng ku, nakita ku ne duen e man‑e me uhat, sapu, wey me laplap, piru kene pad egmanggeheyinawa.
9 Ne ingkahiyan ad e man‑e te Magbebaye, “Etew, kahii nu ka kalamag te migkahi a se Magbebaye ne Manama, ‘Pangalamag ka puun te hep‑at ne pikungan te kalibutan, hiyupi nu sika se me minatey eyew egkeuyag e man‑e sikandan.’ ”
10 Purisu inlalag ku ka ingkahi keddi te Magbebaye. Ne migmanggeheyinawe e man‑e ka me minatey. Ne migmanasindeg e sikandan ne susuluhi amana, iling kasulug te sabeka ne panungan ne me sundalu.
11 Ne ingkahiyan ad e man‑e te Magbebaye, “Etew, ka seini se me tul‑an, iyan igpasabut ka keet-etawan te Israil. Migkahi sikandan, ‘Nenaggangu e ka me tul‑an ney, wey warad e egkapallateng ney, nareetan key e natamtamani.’
12 Sikan naa, kahii nu sikandan te migkahi a se Magbebaye: Egpanlukatan ku ka me sabalanan niyu, wey egpanguyahen kud e sikaniyu se keet-etawan ku. Igmalibed kud e sikaniyu diye te tane te Israil.
13 Ne emun egpanlukatan kud e ka me sabalanan niyu wey eg-uyahen kud e sikaniyu, egpakanengneng kew e se keet-etawan ku ne sikeddi ka Magbebaye.
14 Ne igtahu ku due te kaniyu ka Panisingan ku, wey egkeuyag kew e. Ne igpeugpe ku sikaniyu diye te tane niyu mismu. Ne egpakanengneng kew e ne sikeddi ka Magbebaye ne Manama ne egtuman te eglalahen ku. Sikeddi se Magbebaye ka miglalag kayi.”
Ka pegkasabeka te Huda wey Israil
15 Ne impanengneng ad man‑e te Magbebaye,
16 “Etew, kuwa ka te daruwa ne kayu, sulati nu ka sabeka te seini ne lalag, ‘Ka migharian te Israil,’ wey ka dangeb, sulati nu degma te seini ne lalag, ‘Ka migharian te Huda.’
17 Ne pegtupua nu naa sika wey gen-geni nu due te tupuan eyew sabeka naan de ne egpitawen.
18 Ne emun ke eg-inse keykew ka keet-etawan, ‘Nekey‑a ka igpasabut due?’
19 Ne kahii nu sikandan te migkahi a se Magbebaye, ‘Egpegtupuen kud e ka daruwa ne kayu ne iyan igpasabut ka Israil wey Huda, eyew egkasabeke e sikandan.’
20 “Ne taheed te eggehen-genan nu ka insulatan nu ne kayu, ipapitew nu naa sika te me etew,
21 wey kahii nu sikandan te migkahi a se Magbebaye: Eglibulungen kud e ka me Israilita ne nenekegsuwey-suwey diye te nalein-lein ne me nasud, wey igmalibed kud e diye te kandan mismu ne tane.
22 Eggimuwen kud e sikandan ne sabeka ne nasud diye te inged te Israil, wey sabeka naan de ka eghari kandan su kene man e sikandan ne daruwa ne nasud. Ne kenad e degma egkabaad ka migharian dan.
23 Ne kene dan e eglinditan ka me pegkeetew ran pinaahi te pegsimba te me diyus-diyus, wey te minsan nekey ne mareet ne himu su egluwasen kud ma sikandan puun te me sale dan, wey egmalinis e sikandan. Egkeyimu e sikandan ne keet-etawan ku wey egkeyimu ad e ne Manama ran.
24 Ne iyan dan e Hari ka sabeka te me kabuhalan te suluhuanen ku ne si Dabid, sabeka re ka talagtameng dan. Ne egtumanen dan e ka me balaud ku wey me suhu ku.
25 Egmangugpe e sikandan duma te me kabuhalan dan diye te tane ne imbehey ku te suluhuanen ku ne si Hakub, ka tane ne in-ugpaan te me kabuybuyahan dan. Ne iyan dan e Hari te ware egtamanan ka kabuhalan te suluhuanen ku ne si Dabid.
26 Ne eggimu a te ware egtamanan ne kasabutan duma kandan ne egmeupiya ka keugpe dan. Egpeugpeen ku sikandan te tane dan wey egpamasuluhen ku sikandan. Ne egpasasindeg a te timplu ku diye te taliware dan te ware egtamanan.
27 Ne eg-ugpa ad e duma kandan. Egkeyimu ad e ne Manama ran, wey egkeyimu e sikandan ne keet-etawan ku.
28 Ne egpakanengneng e ka keet-etawan te me nasud ne sikeddi ka Magbebaye ne mig-alam te Israil ke igpasasindeg kud e ka timplu ku diye te taliware te me Israilita te ware egtamanan.”