Ka pegkatalu te langun ne egkuntere te Israil
38
(38:1–39:29)
Ka mareet ne pegpanagne meyitenged ki Gug
1 Ne impanengneng ad man‑e te Magbebaye ne Manama,
2 “Etew, tangke ka diye te tane te me matig-Magug wey panagne ka te mareet meyitenged ki Gug, ka labew ne pangulu te Misik wey Tubal.
3 Kahii nu sikandin te migkahi a se Magbebaye: Egpakigkuntera a keykew Gug, ka labew ne pangulu te Misik wey Tubal.
4 Egtabilengen ku sikeykew, wey egsanggaten ku te me bunuwit ka bake nu, wey egganuyen ku sikeykew duma te langun ne me sundalu nu. Ne ig-andam ku te pegpakiggira ka me kudde nu, wey ka me sundalu nu ne migmangudde, wey me sundalu nu ne nasangkap te me kalasag wey kampilan.
5 Egpakalagkes kandan ka nasangkap te me kalasag wey me hilmit ne me sundalu te Pirsya, Itiyupiya, wey Put.
6 Egpakalagkes degma kandan ka me sundalu te Gumir, wey Bit-Tugarma ne diye te igkahibang ne balabahan, lagkes ka langun ne me sundalu ran. Masulug ka nasud ne egpakalagkes keykew.
7 Layun ka pangandam, duma te langun ne sundalu nu, wey panguluwi nu sikandan te pegpakiggira.
8 Egginguma ka timpu ne egpalusuran ku keykew ka Israil. Te sika ne timpu, egkaay-ayaran e ka Israil ne nareetan te gira wey neyimu ne ware mahinged te naluhey ne timpu. Ne nenekeuli e degma ka me Israilita puun te nalein-lein ne me nasud, wey meupiye e ka peg-ugpe dan.
9 Sikeykew wey ka me sundalu nu duma te me nasud ne migpakigsabeka keykew, eglulusuran niyu ka Israil iling te bagyu, wey eglilingutan niyu wey egpekeiling kew e te gapun ne egpakabunbun kayi.”
10 Ne migpabulus-bulus ka Magbebaye ne migkahi, “Te seeye kangkuwa ne timpu, egplanu ka te mareet Gug
11 wey egkahi ka, ‘Egpanlusuran ku ka nasud ne ware me alad te me siyudad. Me siyudad ne ware me pagul, wey mig-ugpe ka me mahinged ne ware igkangilam ne karereetan.
12 Egpangahawen ku ka me karatuan dan, wey egpanlusuran ku ka me siyudad ne warad dengan mahinged ne impangugpaan e kuntee te me Israilita ne nenekeuli puun te nalein-lein ne me nasud. Masulug e ka me ayam dan wey dakel e ka me karatuan dan. In-ile e ka nasud dan ne amana ne impurtanti ne nasud te intiru ne kalibutan.’
13 Ne ka keet-etawan te Siyiba, Didan, wey ka me nigusyanti te Tarsis, egkekahi keykew, ‘Iyan nu naa inhengkayi ka egpanakew? Inlibulung nud naa ka me sundalu nu eyew te pegpangahew te me pelata, bulawan, me ayam, wey duma pad ne me karatuan ney?’
14 “Sikan naa etew, kahii nu si Gug te migkahi a se Magbebaye: Egkanengnengan nu seini ke egmangugpe e ne malinawen ka keet-etawan ku ne me Israilita.
15 Ne puun te mariyu ne inged nu diye te igkahibang ne balabahan, eglusuran nu ka me Israilita duma te susuluhi wey mannekal ne me sundalu nu ne egmangudde.
16 Eglusuran nu ka keet-etawan ku ne me Israilita wey iling ka te gapun ne egpakabunbun kandan. Egginguma iya ka timpu Gug ne egpalusuran ku keykew ka nasud ku. Ne tenged te sika ne eggimuwen ku pinaahi keykew, egpekeile e keddi ka keet-etawan te me nasud wey egkanengnengan dan e ka pegkamatulus ku.”
17 Ne migpabulus-bulus ka Magbebaye ne migkahi, “Sikeykew ka egkekahiyen dengan te me suluhuanen ku ne me prupita diye te Israil ne eglusud kandan.”
Ka peglegpad te Manama ki Gug
18 Ne migkahi ka Magbebaye, “Piru te timpu ne eglusuran nud e Gug ka Israil, egkalanglangetan ad e keykew. Sikeddi se Magbebaye ka miglalag kayi.
19 Tenged te mangune-kune ne langet ku, igpahunlibet ku ne te seeye kangkuwa ne timpu, eglilinug te manekal diye te tane te Israil.
20 Ne egpangelkelen te pegkaaldek keddi ka langun ne etew, lagkes ka me mananap iling te me isda, me manuk-manuk, wey langun ne klasi te mananap ne egdul‑ug wey egpananap te tane. Ne egkengallunew ka me bubungan, wey egkengatempag ka me matikang wey makepal ne alad ne batu.
21 Egpeyimatayan ku sikeykew Gug diye te me bubungan ku. Ne egpeyimmimatayey e degma ka me sundalu nu. Sikeddi se Magbebaye ka miglalag kayi.
22 Eglegparan ku sikeykew wey ka me sundalu nu lagkes ka me nasud ne migpakigsabeka keykew. Eglegparan ku sikaniyu pinaahi te dalu wey egmeun-unayey kew e egpeyimmimatayey. Ne egpeuranan ku sikaniyu te makeseg ne egkatapikan te apiyew ne egmekeiling kaddakel te me batu, wey te asupri ne egkalegleg.
23 Te seini ne paahi, igpakapapitew ku diye te me nasud ka pegkamaresen wey pegkamatulus ku. Ne egpakanengneng e sikandan ne sikeddi ka Magbebaye.”