32
Ka pegpeuyan ni Hakub te iggusey rin ki Isaw
1 Migpabulus si Hakub ka miggipanew wey insinug-ung sikandin te me panalihan te Manama.
2 Te pegkakita ni Hakub kandan, migkahi sikandin, “Seini ka me sundalu te Manama!” Purisu, migngaranan din ka inged te Mahanaim.
3 Ne due me suluhuanen ni Hakub ne impeendiye din ki Isaw ne kakey rin ne diye mig-ugpe te Siir, ka inged ne egngaranan degma te Idum.
4 Igpahuhud din kandan ki Isaw ka lalag din. Migkahi sikandin, “Kahii niyu ka kakey ku te sikeddiey si Hakub, ka suluhuanen din ne diye mig-uugpe ki Anggam Laban wey ware pad nekeuli taman kuntee.
5 Duen e me baka ku, me asnu, me karniru, me kambing, wey me uripen. Ne kahii niyu sikandin te insuhu ku iya sikaniyu diye te kandin eyew eghangyu ne perem meupiye e ka pegsahipe din keddi.”
6 Nataman, miglibed e ka me suluhuanen din ne migkahi, “Migkahiyan ney e ka kakey nu ne si Isaw wey eggendinid e sikandin ka egsinug-ung keykew. Due hep‑at ne gatus (400) ne duma rin ne me lukes.”
7 Te sikan de, naaldek amana si Hakub wey napanseb. Purisu, imbaad din te daruwa ne punduk ka me etew rin, me karniru, me kambing, me baka, wey me kamil din.
8 Su migsuman-suman sikandin ne emun ke egginguma si Isaw wey egdereetan din ka senge-punduk, egpakapallahuy pad degma ka senge-punduk.
9 Ne mig-ampu si Hakub, “Manama te apu ku ne si Abraham wey te amey ku ne si Isaak, Magbebaye ne Manama, migsuhu ka keddi, ‘Uli kad e diye te inged nu wey karumaan nu, wey egpanalanginan ku sikeykew.’
10 Kena a ne likes te langun ne geyinawa nu ne kene egkabalbalawan wey pegkamatinumanen ne impakita nud keddi te suluhuanen nu. Te pegligkat ku dengan diye te amey ku, miglapas a te Hurdan ne iyan ku re in-uyan ka tuked. Piru kuntee te eg-uli ad, nekeuyan ad te daruwa ne punduk.
11 Pangabangi a nikeykew puun te pegdereet keddi te kakey ku ne si Isaw. Egkaaldek a ke egginguma sikandin wey egpangimatayan key, minsan ka me malitan wey me bate.
12 Piru kene nu kalingawi ka insaad nu keddi ne egpanalanginan a nikeykew wey egpamasuluhen nu ka kabuhalan ku ne egpekeiling te lelanek diye te ilis te dahat ne kene egkaseel.”
13 Ne diye de mig-aran si Hakub te seeye ne karusileman. Mig-alam sikandin te me ayam ne iggusey rin te kakey rin ne si Isaw:
14 Daruwa ne gatus (200) ka beyan ne kambing wey daruwa ne pulu (20) ka lukesan ne kambing, daruwa ne gatus (200) ka beyan ne karniru wey daruwa ne pulu (20) ka lukesan ne karniru,
15 tatelu ne pulu (30) ka eggatasan ne kamil, lagkes e ka me nati, hep‑at ne pulu (40) ka beyan ne baka wey sapulu ka lukes ne baka, daruwa ne pulu (20) ka beyan ne asnu wey sapulu ka lukes ne asnu.
16 Ne impunduk-punduk ni Hakub ka me ayam wey due me suluhuanen din ne mig-uyan te tagse punduk. Migkahiyan din sikandan, “Hun‑a kew keddi, wey pari-diyuey kew ka tagse punduk ne egmasinsinunduley.”
17 Innangenan din ka egpekewun‑a, “Ke egkasinug-ung nud ka kakey ku ne si Isaw wey ke eg-inse sikandin, ‘Hendei ka egpabulus? Hentew ka ahalen nu? Hentew me ayam kayi?’
18 Tabaka nu sikandin, ‘Ayam seini ni Hakub ne suluhuanen nu wey iggusey rin seini keykew, wey egpakasinundul e sikandin kanami.’ ”
19 Iling ded ka insuhu din te igkarangeb, wey te igkatelu, wey te langun ne eg-uyan te me punduk te ayam, “Ke egkasinug-ung niyud si Isaw,
20 kahi kew iya, ‘Si Hakub ne suluhuanen nu ka egpakasinundul kanami.’ ” Su migsuman-suman si Hakub ne eggusayen din si Isaw te me ayam ne impewun‑a rin. Ne emun ke egpekeglambag e sikandan, kema ke egpasayluwen e sikandin ni Isaw.
21 Purisu impewun‑a rin e ka iggusey, wey migpalunggehaat pad si Hakub diye te mig-aranan din te seeye ne karusileman.
Ka pegpalehengey ni Hakub te etew diye te Piniil
22 Te seeye ne karusileman, mig-enew si Hakub wey induma rin ka daruwa ne asawa rin, ka daruwa man‑e ne asawa rin ne uripen, wey ka sapulu wey sabeka (11) ne anak din, wey impalapas sikandan te Habuk ne Weyig.
23 Te nakalapas e sikandan, impasinundul rin e ipalapas ka langun ne karatuan din,
24 wey sikandin naan de ka nahaat.
Ne due lukes ne miglepew ne migleheng kandin, wey napawaan sikandan ka migpaleglehengey.
25 Te nakasahimanu ka lukes ne kene din egkeelehan si Hakub, insuntuk din ka igtubu te bubun ni Hakub wey nekeg-isu e ka tinemuwan te bubun din.
26 Ne migkahi ka lukes, “Lekei ad nikeykew su egkapawe e.”
Piru migtabak si Hakub, “Wey ku re sikeykew eglekei ke egpanalanginan a nikeykew.”
27 Ne mig-inse ka lukes, “Nekey ka ngaran nu?” Migtabak sikandin, “Si Hakub.”
28 Ne migkahi ka lukes, “Kenad e ne Hakub ka ngaran nu, ke kene, si Israil e su migpakigsikdel ka te Manama wey te me etew, wey migpanalu ka.”
29 Ne mig-inse si Hakub, “Nekey degma ka ngaran nu?”
Piru migtabak sikandin, “Mania te eg-inse ka te ngaran ku?” Ne impanalanginan din si Hakub diye.
30 Purisu, migngaranan ni Hakub te Piniil ka seeye ne inged su migkahi sikandin, “Minsan nakita ku ka ulaula te Manama, piru mania te wara a migpatey?”
31 Te pegligkat ni Hakub diye te Piniil, migsile e ka aldew wey migpiang-piang e sikandin su nekeg-isu e ka tinemuwan te bubun din.
32 Purisu, minsan kuntee, kenad e egkeenen te me kabuhalan ni Israil ka sapu te me mananap ne diye te igtubu te bubun, su dutu sumbaha si Hakub.