33
Ka pegsinug-ung ni Isaw ki Hakub
1 Te egkilem pad, nakite e ni Hakub si Isaw wey ka hep‑at ne gatus (400) ne me lukes ne etew rin ne diye egpabulus te kandan. Purisu, imparuma rin ka me anak din te tagse iney ran ne ensi Liya, Rakil, wey ka daruwa ne asawa rin ne uripen.
2 Ne impewun‑a rin ka me asawa rin ne uripen duma te me anak dan, impasinundul rin si Liya duma te me anak din, wey mewuri si Rakil duma te anak din ne si Husi.
3 Ne miggun‑a si Hakub kandan wey miglangkeb-langkeb sikandin diye te tane te kapapitu taheed te migmarani e sikandin te kakey rin.
4 Piru migpallahuy si Isaw ka migdugpu kandin ne migkepkep wey miggarek kandin. Ne migpasinehawey e sikandan.
5 Te pegpitew ni Isaw, nakita rin ka me malitan wey ka me bate. Ne mig-inse sikandin, “Hentew‑a seini se me duma nu?”
Ne migtabak si Hakub, “Ahalen, me anak ku sikandan ne imbehey keddi te Manama puun te hid‑u rin.”
6 Ne migdugpu ka me asawa rin ne uripen wey ka me anak dan, wey miglangkeb isip pegtahud ki Isaw.
7 Ne migdugpu e degma kandin si Liya wey ka me anak din ne miglangkeb. Nataman, migdugpu e degma kandin si Rakil wey si Husi ne miglangkeb.
8 Mig-inse man‑e si Isaw, “Nekey‑a ka karuan te masalig ne ayam ne nekewun‑a kaniyu ganna?”
Ne migtabak si Hakub, “Igbehey ku seeye keykew eyew egkewusey kad.”
9 Piru migkahi si Isaw, “Hari, eleg e ka keddi. Kena ad behayi nikeykew.”
10 Ne migkahi si Hakub, “Kene, su ke meupiye e ka pegsahipe nu keddi, kua nu ka igbehey ku keykew. Nekeiling te pegpitew ku te ulaula te Manama te nakita ku ne mahalew-galew e ka ulaula nu.
11 Eghangyu a ne kua nu iya ka igbehey ku keykew, su impanalanginan a te Manama wey eleg e ka keddi.” Migpabulus si Hakub ka mighangyu ki Isaw taman te nabennalan e sikandin.
12 Ne migkahi si Isaw, “Kuwa kid e wey eggun‑a a keykew.”
13 Piru migtabak si Hakub, “Ahalen. Nakanengneng ka ne mahaan egkabeley ka me bate, wey due degma egtangguwen ku ne me ayam ne manggianak. Ke egpanlampesan ku seini se me ayam, minsan senge-kaaldew re, egkapatey sikandan langun.
14 Purisu ahalen, hun‑a-wun‑a ke re due kanami. Su egpahanad-ganad key re iling te keiyalan te me ayam wey me bate taman te egpekeuma key keykew diye te inged ne Idum.”
15 Ne migkahi si Isaw, “Ke sika, iyan ku re igparuma keykew ka duma te me etew ku.”
Piru migtabak si Hakub, “Kenad keilangan. Eleg e ka meupiya ne pegsahipe nu keddi.”
16 Sikan naa ka mig-uli e si Isaw diye te inged ne Idum te seeye ne aldew.
17 Piru miggendiye ensi Hakub te Sukut. Te pegginguma ran diye, migleleeb si Hakub wey migleleeban din degma ka me ayam din. Sikan naa ka migngaranan te Sukut ka seeye ne inged.
18 Ne nataman, miggingume e ensi Hakub diye te siyudad te Sikim diye te inged te Kanaan puun te Padan-aram ne ware neyitabu. Ne migpasasindeg sikandan te me balungbalung dan diye te lihawangan te siyudad.
19 Imbeli rin ka tane ne mig-ugpaan din diye te me anak ni Hamur ne amey ni Sikim. Mahatus (100) ne pelata ne mahal ka kentiddad.
20 Ne diye miggimu sikandin te altar ne eg-unturan te egtutungen, wey migngaranan din seeye te Il, ka Manama ni Israil.