54
Ka geyinawa te Manama te Hirusalim
1 Ne migkahi ka Magbebaye ne Manama,
“Ulahing ka, malitan ne kene egpakaanak.
Panguleyi ka wey ulahing ka te kahale Hirusalim ne warad iya nakaheram ne eg-anak.
Tenged su minsan in-engkeran ka te iglukes nu,
masmasulug pad keureme ka me anak nu du te malitan ne ware engkeri te iglukes din.
2 Hiluahi nu ka balungbalung ne eg-ugpaan nu,
wey belata nu ka atep eyew egmaluag seini.
Kene nu malepeta, mallayata nu ka me lubid
wey lig‑ena nu ka me pes-ek.
3 Ne tenged te eggiluahan nu ma seini diye te igkakawanan wey diye te igkahibang,
egdeldelen te keet-etawan nu ka keet-etawan te me nasud,
wey eglibed eg-ugpe sikandan diye te neneengkeran ne me siyudad.
4 “Kene ka kaaldek su kene ka iya egkeyilawan.
Egkalingawan nud en iya ka pegkeyilew nu puun te pegkabate nu,
wey ka me pegdakesel keykew puun te pegkabalu nu.
5 Su sikeddi se miggimu keykew, egpekeiling ad e te iglukes nu,
wey iyan ku ngaran ka Amana ne Maresen ne Magbebaye.
Sikeddi se Matulus ne Manama te Israil iyan ka Manluluwas nu,
wey ingngaranan a te ‘Manama te intiru ne kalibutan.’
6 “Iling ka te bate ne malitan ne miglungku
su mig-engkeran te asawa rin.
Piru eg-umawen ku sikeykew ne eglibed kayi te keddi.
7 In-engkeran ku sikeykew te malepet ne timpu
piru tenged te dakel ne hid‑u ku, egtugganulen ku red sikeykew.
8 Mig-inniyuhan ku sikeykew te malepet ne timpu,
tenged te subla ne langet ku.
Piru tenged te geyinawa ku ne kene egkataman,
igkeyid‑u ku red sikeykew.
Sikeddi se Magbebaye ne Manluluwas nu ka miglalag kayi.
9 “Para keddi, iling seini te timpu ni Nuwi
ne migsaad a ne kene kud e egpasipukan ka kalibutan.
Ne kuntee, egsaad a ne kena ad e egkabelu keykew
wey ke egdusaan ku naa sikeykew.
10 Ne egkaawe ka me bubungan
wey ka me labuntud,
piru kene iya egkaawe ka geyinawa ku keykew ne kene egkabalbalawan
wey ka kasabutan ku te keupianan.
Sikeddi se Magbebaye ne due keyid‑u ka miglalag kayi.”
Ka iyam ne Hirusalim
11 Migkahi ka Magbebaye ne Manama,
“He Hirusalim, mig-antus ka wey impatamtamanan te bagyu,
wey warad iya migliwang keykew.
Igpasasindeg ku red sikeykew ne iyan eggamiten ka meupiya ne batu
wey iyan pabunsuranan ka batu ne sapiru.
12 Ne igpasasindeg ku ka matikang ne baley nu
ne iyan eggamiten ka batu ne rubi.
Ne batu ne biril ka eggamiten ku para te gumawan nu
wey ka duma pad ne mahal ne batu para te alabat.
13 “Ne egpanuluen ku ka langun ne keet-etawan nu,
wey egmatubung iya sikandan.
14 “Egpakalig‑en keykew ka katareng,
wey egpakapariyu keykew te egdeeg-deeg.
Purisu warad igkaaldek nu,
wey egpakapariyu ka te egpakaliyas.
15 “Kene egpuun keddi ka eglusud keykew.
Egkareetan ka minsan hentew ne eglusud keykew.
16 “Pammineg ka! Sikeddi ka miggimu te me mannayab
ne talaggiyup te me baha wey talagsayab te panganiban.
Sikeddi degma ka miggimu te me sundalu ne egpandereet.
17 Ware panganiban ne egpekeyimatey keykew
wey egkatabak nu ka egbayung keykew.
Sika ka igsaad ku te me suluhuanen ku
wey sikeddi ka egpangabang kandan.
Sikeddi ka Magbebaye ne Manama ka miglalag kayi.”