55
Ka pegginggat te Manama
1 Migkahi ka Magbebaye ne Manama,
“Sikaniyu se langun ne nammaraan,
hendini kew te weyig wey inum kew.
Sikaniyu se ware me seleppi, kuwa kew wey keen kew!
Parani kew, kuwa kew te binu wey gatas ne ware bayad.
2 Mania te eggastu kew te seleppi niyu te kene egpekeural kaniyu?
Pammineg kew ayad-ayad keddi wey egpakakeen kew te malehet ne egkakeen,
wey egkeuralan kew iya.
3 Pammineg kew wey parani kew keddi,
eyew egkeuyag kew.
Ne eggimu a te ware egkatamanan ne kasabutan kaniyu,
wey egtumanen ku ka insaad ku ki Dabid.
4 Inggimu ku sikandin ne pangulu wey talagmandu te me nasud,
wey impapitew ku ka geem ku diye te me nasud pinaahi kandin.
5 Ne egpangumawen niyu ka me nasud ne ware niyu neileyi
wey ware degma nekeila kaniyu,
wey eg-aput sikandan kaniyu.
Su sikeddiey ka Magbebaye ne Manama niyu,
ka Matulus ne Manama te Israil, ka migbantug kaniyu.”
6 Parani kew te Magbebaye
taheed te egkaparaniyan pad sikandin.
7 Peengkera niyud ka maddeet ne me etew te mareet ne hinimuwan dan
wey te mareet ne suman-suman dan.
Palibera niyud sikandan diye te Magbebaye ne Manama ta
su igkeyid‑u rin ded sikandan wey egpasayluwen iya.
8 Migkahi ka Magbebaye ne Manama,
“Ka suman-suman ku, kene ne iling te suman-suman niyu,
wey ka me pamaahi ku, kene ne iling te me pamaahi niyu.
9 Ne iling te langit ne matikang puun te tane,
matikang degma ka me paahi ku
wey ka suman-suman ku du te paahi wey suman-suman niyu.
10 “Ka uran wey ka isnu ne egpuun te langit,
kenad e eglibed diye, ke kene, egpakaweyig e seini te tane
wey egpakapatubu te pinamula ne egpakabehey te beni te seeye se me talagbasuk
wey te egkakeen te me etew.
11 Ne iling ded degma ka lalag ku—
kene eglibed seini keddi ne ware egkeyimu.
Ka minsan nekey ne igkeupii ku ne egkeyitabu,
eglalahen ku re wey egkatuman iya.
12 “Me matig-Israil, me mahalew-galew kew ne egmangawe te Babilunya,
wey malinawen kew ne egmanlihawang te siyudad.
Ne ka me bubungan wey me labuntud, hendue te egkasabeka ne eg-ulahing te kahale,
wey egmegtagpi ka langun ne kayu.
13 Ne iyan e egtubu ka me kayu ne sipris wey ka me kayu ne mirtul
kenad ka me duhi wey ka me sapinit.
Ne egkeyimu e seini ne limlimuan ku te Magbebaye
wey palinneu seini ne kene iya egkataman.”