57
Ware karuan te me diyus-diyus diye te Israil
1 Egpatey ka matareng ne me etew ne migpalintutuu te Manama
wey ware egpakasabut ke mania te egkeyitabu seini.
Ware egpakasuman-suman ne egpatey ka matareng ne etew eyew kene sikandan egpakaselerep te mareet kayi te ampew te tane.
2 Ke egpatey ka etew ne matareng, egpekeyimeley e sikandin
wey egmalinawen e.
3 Piru parani kew, sikaniyu se egmekeiling te egpamulingan ne malitan,
egmekeiling te egmalibug-libug
wey te egpamelegye te lawa.
4 Hentew‑a ka imbaley-baley niyu?
Hentew‑a ka impamiyeran niyu wey inyewyawan niyu?
Me makasesale kew wey me limbungen!
5 Insimba niyu ka me diyus-diyus niyu
pinaahi te pegpeyilabetey niyu diye te lebut te me kayu ne uk wey diye te me meilem ne me kayu.
Ne impanubad niyu pad ka me anak niyu diye te me bangalug,
diye te diralem te me pahang.
6 Ka mallurung ne me batu diye te me bangalug iyan me diyus-diyus niyu.
Insimba niyu seini pinaahi te peghalad te egkakeen ne egpuun te egketuen ne pinamula wey te inumen.
Kahiyen niyu buwa ne nahala a te inggimu niyu?
7 Migmeyilhilabetey kew
diye te matikang ne bubungan,
te pegpangendiye niyu eyew te pegpanubad te me diyus-diyus niyu.
8 Intahu niyu pad man‑e ka me palinneu te me diyus-diyus niyu
diye te liyu te gumawan te me baley niyu,
wey diye te sungkaleg te gumawan.
In-engkeran a nikaniyu wey inliwanan a nikaniyu te me diyus-diyus niyu.
Egpekeiling kew te malitan ne egpalibug-libug ne migpanginggat te minsan hentew naan de ne lukes
wey amane en iya egkahale ne eggulid kandan.
9 Migpanguyan kew te lana ne ighalad niyu te diyus-diyus ne si Muluk,
migpanaman kew migpamaluhu te peemut.
Ne migsuhu kew pad man‑e te me etew ne egpamitew te me diyus-diyus
diye te mariyu ne inged eyew egsimbeen niyu.
10 Nabeley-beley kew e ka egpamitew te lein ne me diyus-diyus,
piru ware kew iya migpeeneng-eneng.
Migpakannekal kew
purisu ware kew iya migmahuye.
11 Hentew bes ne me diyus-diyus ka ingkaliyasi niyu amana,
ne iyan egpuunan ne nekeuubat kew keddi
wey nalingew kew keddi?
Migpeeneng-eneng e re te malayat ne timpu,
sikan naa ka ware kew e migtahud keddi.
12 Impapitew niyu ka pegkeetew niyu ne ubag kun me matareng kew en iya,
piru igpanengneng ku ka malehet ne egkeilingan te me hinimuwan niyu
wey kene seini egpakabulig kaniyu.
13 Ke diye kew te malised ne egkeula-ula,
eleg-eleg kew pangumew te me diyus-diyus niyu.
Eglayap sikandan
minsan senge-hiyup de te kalamag.
Piru ka eg-aput keddi,
egpekeugpe te tane ne imbehey ku kaniyu
wey egsimba keddi diye te matulus ne bubungan ku.
Ka saad te Manama ne egbulig wey egbawi
14 Migkahi ka Magbebaye,
“Paay-ayari niyu ka dalan.
Awaa niyu ka minsan nekey ne egpakabalabag te dalan te keet-etawan ku.
15 “Sikeddi ka labew wey ka matulus ne Manama,
ka ware egtamanan.
Diya a mig-ugpe te matikang wey matulus ne inged
piru eg-ugpa a degma duma te me mapariralemen
wey te seeye se mig-inniyug te me sale dan
eyew egkalig‑en ku sikandan.
16 Kena ad egpakig-ehet
wey ke egkabelu naa te ware egtamanan
su ke eggimuwen ku sika,
egpatey ka langun ne etew ne inggimu ku.
17 Tenged te pegkahalamlamen wey te mareet ne hinimuwan te me matig-Israil,
inlegparan ku sikandan wey mig-inniyuhan.
Piru migpabulus ded sikandan ka migsamsamili keddi
wey miggimu te igkengeupii ran.
18 “Nakita ku ka me hinimuwan dan,
piru egbawian ku red iya man‑e sikandan.
Egpanuluen ku sikandan te egbayaan dan
wey egpanalanginan ku.
Ne egliwangen ku seeye se miglungku.
19 Ne sikeddiey e ka egpuunan te pegdeyrey ran.
Ne minsan ke diye sikandan te mariyu wey ke diye naa te marani,
egbawian ku iya sikandan wey egbehayan te keupianan.
20 Piru ka me maddeet ne etew egpekeiling te dahat ne egbubunlud de due,
wey kene egpeeneng-eneng.
Ne egpekeuyan seini te me lapek
wey me basak diye te ilis.
21 Ware iya keupianan te maddeet ne me etew.”
Sika ka ingkahi te Manama.