58
Ka malehet ne pegpuasa
1 Ne migkahi e man‑e ka Magbebaye ne Manama,
“Panguleyi kew panaman-taman iling keemen te trumpita.
Ipanengneng niyu te keet-etawan ku ne me kabuhalan ni Hakub
ka seyyup dan wey ka me sale dan.
2 Piru layun sikandan migsabeka te pegsimba,
wey migkahi sikandan te egkeupian ne egnengneng te me paahi ku.
Migmalalahey sikandan ne ubag kun keet-etawan ne meupiya se hinimuwan.
Migbuyu sikandan te eleg ne peggukum
wey nahale sikandan ne egparani keddi.”
3 Ne migkahi sikandan,
“Migpuasa key, piru ware nu seini kitaa.
Migpariralem key, piru ware nu seini sahipaa.”
Ne migkahi a se Magbebaye,
“Ka malehet, migpuasa kew ne iyan niyu re insuman-suman ka igkeupii niyu
wey indeeg-deeg niyu ka me trabahanti niyu.
4 Migpuasa kew iya piru migpaap-apuley kew, migmeeg-ehetey,
wey migpasumsumbahey.
Ke iling due ka pegpuasa niyu,
kene ku egpamminehen ka me peg-ampu niyu.
5 Sikan bes ne pegpuasa
ka egpakapahale keddi?
Sikan bes ka malehet ne pegpariralem?
Eleg naa ka peg-u-unduk niyu iling te hilamunen
wey ka pegbebelat niyu te me saku
wey ka peggibat niyu diye te abu?
Kahiyen niyu buwa
ne sika ne pegpuasa ka igkeupii ku?
6 “Kene, ka igkeupii ku ne pegpuasa:
iyan ka pegpalihawang te seeye se impehes uripena,
ka peg-awe te mabehat ne binabaan te me trabahanti,
ka pegbehey te kaligwangan te immandeeg-deeg,
wey ka peg-awe te keddina ne nakabaku te me etew.
7 Behayi niyu te egkakeen seeye se egmanggutasan.
Peugpaa niyu diye te baley seeye se egkengaayu-ayu ne ware egkeugpaan.
Pakumbalei niyu seeye se ware igsaluub,
wey bulihi niyu ka me karumaan niyu ne ware egkeyimu.
8 “Ke eggimuwen niyu sika, eglayag kew
iling te aldew ne sahuhune egsile;
egbawian ku ka pali niyu wey mahaan de egkeulii.
Eggun‑a a kaniyu se Matareng ne Manama niyu
wey egbantayan ku ka keinniyuhan nu.
9 Ke egpangumew kew keddi, egtabaken ku sikaniyu, ‘Seini e red.’
“Ke egpeeneng-eneng kew e ka egdeeg-deeg, egpamayung, wey eglalag te mareet,
10 wey ke egpakeenen niyud ka miggutasan
wey ke egbehayan niyud naa ka egkengaware-ware te egkeilangan dan,
eglayag kew diye te marusilem.
Ka marusilem kaniyu, egpekeiling e kalayag te meudtu.
11 Eg-inahaken ku sikaniyu layun.
Egbehayan ku sikaniyu te ingkeilangan niyu
ke diye kew te mammara ne inged.
Eglig‑enen ku sikaniyu,
wey egpekeiling kew e te pinamulaan ne dakel se weyig,
wey te sebseb ne kene egkeetiyan.
12 Ne egpamebaley kew te me mateles diye te me siyudad niyu ne newugnak dengan.
Ne egngaranan kew te me etew, ‘Talag-ayad-ayad te me alabat te me siyudad.’ wey ‘Tigpameupiya man‑e te eg-ugpaan ne me baley.’ ”
Ka unag te pegtuman te Aldew te Peggimeley
13 Migkahi ka Magbebaye ne Manama,
“Tumana niyu ka Aldew te Peggimeley.
Kene kew himu te minsan nekey te sika ne aldew para re te kahalaan niyu.
Keilangan ne eg-isipen niyu ne mahal ka sika ne aldew wey tahura niyu seini;
kene kew himu te igkeupii niyu, wey kene kew lalag te minsan nekey re.
14 Puun due, egkakita niyu ka malehet ne kahale kayi te keddi.
Egbantuhen ku sikaniyu te intiru ne kalibutan
wey dakel ka egkahaani niyu diye te tane ne napanunud te kaapuan niyu ne si Hakub.
Sikeddi ka Magbebaye ne Manama ka miglalag kayi.”