65
Ka peggukum
1 Ne migkahi ka Magbebaye ne Manama,
“Natulituan a te seeye se ware migpamitew keddi,
wey migpakita a te seeye se migbalahad keddiey.
Migkahiyan ku seeye se me nasud ne ware mig-umew keddi, ‘Seini e red, seini e red!’
2 Aldew-aldew a ka egpangumew te me masinupaken,
ne ware mig-ikul te meupiya ne dalan
wey nasi mig-ikul te igkeupii ran.
3 Impeyibelu a nikandan,
wey impakita-kita ran iya ne ware sikandan migsanggel ka migsimba te diyus-diyus
pinaahi te peghalad diye te me pinamulaan
wey pegtutung te insinsu diye te me altar ne inggimu ran.
4 Ke marusilem, egpaminnuu sikandan diye te me lebeng wey diye te nenekeeles ne me inged
eyew egsimba te me diyus-diyus wey egpanginginse te me gimukud.
Ne egkeen sikandan te ngalap ne babuy
wey due sabew te ngalap ne in-isip ne malindit diye te me kendiru ran.
5 Ne egkahiyan dan ka duma,
‘Pariyu ka—kene ka parani keddi su matulus a amana.’
Ka seini ne me etew ka egpuunan ne egkalangetan a.
Ne egpekeiling ka langet ku kandan te hapuy ne egkanlabkanlab te senge-kaaldew.
6 “Pammineg kew! Seinid e te tangkaan ku ka insulat ku ne iggukum ku kandan.
Kena a egpeeneng-eneng—egsulian ku iya sikandan
7 tenged te me sale dan wey tenged te me sale te me kaap-apuan dan su migtututung ma sikandan te insinsu
ne inhalad dan te me diyus-diyus dan diye te me bubungan,
wey imbaley-baley a nikandan diye te me labuntud.
Egsulian ku iya sikandan!”
Sika ka ingkahi te Magbebaye ne Manama.
8 Ne migkahi ka Magbebaye,
“Ware egdereet te senge-pungpung ne behas te paras su egpuunan seini te binu.
Kene ku egdereetan ka langun ne keet-etawan ku;
egluwasen ku seeye se migpamakey keddi.
9 Egsama a te duma ne kabuhalan ni Israil.
Igpaangken ku te kabuhalan ni Huda seini se me bubungan.
Egkaangken seini te in-alam ku ne keet-etawan
wey diyad sikandan eg-ugpe.
10 Ne ka napu te Siyarun, egkeyimu e ne panabtaban te me ayam,
wey ka bangalug ne egngaranan te Akur, egkeyimu e ne bulukuanan te me baka.
Iyan egpakakamuney dutu ka keet-etawan ne migpamitew keddi.
11 “Piru egdusaan ku sikaniyu se mig-engked keddi,
wey sikaniyu se nalingew te matulus ne bubungan ku,
wey sikaniyu se mighalad te egkakeen wey binu
diye ki Gad wey Mini, ka me diyus-diyus ne Egbelig wey Meupiya se Kulis.
12 Implanu kud ka egpangkusan niyu,
ne eg-aminen kew iya te eggimatey.
Su ware kew migtabak te peg-umew ku kaniyu
wey ke migpammineg naa te peglalag ku kaniyu.
Iyan niyu nasi in-umalag te eggimu ka nanengnengan niyu ne igkeepes ku.”
13 Purisu migkahi a se Magbebaye ne Manama,
“Egpakakeen mule wey egpekeinum ka me suluhuanen ku
piru egmanggutasan kew wey egkammaraan.
Egkengahale sikandan piru egkeyilawan kew.
14 Egkahale ne egmangulahing ka me suluhuanen ku,
piru egmaninehew kew tenged te kalaggew niyu
duma te mangune-kune ne kahubut te suman-suman.
15 Ne ka me ngaran niyu egpekeiling te dilus diye te in-alam ku,
wey sikeddiey iya se Magbebaye ne Manama, ka eggimatey kaniyu.
Piru egbehayan ku te iyam ne ngaran ka me suluhuanen ku.
16 Ne seeye se diye te inged te Israil ne egkeupian te panalangin,
egpangananey e keddi te egkasalihan ne Manama ran.
Seeye se egsaad, egpahunlibet e pinaahi te ngaran ku te matinumanen ne Manama.
Su eglingawan kud e seeye se miglihad e ne keyirapan, wey kene kud seeye egsumsumanen.”
Ka iyam ne inggimu te Manama
17 Ne migkahi ka Magbebaye ne Manama,
“Pammineg kew, eggimu a te iyam ne langit wey tane.
Ne ka neneyitabu e, kenad e egkatanuran pad.
18 Purisu gale-gale kew amana te ware egtamanan tenged te inggimu ku.
Su eggimuwen ku ka Hirusalim ne inged te kahale,
wey egkahale-gale ka keet-etawan.
19 Egkahala a tenged te Hirusalim wey te keet-etawan kayi.
Ne warad e egkarineg ne egsinehew wey egpangananey puun te sika ne siyudad.
20 Ware egpatey diye ne egsusu pad
wey ware egpatey ne bate-bate pad.
Ka egpatey ne sabeke e ne gatus (100) se kabuyahi, eg-isipen ne bate-bate pad.
Ne ka egpatey ne kene de egpekeuma te sabeka ne gatus (100) se kabuyahi, eg-isipen ne indilus.
21 Te sika ne timpu, egmambebaley ka keet-etawan ku
wey egkeugpaan dan iya seini.
Egpamula sikandan te me paras
wey egkakeen dan iya ka me behas.
22 Kenad ne lein ka egpekeugpe te me baley ran
wey ke lein naa ka egpakakeen te me pinamula ran.
Egmalayat ka umul te keet-etawan ku iling kaluhey te pegkeuyag te kayu.
Egkengaaley iya sikandan te seeye se inlaslasayan dan te egtrabahu.
23 Ne kene egkaluhat sikandan,
wey kene egpakasalerep te karereetan ka me anak dan.
Su keet-etawan ma sikandan ne impanalanginan ku,
lagkes ka me kabuhalan dan.
24 Te kene pad sikandan egpakapangananey
wey ke taheed te egpangananey pad sikandan,
egtabaken kud e sikandan.
25 Ne egpegdumeen e te egpalayud ka mabbulut ne me singgalung wey me karniru.
Ne egkeen e te lahami ka me liyun iling te me baka.
Ne alinepung e ka egkeenen te me uled,
wey kenad seini egpangilabet wey ke egpasakit naa diye te matulus ne bubungan ku.
Sikeddi ka Magbebaye ne Manama ka miglalag kayi.”