66
Ka peggukum wey ka egkapallateng
1 Seini ka ingkahi te Magbebaye,
“Ka langit ka pinnuuwanan ku te egmandu, wey ka tane ka diekanan ku.
Nekey ne klasi ne baley ka eggimuwen niyu para keddi?
Mamenu ne inged ka egpeyimelayan niyu keddi?
2 Sikeddi ka miggimu te minsan nekey diye te langit wey te tane,
purisu keddiey iya seini se langun.
Egkahala a te seeye se mapariralemen wey seeye se mig-inniyug te sale, wey seeye se egkaaldek keddi wey egtuman.
3 “Ne miggimu ka keet-etawan te igkeupii ran.
Impeg-iling dan de ka peggimatey te baka eyew igpanubad wey ka pegpanubad te etew;
ka pegpanubad te nati te karniru wey ka peggepu te lieg te asu;
ka peghalad te egkakeen wey ke langesa naa te babuy;
ka peghalad te insinsu wey ka peg-ampu diye te me diyus-diyus.
Inggimu ran ka minsan nekey naan de ne igkeupii ran wey nakapahale kandan ka me halad ne igkalindit ku.
4 Egpeuyanan ku degma sikandan te me keyirapan ne igkaaldek dan.
Su ware sikandan migtabak te peg-umew ku kandan
wey ke migpammineg naa te peglalag ku kandan.
Iyan dan nasi in-umalag te eggimu ka nanengnengan dan ne igkeepes ku.”
5 Sikaniyu se mapahetpet ne migtuman wey migtahud te Magbebaye,
pammineha niyu ka lalag din ne miggenendue,
“Tenged su mig-ikul kew keddi,
egdumutan kew e te me duma niyu,
wey egsamsamilian.
Eglemetan kew nikandan te egkahi,
‘Meupiya perem ke due meupiya ne eggimuwen te Magbebaye due te kaniyu,
eyew egkakita ney ka kahale niyu!’
Piru sikandan iya ka egkeyilawan.
6 Pammineha niyu ka kahulub diye te siyudad wey diye te timplu.
Laheng sika te Magbebaye ne Manama ne egsuli te me kuntere din.
7 “Egpekeiling ka siyudad te Hirusalim te malitan
ne mig-anak te kene pad sikandin egpalelesut.
Te ware pad sikandin baletiki, miglesutan e sikandin te lukes ne bate.
8 Duen naan e nakarineg wey nakakita te iling due?
Sahuhune naa ne egkeyimu ka sabeka ne siyudad wey ke nasud naa te sabeka re ne aldew?
Mahaan de baletiki ka Hirusalim, wey miglesut e ka keet-etawan din.
9 Egtuhutan ku ne igkaberes ka me etew ne igkeupii ku,
wey egsihuruwen ku ne eglesut sikandan.
Egtumanen ku ka planu ku ne egbuhalen ku ka Israil.
Sikeddi se Manama ka miglalag kayi.”
10 Sikaniyu langun se miggeyinawa te Hirusalim
wey miglungku tenged kandin,
gale-gale kew duma kandin,
11 eyew egkabehayan kew te dakel ne panalangin din,
iling te bate ne egkabulung-bulung
ke egsusu te iney rin ne egpakaliwang kandin.
12 Su migkahi ka Magbebaye,
“Pitew kew, egbehayan ku ka Hirusalim te dakel ne panalangin
iling te weyig ne eglapey,
egpanguyanen ka me karatuan te me nasud diye te kandin.
Egtangguwen kew iling te bate ne egsapipiyen, egpasusuwen, wey eggibeen.
13 Egliwangen ku sikaniyu diye te Hirusalim
iling te iney ne egliwang te me anak din.
14 Ke egkakita niyud seini, egkahale kew iya,
wey egmanekal kew iling te pinamula ne eglambeg.
Igpakita te Magbebaye ka geem din diye te me suluhuanen din,
piru langet ka igpakita rin diye te me kuntere din.”
15 Egginguma ka Magbebaye ne egdumaan te hapuy,
wey egpekeiling te balisusu ka me karwahi rin.
Igpaneem-neem din ka langet din diye te me kuntere din,
wey egdusaan din sikandan te hapuy ne egkanlabkanlab.
16 Su egdusaan ma te Magbebaye ka langun ne makasesale kayi te ampew te tane pinaahi te hapuy wey kampilan,
wey masulug ka egkeyimatayan din.
17 Migkahi ka Magbebaye ne Manama, “Egpatey seeye se migmatulus wey miglinis te pegkeetew ran wey mig-ikul te pangulu ran eyew egsimba te me diyus-diyus dan diye te pinamulaan. Egpatey sikandan taheed te egkeen sikandan te babuy, ambew, wey te duma pad ne ngalap ne in-isip ne malindit.
18 Nakanengneng a te hinimuwan dan wey suman-suman dan. Purisu eggenduen a wey eglibulungen ku ka me tribu wey langun ne linalahan te langun ne nasud wey egkakita ran ka geem ku.
19 Ne egpapitew a te palinneu kandan. Ne seeye se egkasame, igpeuyan ku diye te me nasud te Tarsis, te Put, te Lud, te Tubal wey diye te Haban, wey diye te me ilis te dahat ne ware pad narineg ka kabantug ku wey karesen ku. Ne diye te sika ne me nasud, igpanengneng dan ka kabantug ku.
20 Ne igpalibed dan ded kayi te Hirusalim ka langun ne duma ran ne me matig-Israil ne nakasuwey-suwey diye te lein ne me nasud isip igdasag dan keddi te Magbebaye. Ne eg-untud sikandan te me kudde, me karwahi, me kerumata, me mula, me kamil, wey egmangendiye sikandan te bubungan ku ne matulus, ne iyan ka Hirusalim. Iling sikandan te me matig-Israil ne eghalad te egkakeen ne intahu te malinis ne tahuanan.
21 Ne ka duma kandan, eggimuwen ku ne me talagpanubad wey me Libita. Sikeddi ka Magbebaye ne Manama ka miglalag kayi.”
22 Ne migkahi pad man‑e ka Magbebaye ne Manama,
“Ware katamanan te iyam ne langit wey tane ne eggimuwen ku,
wey ka kabuhalan niyu kene degma egkataman,
wey kene kew iya egkalingawan.
23 Egsimba keddi ka langun ne keet-etawan te tagse pegsile te iyam ne bulan
wey te tagse Aldew te Peggimeley.
Sikeddi se Magbebaye ne Manama ka miglalag kayi.
24 “Te peglihawang dan te Hirusalim, egkakita ran ne nammatey e ka me etew ne migribildi keddi. Ne ka me liwati ne egkeen kandan kene egpatey, wey ka hapuy ne egpakatutung kandan kene egkeebukan. Ne igkaligsem sikandan te langun ne keet-etawan.”