13
Ka pegpeuteng ni Hub ne ware sale din
1 Ne migpabulus-bulus si Hub ka migkahi,
“Nakita wey narineg kud sika langun se immanlalag niyu,
wey nasabut kud sika.
2 Ke nekey ka natuenan niyu, natuenan ku degma;
kene kew ne labew keddi.
3 Piru egkeupian a ne egpakiglalag te Maresen ne Manama,
eyew egpakiggusey kandin meyitenged te egkeula-ula ku.
4 Piru sikaniyu, egmangasak kew re due nahud te ubat ne ubag kun nakanengneng kew.
Iyan niyu langun egkeilingan ka duktur ne ware karuan.
5 Meupiya pad ke egpeeneng-eneng kew naan de,
eyew egkapalintutuuwan kew red ne me matagseb.
6 “Pammineha niyu ka me sagsahukul ku,
wey linglingaa niyu ka me katarengan ku.
7 Kene kew suman-suman ne egkalapihan niyu ka Manama
pinaahi te peg-uubat wey pegpanlimbung.
8 Kene kew suman-suman ne egkapangabangan niyu ka Manama,
wey egkewusey niyu ka kasu rin diye te hukumanan.
9 Ke sikaniyu pad iya ka eg-ug-ugsiyen te Manama,
hanew ta ke nekey ka egtamanan niyu?
Kahiyen niyu buwa ne egkalimbungan niyu ka Manama
iling te etew?
10 Klaru iya ne egsaparan kew nikandin minsan ke inlapihan niyu sikandin te heles de.
11 Ware kew naa naaldek te katenged din?
Egkahunaan kew iya tenged te langet din kaniyu.
12 Ware karuan te me lalag niyu iling te abu,
wey ka me katarengan niyu iling de kahuye te kuren ne tane.
13 “Peeneng-eneng kew wey palalahe e pa.
Balahara ad nikaniyu ke nekey ka egtamanan ku.
14 Andam ad e ne egsahap,
wey balahad e ke egpatey a.
15 Naawaan ad te egkapallateng purisu balahad e ke eggimatayan a te Manama,
piru egpangatarengan e red iya man‑e diye te kandin.
16 Kema ke pinaahi kayi ne egkaluwas a,
su ware mareet ne etew ne egpakaatubang te Manama.
17 Pammineha niyu ay-ayari ka eglalahen ku.
18 Andam ad e ne egpangatarengan,
wey nakanengneng a ne egkapamalehetan ne ware sale ku.
19 Egbayungan e naa nikeykew Manama ne nakasale?
Ke nakasale e ma iya, andam ad e ne egpeeneng-eneng wey egpatey.
20 Duen de daruwa ne egbuyuen ku keykew Manama,
eyew kena a eggeles keykew:
21 peen-enengi ad te egbayad-bayad,
wey kena ad e hinalati.
22 Ne umawa a, wey egtabaken ku sikeykew;
wey ke palalaha a, wey tabaka a nikeykew.
23 Guhuri a ke nekey ka kene ne me meupiya ne neyimu ku wey ka me sale ku.
Panengnenga a ke nekey ka sale ku.
24 Mania te eggelhelesan a nikeykew,
wey egkuntereen?
25 Mania te ingginalatan
wey inlupug a nikeykew?
Iling e re te nahangu ne lahami
wey ke dewun naa ne eglayap-layap te kalamag.
26 Migsulat ka te me masakit ne lalag te pegbayung keddi,
wey impabayad a nikeykew te kene ne meupiya ne neyimu ku te bate e pad.
27 Egpekeiling e te imbaku a nikeykew te keddina.
Ne intetamengan nu ka langun ne eggimuwen ku
wey in-ugsi-ugsi nu minsan ka me sikal ku.
28 Tenged due, nareetan a iling te nalepuk ne batang,
wey iling te kumbale ne egkahan-ganaran egkaleddak.”