14
1 Ne migpabulus-bulus si Hub ka migkahi,
“Miglesut ki se me etew puun te malitan.
Purisu mahuye ki re amana wey ware egpakapangabang,
wey mallepet de se umul ta
wey napenu te kahubut.
2 Nekeiling ki te bulak ne egpamukadkad wey egkalanes;
iling te alung ne eglihad de wey egkaawe e.
3 Egpitawen nu naan pad ka etew ne egkeiling e rue,
wey eg-uyanen nu naan pad sikandin diye te hukumanan eyew eggukuman nu?
4 Duen naa etew ne malinis? Ware!
Neetew ka langun, ne mallindit.
5 Intahahe nud ke mamenu kaluhey ka umul te etew,
wey kenad sikandin egpakasubla te timpu ne intahahe nu para kandin.
6 Purisu balahara nud sikandin
iling te sabeka ne talagpanginaaldew ne eg-impus te himu rin.
7 “Ke egpeleren ka kayu, duen pad egkeiman-iman—
egtunasan ded seini,
wey eglapung e man‑e.
8 Minsan buyag e ka dalid kayi,
wey namewu e ka tued,
9 egtunasan ded seini ke egkaweyihan,
wey egsusugpang e man‑e iling te iyam pad ipamula.
10 “Piru ke egpatey ka etew, egkataman e ka langun ne keseg din;
pegkabigtew te geyinawa rin, iyan e sika katamanan din.
11 Iling te lanew ne neetiyan
wey te beuhan ne warad e weyig,
12 egpatey ka etew wey kenad e sikandin egkapukew
wey kenad egpekeenew,
taman te egkaawe ka langit.
13 “He Manama, iggeles ad perem nikeykew diye te inged te me minatey,
wey eglingawan ad perem nikeykew taman te egkaawe e ka langet nu.
Piru teil ke naan de te timpu te pegsuman-suman keddi.
14 Ke egpatey ka etew, egkeuyag naan pad sikandin? Klaru iya ne kenad!
Piru sikeddi, eg-antusen ku ka langun ne timpu te pegkabaybayari ku,
taman te timpu ne egkataman e seini.
15 Ke eg-umawen a nikeykew Manama, egtabaken ku sikeykew,
wey igkahala ad e nikeykew se inggimu nu.
16 Te iling due, egbebantayan a layun nikeykew,
piru ware nud e tantanuri ka me sale ku.
17 Iling te igtahu nud te saku ka me sale ku,
wey egbunbunan nud e ka kene ne me meupiya ne neyimu ku.
18 “Piru iling te me bubungan ne egkengallunew keureme,
wey iling te egkallilid ne me batu;
19 wey iling te egkeehas te weyig ne me batu,
wey iling te egkakankan ne tane tenged te dakel ne uran,
ka pegdereet nu te egkapallateng te etew.
20 Egkatalu nu ka etew te katamanan ne timpu wey egpatey e sikandin,
wey egkabalbalawan e ka ulaula rin.
21 Ne warad hinanawan din ke egbantuhen naa ka me anak din
wey ke eggehambaan naa.
22 Ne iyan din de egkaheram ka masakit te lawa rin
wey pegkalaggew te pegkeetew rin.”