39
1 Nakanengneng ke naa ke ken‑u eg-anak ka me leew ne kambing,
wey nakakita ke naa te me usa ne mig-anak?
2 Naseel nu naa ka me bulan te pegkaberes dan
taman te eg-anak sikandan?
Nakanengneng ke naan iya ke ken‑u sikandan eg-anak?
3 Nakanengneng ke naa ke ken‑u sikandan egpanimbuel ka egpalelesut?
4 Emun ke egmanulin e ka me anak dan diye te kabbenesan wey memeupiya se lawa,
egmanleug-leug e seini wey kenad e eglibed diye te iney ran.
5 “Hentew naa ka migbehey te kaligwangan te me leew ne asnu,
eyew egmakaleleug sikandan minsan hendei?
6 Ka ugpaan ne imbehey ku te me asnu iyan ka inged ne ware mig-ugpe
wey ka me inged ne ware egtubu ne me sagbet.
7 Ne egpadpariyu ka me asnu te me siyudad,
wey warad iya egkarineg dan ne etew ne egbalukan ne egpatrabahu kandan.
8 Egmanleug-leug sikandan diye te me bubungan
ka egpamitew te me meilem-ilem ne me sagbet ne egkatabtab dan.
9 “Egpakahamit ke naa te leew ne baka te pegtrabahu?
Egbulbuluku naa seini diye te kulungan nu te timpu te marusilem?
10 Egkeyiketan nu naa seini eyew igdaru
wey ke egpahanuyen naa te karas diye te kamet nu?
11 Egpakasalig ke naa due
ne iyan eggimu te mabbehat ne trabahu nu tenged te kanekal kayi?
12 Egpakasalig ke naa kandin ne iyan eg-uney-uney egpanlimud
wey egpanlaglag te me trigu diye te diekanan nu?
13 “Amana ne mateles ne egtengtengan ka me pakpak te ustrits ke egpalpalakpak,
piru kene sikandin egpakalayang iling te kaliyawa.
14 Ne egbalaharen te ustrits ka me atelug din diye te tane
eyew egkeinit-initan seini.
15 Warad en iya sikandin migsuman-suman ne kema ke egkariekan ka me atelug din
wey ke egpameseen naa te leew ne me mananap.
16 Egbalaharen din de ka me piyak din iling te kene ne kandin.
Kene sikandin egkalaggew ne kema ke egkamenu ka me piyak ne inlasayan din.
17 Sikeddi ka miggimu kandin ne egkeungel-ungel;
ware ku sikandin behayi te salabutan.
18 Piru ke eglahunat e ka sika ne bubuyahen ne manuk eyew egpallahuy,
egkaliyuwan din de ka kudde duma te migpangudde
wey iling te egngisiyan din de.
19 Sikeykew naa, Hub, ka migbehey te kanekal te me kudde,
wey ka miggimu te me kebbuley ran?
20 Sikeykew naa ka migpeum-umbetut kandan iling te me talangas,
wey nakapaaldek te me etew tenged te pegdindineg-ey ran?
21 Egpangalkalen te me kudde ka tane diye te me bangalug,
wey egpeggasal sikandan te kanekal ran.
Ne egpamallahuy sikandan peendiye te giraanan.
22 Ware igkengaaldek dan,
wey kene egpallahuy puun te giraanan.
23 Ne masitetahingting de iya wey masipamalusigsig
ka me panganiban te migmangudde.
24 Ne kenad e sikandan egkateu-teu tenged te ana-ana,
wey masilugpat sikandan ke egparahingen e ka trumpita.
25 Egmandindineg-ey sikandan ke egpakarineg te trumpita;
egkengaarek dan ka gira minsan mariyu pad seini
wey egkarineg dan ka egpekeiling te luhung ne me balukanan te me kumandir ne egsuhu.
26 “Sikeykew naa ka migbasbas te banug ne eglayag,
wey egbekad te pakpak din eyew eggendiye te igkakawanan ne balabahan?
27 Sikeykew naa ka migsuhu te agila ne eglayang
wey te peggimu te salag din diye te me matikang ne inged?
28 Diye eg-ugpe ka agila te me dalayap,
wey iyan din alindunganan ka malliddus ne batu.
29 Ne diye naa sikandin egpampamantew
eyew te peg-iipat te egdawiyen din,
wey egpakakita iya sikandin minsan mariyu.
30 Ke hendei ka lawa ne napatey,
diye degma eglibulung ka me banug,
wey egpanupsupen te me piyak dan ka langesa.”