40
Ka pegginalig te Manama ki Hub ne egpatabaken
1 Ne ingkahiyan te Magbebaye ne Manama si Hub,
2 “Sikeddi ka Maresen ne Manama!
Piru impandakesel a nikeykew ne naseyyup.
Ne kun, tabaka a.”
Ka tabak ni Hub
3 Ne migtabak si Hub ne migkahi,
4 “Nakamaan-maan a kuntee, te kena a ne likes ne egtabak keykew;
nekey naan pad ka igtabak ku keykew?
Egpeeneng-eneng e naan de.
5 Suble e ka nallalag ku;
kena ad e eg-abey-abey.”
Ka tabak te Manama ki Hub
6 Ne migtabak e man‑e ka Magbebaye ne Manama ki Hub puun te balisusu,
7 “Pangandam ka wey tabaka nu ka me inse ku.
8 Egkeupian ke naan pad iya man‑e ne egpamalehet ne naseyyup a,
wey sikeykew ka eleg?
9 Maresen ke naa iling keddi,
wey egderaheneg naa ka laheng nu iling te laheng ku ne iling te luhung?
10 Ke egpekeyimu ka rue,
ipapitew nu ka katenged nu, pegkatalahuren, katelesan, wey pegkamabantug nu.
11 Pitawa nu ka me hambuhen;
ipalihawang nu ka langet nu diye te kandan,
wey ipariralem nu sikandan.
12 Uya, pitawa nu iya sikandan wey ipariralem nu;
pandereeti nu ka me makasesale diye te insasindehan dan.
13 Ne ipanlebeng nu sikandan langun te tane,
wey pamirisuwa nu diye te inged te me minatey.
14 Ne emun ke egkeyimu nu sika, sikeddi ka hun‑a ne egdeyrey keykew,
su ka keseg nu ma mismu ka egpakaluwas keykew.
15 Tengtengi nu ma ka bubuyahen ne mananap ne egngaranan te Bihimut;
nekeg-iling kew ne inggimu ku.
Ne egpanabtab degma sikandin te sagbet iling te baka.
16 Malig‑en ka lawa rin,
wey amana sikandin ne manekal.
17 Egpakelehen din ka ikug din iling te kayu ne sidar;
amana ne mannekal ka me bubun din.
18 Iling kakehal te burunsi ka me tul‑an din
wey iling te putew ka me lisen din.
19 Sika ne mananap ka kein-inuwan te langun ne mananap ne inggimu ku,
wey sikeddi de ka egpakapatey kandin.
20 Egpanabtab sika ne mananap diye te me bubungan
taheed te egmangekelag diye te marani rin ka leew ne me mananap.
21 Eggibat sikandin diye te diralem te me pinamula ne duhiyen,
wey egsuksuk diye te me kumpay ne diye te lasak-lasak.
22 Ka me kayu ne duhiyen wey duma ne me kayu ne diye te ilis te weyig,
ka helunganan din.
23 Pitew ka, kene sikandin egkaaldek te egduu ne weyig;
hendue te ware de kandin ka Weyig ne Hurdan ne eglipew e te ulaula rin.
24 Ware minsan hentew ne egpakarakep te sika ne mananap pinaahi te pegbutud kandin
wey ke egpakasahilut naa kandin, wey egpakapilak te irung din.”