Talewukum 4

Ka me pangulu ne ensi Dibura wey Barak

1 Te migpatey e si Ihud, miggimu e man‑e ka me Israilita te mareet diye te tangkaan te Magbebaye ne Manama. 2 Sikan naa ka intuhutan sikandan te Magbebaye ne Manama ne egkatalu ni Habin ne Hari te Kanaan ne iyan migmandu te siyudad te Hasur. Iyan pangulu te me sundalu ni Habin, si Sisira ne mig-ugpe diye te Harusit-Ha-Guwim. 3 Si Habin due siyam ne gatus (900) ne karwahi ne putew. Ne imbaybayaran din ka me Israilita te daruwa ne pulu (20) ne leg‑un. Purisu migpangananey te Magbebaye ne Manama ka me Israilita.

4 Te seeye ne timpu, si Dibura ka pangulu* te Israil, malitan sikandin ne prupita wey asawa ni Lapidut. 5 Nabatasan din ne egpinpinnuu te diralem te kayu ne palmira, ne diye te elat-elat te Rama wey te Bitil ne diye te bubungan te Ipraim. Ne egmangendiye naa te kandin ka me Israilita ne egpewusey. 6 Sabeka ne aldew, impeumew rin si Barak ne anak ni Abinaum ne diye mig-ugpe te Kidis ne sakup te inged te Naptali. Te pegginguma ni Barak, ingkahiyan e sikandin ni Dibura, “Insuhu ka te Magbebaye ne Manama te Israil ne egparurumeen ka te sapulu ne libu (10,000) ne lukes te me kabuhalan ni Naptali wey ni Sabulun, wey hendiye kew te bubungan te Tabur. 7 Egpeendiyeen te Magbebaye si Sisira ne pangulu te me sundalu ni Habin eyew egpakiggira kaniyu diye te Weyig ne Kisun duma te me karwahi rin wey me sundalu rin, piru egpepanaluwen kew te Magbebaye te peggira niyu kandan.”

8 Ne ingkahiyan ni Barak si Dibura, “Eggendiya a ke egduma ka keddi; piru ke kene ka egduma keddi, kena a eggendiye.”

9 Ne migtabak si Dibura, “Uya, egduma a keykew. Piru kene ne sikeykew ka egkabantug te seini ne gira, su egtuhutan te Magbebaye ne Manama ne egkatalu si Sisira te malitan.” Seeye naa, migsasindeg si Dibura wey migdume e ki Barak te egpeendiye te Kidis. 10 Ne impeumew ni Barak ka me kabuhalan ni Sabulun wey ni Naptali ne egpeendiyeen te Kidis. Sapulu ne libu (10,000) ne sundalu ka migduma kandin, wey migduma degma kandin si Dibura.

11 Te seeye ne timpu, migpariyu si Hibir te me karumaan din ne me Kinihanen ne me kabuhalan ni Hubab ne uyang ni Muwisis. Impasasindeg din ka balungbalung din diye te lenged te kayu ne uk diye te Saananim ne marani te Kidis.

12 Te natahaan ni Sisira ne migtakereg si Barak ne anak ni Abinuam diye te bubungan te Tabur, 13 inlibulung din e ka siyam ne gatus (900) ne karwahi rin ne putew wey ka langun ne sundalu rin. Migligkat sikandan puun te Harusit-Ha-Guwim peendiye te Weyig ne Kisun.

14 Ne migkahiyan ni Dibura si Barak, “Hipanew kad! Seini ka aldew ne igpatalu te Magbebaye ne Manama si Sisira keykew. Eggun‑a iya keykew ka Magbebaye ne Manama!” Purisu migtupang e si Barak puun te Bubungan ne Tabur duma te sapulu ne libu (10,000) ne sundalu rin. 15 Te peglusud ni Barak wey te me sundalu rin, inlibeg e te Magbebaye ne Manama si Sisira wey ka langun ne nanguntud te me karwahi, wey ka me sundalu. Ne migpamaneug si Sisira te karwahi rin wey migpallahuy. 16 Ne intalukunan enni Barak ka me sundalu lagkes ka migmanguntud te me karwahi taman diye te Harusit-Ha-Guwim. Impangimatayan dan ka me sundalu ni Sisira wey warad iya minsan sabeka ne nasame.

17 Piru migpallahuy si Sisira peendiye te balungbalung ni Hail ne asawa te Kinihanen ne si Hibir. Inggimu seeye ni Sisira tenged su talag-alukuy ma si Habin ne Hari te Hasur ki Hibir. 18 Ne miglihawang si Hail ka egsinug-ung ki Sisira wey migkahi, “Hendini ka ahalen, seled ka kayi te balungbalung ku. Kene ka kaaldek.” Sikan naa ka migseled e sikandin diye te balungbalung te malitan, wey impules e sikandin ni Hail te ulesen eyew iggeles.

19 Ne migkahiyan sikandin ni Sisira, “Behayi a ubag te weyig ne egkeinum su nammaraan a.” Ne impuwasan ni Hail ka laplap ne tahuanan te gatas wey impeinum din e sikandin. Ne impules din e man‑e sikandin te ulesen. 20 Ne migkahiyan e man‑e sikandin ni Sisira, “Sasindeg ka due te gumawan te balungbalung. Ne emun ke due etew ne egginguma wey eg-inse keykew ne eggenendue, ‘Due etew kayi?’ Tabaka nu, ‘Ware.’ ”

21 Piru migkuwa mule si Hail te buntuk wey pes-ek te balungbalung, wey migpahanad-ganad sikandin migparani ki Sisira taheed te newulep-hulep su nabeley amana. Ne impalpal din ka pes-ek te balungbalung diye te ulu ni Sisira taman te mig-abas seini diye te tane wey napatey e si Sisira. 22 Te miggingume e si Barak ka egpanalukun ki Sisira, miglihawang e si Hail ka egsinug-ung kandin wey migkahi, “Hendini ka, igpakita ku keykew ka etew ne impamitew nu.” Sikan naa ka miglasud e si Barak. Ne iyan din e nakita si Sisira ne nakabahed de ne napatey e. Ne ka pes-ek te balungbalung nakapalpal pad diye te ulu rin.

23 Te seeye ne aldew, impepanalu te Manama ka me Israilita ki Habin ne Hari te Kanaan. 24 Ne wey e migpenek-penek ka me Israilita ne egkuntere ki Habin ne Hari te Kanaan taman te neyimatayan dan e sikandin.