5
Ka peg-ulahing ni Dibura wey ni Barak
1 Te seeye ne aldew, mig-ulahing si Dibura wey si Barak ne anak ni Abinuam te seini ne ulahingen:
2 Egdayanen ka Magbebaye ne Manama!
Su ka me pangulu te Israil ka miggun‑a te pegpakiggira wey nabbagget ne migsinundul ka keet-etawan.
3 Pammineg kew me Hari!
Panalinga kew me pangulu!
Su eg-ulahingan ku te me pegdayan ka Magbebaye ne Manama,
ne iyan ka Manama te Israil.
4 He Magbebaye ne Manama, naantag ka kalibutan,
mig-uran wey nabusaye ka weyig puun te gapun
te peg-awe nu diye te bubungan te Siir
wey te peggipanew nu diye te tane te Idum.
5 He Magbebaye ne Manama, miglilinug ka me bubungan diye te tangkaan nu.
Manama ka te Israil ne migpapitew dengan diye te bubungan ne Sinay.
6 Te timpu ni Samgar ne anak ni Anat,
wey te timpu ni Hail,
eg-alihuwen te me etew ne egluyud ka maluag ne dalan,
wey diyad egbaye te malig-et ne me dalan.
7 Deisek naan de ka nasame ne me etew te Israil
taman te migginguma si Dibura, ne in-isip ne iney te me Israilita.
8 Ne migginguma ka gubut diye te intiru ne Israil
te timpu ne migpamakey ka me Israilita te iyam ne me diyus-diyus.
Ne ware me kalasag wey ke deldeg naa
te hep‑at ne pulu ne libu (40,000) ne me sundalu te Israil.
9 Diye ka geyinawa ku te me pangulu te Israil,
wey diye te me etew ne mig-uney-uney re due migbulig te me duma ne egpakiggira.
Egdayanen ka Magbebaye ne Manama!
10 Ipangguhud niyu seini, sikaniyu se migmangudde te maangkag ne me asnu,
ne migpinpinnuu diye te mahal ne hinabel ne hagpi kayi,
wey minsan sikaniyu se egkaayu-ayu ne miggipanew diye te deralanen.
11 Pammineha niyu ka guhuren te me etew ne diye te me sakeruwan.
Migpahuhurey sikandan te pegpanalu
te Magbebaye ne Manama wey te keet-etawan din.
Ne migmangendiye te me gumawan te siyudad ka keet-etawan te Magbebaye ne Manama.
12 Sasindeg ka Dibura,
wey ulahing ka.
Hipanew ka Barak ne anak ni Abinuam,
wey pandakepa nu ka me kuntere ta.
13 Ne migtupang ka nenasame ne keet-etawan te Magbebaye ne Manama kayi te kanami te me pangulu ran
eyew egpakiggira te me mabulut ne me kuntere.
14 Diye migpuun ka duma kandan te Ipraim
ne migpuun dengan te inged ne naangken te me Amalikanen.
Ne nakasinundul ka kabuhalan ni Binhamin kandan.
Ne migtupang degma ka me pangulu te pamilya ni Makir,
wey ka me upisyal puun te kabuhalan ni Sabulun eyew egpakiggira.
15 Ne migduma ki Dibura ka me pangulu te kabuhalan ni Isakar.
Migduma ki Barak ka me kabuhalan ni Isakar peendiye te kannapuan.
Piru ware nasabeka ka suman-suman te kabuhalan ni Rubin.
16 Mania te egpalunggehaat sikandan duma te me karniru?
Eyew naa te pegpammineg te seeye se egpangumew te me talagtameng te me karniru?
Piru ware nasabeka ka suman-suman te kabuhalan ni Rubin.
17 Ne migpalunggehaat ka kabuhalan ni Gilyad diye te talipag te Hurdan.
Ne mania degma te mig-uugpe ka kabuhalan ni Dan diye te me barku?
Ne ware degma mig-awe ka kabuhalan ni Asir diye te ilis te dahat
wey diye de iya nangugpe te ugpaan dan.
18 Piru kenad iya egkaaldek ne egpatey ka kabuhalan ni Sabulun,
wey migpakig-ehet degma ka kabuhalan ni Naptali diye te giraanan.
19 Migginguma wey migpakiggira ka me Hari te Kanaan
diye te Taanak ne diye te ilis te me weyig te Migidu,
piru ware naahew ran ne me pelata.
20 Migbulig degma migpakiggira ka me bituen diye te langit,
migpakiggira sikandan engki Sisira puun te egbayaan dan diye te aw-awangan.
21 Ne in-anlas sikandan te tapey ne Weyig ne Kisun.
Egpabulus ka Dibura, egpabulus ka iya ne due kabulut!
22 Ne migdabek-dabek ka egkariekan te me kudde,
tenged te kene dan egpeen-enengan te egsintak ka me kudde dan.
23 Ne migkahi ka panalihan te Magbebaye ne Manama, “Dilusa niyu ka inged ne Mirus;
dilusa niyu ka me mahinged due tenged su ware sikandan miggendiye
ka egbulig te Magbebaye ne Manama,
ne egkuntere te mabbulut ne kuntere.”
24 Te langun ne me malitan, si Hail ne asawa ni Hibir ne Kinihanen ka subla ne impanalanginan.
Sikandin ka subla ne impanalanginan te langun ne me malitan ne mig-ugpe diye te me balungbalung.
25 Imbuyuan sikandin ni Sisira te weyig,
piru gatas mule ka imbehey rin ne diye itahu te inumanan ne inggimu para te etew ne dakel se katungdanan.
26 Pegkeimpus, inggen-genan din te gibang ne belad din ka pes-ek te balungbalung din,
wey diye te kawanan ne belad din ka buntuk.
Ne impalpal din ka pes-ek te balungbalung diye te ulu ni Sisira,
wey nalungahan e ka ulu rin.
27 Nakabahed de si Sisira diye te paa ni Hail
wey diye de iya sikandin napatey.
28 Ne migpamantew ka iney ni Sisira diye te bintana wey kenad egkateu-teu.
Egtetahad sikandin diye te bintana ke ken‑u eglibed ka anak din, wey migkahi,
“Mania te mananey egpakalepew ka karwahi rin?
Mania te ware egdabek-dabek ne me kudde din?”
29 Ne migtabak ka amana ne matagseb ne me malitan,
wey nekeiling ded degma ka iglalag-lalag din:
30 “Migtalad-talad sikandan te naahew ran ne me kasangkapan;
mig-atul-atul sikandan miggilabet te sabeka wey ke daruwa naa ne malitan.
Due mabbatek ne hinabel ne naahew ni Sisira
wey due degma naahew ne indayan-dayanan te egteyi ne para keddi.
Uya iya, due degma nenaahew ne mabbatek ne inteyian ne igbebalieg.”
31 Sikan naa ka pangimatayi nu Magbebaye ne Manama ka langun ne kuntere nu!
Piru ipalayag nu seeye se miggeyinawa keykew iling te aldew ne migsile ne lelayahi amana.
Ne ware samuk te Israil te hep‑at ne pulu (40) ne leg‑un.