3
Ka peggendiye ni Hunas te Ninibi
1 Ne impanengneng e man‑e te Magbebaye ne Manama si Hunas,
2 “Dagdahew ka hendiye te Ninibi, ka dakel ne siyudad wey ipangguhud nu diye ka igpahuhud ku keykew.”
3 Ne dutu, migtuman e si Hunas te ingkahi te Magbebaye ne Manama wey miggendiyad te Ninibi. Dakel amana ne siyudad ka Ninibi su egtatelu ne aldew ka pegtale dutu.
4 Migsenge-kaaldew si Hunas ka miggipanew te pegseled din te siyudad. Pegkapenga due, migpangguhud e sikandin ne miggenendue, “Te hep‑at ne pulu (40) ne aldew puun kuntee, egdereetan e seini se inged ne Ninibi!”
5 Ne seeye se me matig-Ninibi, migpalintutuu te Manama wey nasabeka sikandan langun ne migpuasa ligkat te me meyaman peendiye te egkaayu-ayu, wey migsaluub sikandan te saku isip palinneu te peglungku dan.
6 Te pegkarineg dutu te Hari te Ninibi, migsasindeg sikandin puun te trunu rin wey inluung din e ka mahal ne kumbale din wey migsaluub e sikandin te saku wey migpinnuu diye te abu.
7 Ne impataha rin ka me matig-Ninibi te miggenendue, “Seini ka suhu te Hari wey te me upisyal din: ka langun ne etew wey ka me ayam, keilangan ne kene egkeen wey eg-inum.
8 Keilangan ne ka langun ne etew egsaluub te saku, wey ka me ayam dan degma egpanaluuban dan. Ne keilangan ne eg-ampu ka langun diye te Manama ne malehet iya ne egpuun te pusung dan, wey eg-inniyuhan dan ka maddeet ne batasan wey hinimuwan dan.
9 Su kema ke egkabalbalawan ded ka suman-suman te Manama wey egkabewu red ka langet din kanta eyew kene ki red egkahule.”
10 Te nakita te Manama ka inggimu ran ne peg-inniyug te mareet ne hinimuwan dan, nabalbalawan e ka suman-suman din meyitenged te pegdereet din perem kandan wey ware din e seeye ipabulus.