4
Ka langet ni Hunas te pegkeyid‑u te Manama te matig-Ninibi
1 Ne puun te seeye ne neyitabu, natameneng amana si Hunas wey nalangetan sikandin.
2 Ne mig-ampu sikandin te Magbebaye ne Manama ne migkahi, “Magbebaye, seini iya ka nasuman-suman ku ne egkeyitabu te diye e pad te inged ku. Ne sika ka egpuunan ne egpallahuy a perem diye te Tarsis su nakataha a Manama ne meupiya ka, hiid‑uwen ka, wey kene ne mahaan ne egkabelu. Dakel ka geyinawa nu ne kene egkabalbalawan, wey andam te pegbalew-balew te insuman-suman nu ne pegdereet te me etew.
3 Purisu Magbebaye ne Manama, kua nud mule ka umul ku su meupiya pad ke egpatey a du te egkeuyag pad.”
4 Piru migtabak ka Magbebaye ne Manama, “Eleg naa ne igkabelu nu seini?”
5 Ne miglihawang e si Hunas te siyudad wey miggendiye te dapit te igsile te siyudad wey diye migpinpinnuu. Migleleeb sikandin wey miggelung dutu ka egtetahad ke nekey ka egtamanan te Ninibi.
6 Ne dutu, migpatubu ka Magbebaye ne Manama te sabeka ne pinamula ne egpakatimpa ki Hunas eyew egkaralungan sikandin. Nahale amana si Hunas tenged te pinamula.
7 Piru te egkasi-si e ka kaliwaswasan, migpeuyan ka Manama te uled ne deisek ne migketket te pinamula, sikan naa ka nalanes e seini.
8 Te migsile e ka aldew, migpeuyan e man‑e ka Manama te meinit ne kalamag puun te igsile. Napangkag ka ulu ni Hunas te aldew wey natabeleg sikandin. Seeye naa, egkeupian e sikandin ne egpatey ne migkahi, “Meupiya pad iya ke egpatey a du te egkeuyag e pad.”
9 Piru mig-insaan sikandin te Manama, “Eleg naa ne igkabelu nu ka intamanan te pinamula?”
Ne migtabak si Hunas, “Uya, eleg iya ne igkabelu ku sika. Sikan naa, meupiya pad ke egpatey ad e.”
10 Ne migkahi ka Magbebaye ne Manama, “Neyimenawan ka te pinamula ne ware nu ikalasey, wey kene ne sikeykew ka migpatulin kayi. Migtubu seini wey migpatey te senge-karusileman de.
11 Ne iyan e naan pa iya kene meyid‑u te Ninibi, ka dakel ne siyudad ne due subla te 120,000 ne me etew ne ware pad nakanengneng te mareet wey meupiya, wey te sesalihi ne me ayam dan?”