12
Ka peg-inse ni Hirimiyas te Magbebaye
1 “He Magbebaye ne Manama, layun iya mule ne eleg
ka peggukum nu ke due kasu ne igpangananey ku keykew.
Piru due igkeupii ku ne ig-inse meyitenged te eleg ne peggukum.
Mania te egmatubung ka me etew ne maddeet se hinimuwan?
Mania te egmanlampus ka me etew ne ubaten?
2 Impanalanginan nu sikandan iling te me kayu ne impamula nu.
Migderalid sikandan, migtulin wey migpamehas.
Meupiya layun ka egmanlalahen dan meyitenged keykew,
piru mariyu ka me pusung dan keykew.
3 Piru nakanengneng ka keddiey, he Magbebaye;
nakita nu ke nekey ka himu ku,
wey nakanengneng ka ke immenu ku sikeykew te eggeyinawa.
Ganuya nu seini se me etew iling te me karniru ne mahaan e eggimatayi.
Andama nu sikandan para te timpu ne eggimatayan e sikandan.
4 Ken‑u pad egkataman ka gulabung,
wey ka egkaggangu ne me hilamunen diye te me kamet?
Egpatey e ka me mananap wey me manuk-manuk
puun te maddeet ne himu te me etew ne mig-ugpe te seini ne inged.
Migkahi sikandan, ‘Ware mig-amung-amung ka Magbebaye te egkeumaan ta.’ ”
5 Ne migkahi ka Magbebaye,
“Hirimiyas, ke nabeley kad ka eglumba te me etew,
egmenuwen nu naa te eglumba te me kudde?
Emun ke egpakarugsu ka diye te maawang,
nekey naan e ka eggimuwen nu ke diye kad te makepal ne puwalas ne marani te Weyig ne Hurdan?
6 Ne migdereet e keykew minsan ka me suled nu ne me lukes ne sakup te pamilya nu;
migduma sikandan te eglusud keykew.
Kene ka salig kandan, minsan pad meupiya ka eglalahen dan keykew.”
Ka peglungku te Magbebaye tenged te keet-etawan din
7 Ne migkahi pad man‑e ka Magbebaye,
“Mig-engkeran kud ka keet-etawan ku.
Mig-inniyuhan kud ka nasud ne in-alam ku.
Imbehey kud ka keet-etawan ne inggeyinawaan ku
diye te me kuntere dan.
8 Migsukul e keddiey ka keet-etawan ne in-alam ku,
egginihel sikandan keddiey
iling te liyun diye te puwalas,
sikan naa ka igkatameneng kud e sikandan.
9 Egpekeiling te bayaku ka in-alam ku ne keet-etawan
ne eglilibangan egdawiya te me banug.
Panlibulunga niyu ka langun ne mahintalunan ne mananap
eyew egkeen kandan.
10 Masulug ka me pangulu ne migdereet te keet-etawan ku, ka in-isip ku ne parasan ku.
Indi-diekan dan ka kamet ku
wey inggimu ran e ne disirtu ka tetelesi ne tane ku.
11 Inggimu ran e seini ne mareet ne inged
wey warad e karuan kayi te tangkaan ku.
Neyimu e ne disirtu ka intiru ne nasud,
piru imbebalahad dan de iya.
12 Nekeume e te langun ne bubungan te disirtu
ka me kuntere ne egdereet.
Impalusuran ku te me kuntere
ka intiru ne nasud eyew egkareetan e seini
wey ware iya egpakapallahuy kandan.
13 Migpamula te trigu ka keet-etawan ku, piru balunseri de iya ka nahaani ran;
miglasey-lasey sikandan migbasuk piru warad iya nahaani ran.
Miggaani sikandan te pegkeyilew,
tenged te mangune-kune ne langet ku.”
Ka inlalag te Manama meyitenged te me nasud ne nakalingut te Israil
14 Ne migkahi pad man‑e ka Magbebaye, “Seini ka eggimuwen ku te langun ne maddeet ne nasud ne nakalingut te Israil ne migdereet te inged ne imbehey ku te keet-etawan ku isip egkapanunud dan: Egpandeldelen ku sikandan puun te nasud dan, iling te pegdeldel ku te me matig-Huda puun te inged dan.
15 Piru pegkapenga rue, eggeyinawaan ku red man‑e sikandan langun, wey iglibed ku red ka tagse sabeka kandan diye te nasud dan.
16 Ne emun ke egsimbeen a nikandan te intiru ne pusung dan, iling te inggimu te keet-etawan ku wey ke egsaad naa sikandan pinaahi te ngaran ku, iling te pegpanulu dan dengan te keet-etawan ku ne egsaad pinaahi te ngaran ni Baal, egkeyimu degma sikandan ne duma te keet-etawan ku wey egmatubung sikandan.
17 Piru emun ke due nasud ne kene egtuman keddiey, egtamtamanan kud sikandan egdereeti. Sikeddiey se Magbebaye ne Manama ka miglalag kayi.”