13
Impabeli te Magbebaye si Hirimiyas te iling te hamit
1 Ne impanengneng a te Magbebaye ne Manama te migkahi, “Hipanew ka wey beli ka te egpekeiling te hamit wey isaluub nu seini. Piru kene nu seini pi‑pii.”
2 Purisu migbeli ad en iya te egpekeiling te hamit sumale te ingkahi te Magbebaye ne Manama wey insaluub kud e.
3 Nataman, ingkahiyan ad e man‑e te Magbebaye,
4 “Hendiye ka te Weyig ne Iyupratis. Luunga nu ka egpekeiling te hamit ne imbeli nu wey iheles nu seini diye te lungag te batu.”
5 Sikan naa ka miggendiya ad en iya wey inggeles kud e seeye sumale te insuhu keddiey te Magbebaye.
6 Te naluhey e ne timpu, ingkahiyan ad man‑e te Magbebaye, “Hendiye ka te Weyig ne Iyupratis wey kua nud ka iling te hamit ne impeeles ku keykew diye.”
7 Ne miggendiya ad en iya wey ingkuwa kud seeye diye te lungag ne inggelesan ku kayi. Piru mahebu e seini wey kenad e egkaayun ne eggamiten.
8 Ne ingkahiyan ad man‑e te Magbebaye,
9 “Eg-ilingen ku rue te egdereet ka pegkaambuhen te Huda wey ka mangune-kune ne pegkaambuhen te Hirusalim.
10 Ware migtuman keddiey seini se me etew ne maddeet se hinimuwan. Migpabulus sikandan miggimu te igkeupii ran, wey migpamakey wey migsimba sikandan te duma pad ne me diyus-diyus. Ne tenged due, egpekeiling sikandan te hamit ne kenad e egkaayun ne eggamiten.
11 Ne iling te hamit ne egpakaayad-ayad egpakakepkep te liwaraan te etew, igpaayad-ayad ku degma ipakepkep keddiey ka langun ne keet-etawan te Israil wey Huda. Inggimu ku seini eyew egkeyimu sikandan ne keet-etawan ku, wey eyew egsayeen dan wey egtahuren dan ka ngaran ku. Piru kene sikandan egpalintutuu keddiey.”
Ka tahuanan te binu
12 Ne ingkahiyan a te Magbebaye, “Hirimiyas, kahii nu ka keet-etawan te Israil te keilangan ne egpangipenuen dan te binu ka langun ne banga. Ne egtabak sikandan ne egkahi, ‘Nakataha key ne keilangan iya ne egpangipenuen te binu ka langun ne banga.’
13 Purisu kahii nu sikandan te sikeddiey ka Magbebaye, ka migkahi ne egpeinumen ku te binu ka keet-etawan te seini ne inged taman te egkengewubug sikandan—ka me Hari ne me kabuhalan ni Dabid, me talagpanubad, me prupita, wey ka langun ne keet-etawan te Hirusalim.
14 Egkataman, egmeg-eheten ku sikandan se me taltalaanak ne egpekeiling te me banga ne egkallupet. Ware eg-uyahen ku, kena a egpapitew te hid‑u ku wey ke himenew te peggimatey kandan. Sikeddiey se Magbebaye ne Manama ka miglalag kayi.”
Ka pegpaney-paney ni Hirimiyas meyitenged te pegpaambug
15 Pammineg kew, he keet-etawan te Israil, su miglalag ka Magbebaye!
Ipariralem niyu ka pegkeetew niyu, wey pammineg kew kandin.
16 Tahura niyu ka Magbebaye ne Manama niyu
te kene din pad egparelemen,
wey te kene kew pad egkasaligkat diye te marusilem ne me bubungan,
wey te kene din pad eggimuwen ne en-enengan ne delem ka kalayag ne egpallatengen niyu.
17 Emun ke kene kew iya egpalintutuu, egpakasinehew a te heles de tenged te pegkaambuhen niyu.
Egpanaman-taman ad egsinehew, wey egtulayas ka luwe ku
tenged su egpandakepen e te me kuntere ka keet-etawan te Magbebaye.
18 Ne insuhu a te Magbebaye ne egpakahiyan ka Hari duma te iney rin ne rayna te keilangan ne eg-awe e sikandan puun te trunu ran su eg-aween e puun te me ulu ran ka mateles ne me kuruna ran.
19 Inlingutan e te me kuntere ka me lungsud te Nigib wey warad e egpakalulukat kandan. Impandakep e wey immanguyan e te me kuntere ka langun ne keet-etawan te Huda.
20 He Hirusalim, pitawa nu ka me kuntere nu ne eggendini puun te igkahibang ne balabahan! Hendeid e ka keet-etawan ne impatanggu ku keykew, ka keet-etawan ne igpaambug nu?
21 Nekey‑a ka igkalalag nu ke egkeyimu e ne pangulu nu seeye se in-isip nu ne alukuy nu? Kene ke naa egkasakitan iling te malitan ne eglesutan?
22 Ne emun ke eg-inse ka, “Mania te neyitabu kayi te keddiey seini se langun?” Uya su nekeiling ka te malitan ne impehes hilabeti ne naggisi e se kumbale tenged te susuluhi ne sale nu.
23 Egkabalbalawan naan iya te meitem ne etew ka batek te laplap din, wey egkaawe naan iya te leew ne miyew ka batek din? Kene iya. Ne sikan naa ka egkeilingan niyu me matig-Hirusalim, kene kew egkaayun ne eggimu te meupiya su nalayam kew ma ne eggimu te mareet.
24 Egtalagtahen kew e te Magbebaye iling te ukaba ne eggiyupen te kalamag puun disirtu.
25 Migkahi ka Magbebaye te sika iya ka eggingumaan niyu, ka kulis ne intahahe din para kaniyu su inlingawan niyu ma sikandin, wey migsalig kew e te ubat ne me diyus-diyus.
26 Ne ka Magbebaye en iya ka egluung te me kumbale niyu eyew egkeyilawan kew.
27 Nakita rin ka mallindit ne me himu niyu, wey nakita kew nikandin ka migsimba te me diyus-diyus diye te me bubungan wey diye te me kamet. Nekeiling kew e te malitan ne migpanlibug ne amana ne balinggeren wey ke malitan naa ne egpamelegye te lawa. Mekeyid‑u-hid‑u kew keet-etawan te Hirusalim! Ken‑u kew naan pad egmalinis man‑e?