15
Ka karereetan te keet-etawan te Huda
1 Ne ingkahiyan a te Magbebaye ne Manama, “Minsan pad ke egsasindeg si Muwisis wey si Samwil kayi te tangkaan ku ka egpeyimmimenew keddiey para te seini ne me etew, kena a iya egkeyimenawan kandan. Purisu paawaa niyud sikandan! Ipariyu niyu sikandan kayi te tangkaan ku!
2 Ne emun ke eg-inse sikandan ke hendei sikandan egpabulus, kahii niyu sikandan te seini ka inlalag ku:
Seeye se iyan kulis se egpatey te dalu,
egpatey iya te dalu!
Seeye se iyan kulis se egpatey te gira,
egpatey iya te gira!
Seeye se iyan kulis se egpatey te gutas,
egpatey iya te gutas!
Seeye se iyan kulis se egkarakep,
egkarakep iya!
3 Ne egpeuyanan ku sikandan te hep‑at ne klasi ne egdereet kandan: Egkengammatey sikandan te gira, wey egmangganuyen te me asu ka me lawa ran. Egmangeenen sikandan te me bayaku, wey egmangeenen te mahintalunan ne me mananap ka egkengasame.
4 Eggimuwen ku seini ne makaaldek-haldek diye te langun ne migharian te kalibutan, tenged te inggimu te anak ni Isikiyas ne si Manasis diye te Hirusalim te sikandin pad ka Hari diye te Huda.”
5 Ne migkahi pad man‑e ka Magbebaye,
“He keet-etawan te Hirusalim, hentew naan de iya ka egkeyid‑u kaniyu,
wey hentew naan e ka eglungku para kaniyu?
Hentew naan e ka egpakasuman-suman
ne eg-inse ke nekey kew naan e?
6 In-engkeran ad nikaniyu,
wey mig-inniyug kew e keddiey.
Sikan naa ka egdereetan kud sikaniyu pinaahi te geem ku
su napelaan ad ka layun egpasaylu kaniyu.
7 Eglegparan kud sikaniyu diye te me gumawan te siyudad,
egtalagtahen kud sikaniyu iling te usangen ne eglayap te kalamag.
Egdereetan kud sikaniyu wey ka me anak niyu,
su ware niyu ma engkeri ka mareet ne me himu niyu.
8 Egpamasuluhen ku pad ka me balu ne malitan kayi te inged niyu
du te me pantad te dahat.
Impangimatayan kud ka me kanakan niyu,
purisu mig-antus amana ka me iney ran.
Ne sahuhune ne egginguma kandan
ka peglungku wey pegkaaldek.
9 Ne egpalumbibigtew e ka iney wey kenad egpakageheyinawa
ne egpatayan te pitu ne me anak.
Egkeyimu e ne kasuhayan ka peg-iman-iman din,
iling te aldew ne eglineb e te meudtu pad.
Egkeyilawan iya sikandin wey eglungku.
Ne egpeyimatayan ku te me kuntere niyu
ka me duma niyu ne manekal pad.
Sikeddiey se Magbebaye ne Manama ka miglalag kayi.”
Ka pegsagsahukul ni Hirimiyas te Magbebaye
10 Mekeyid‑u-hid‑u naan de iya ka egkeula-ula ku! Ware e lad perem uyaha te iney ku kayi te kalibutan! Egkuntere en ad te intiru ne Huda. Ware ma perem neutangan ku wey ke impeutang ku naa, piru indilus a nikandan langun.
11 He Magbebaye, egkatuman ka pegdilus dan keddiey ke wara a mig-ayad-ayad migpamakey keykew, wey ke ware e naa mig-ampu keykew para te me kuntere ku te timpu ne miglised wey miglungku sikandan.
12 Ware etew ne egpakatempug te putew, labi e ka putew ne egpuun te igkahibang ne balabahan ne insewuhan te burunsi.
13 Ne ingkahiyan a te Magbebaye, “Egpeuyan a te me kuntere ne egpangahew te me karatuan wey me kasangkapan te keet-etawan ku isip legpad tenged te me sale ne inggimu ran te intiru ne nasud dan.
14 Igmeuripen kud sikandan te me kuntere dan diye te inged ne ware dan nanengnengi. Igpeula-ula kud kandan ka langet ku ne iling te egkanlabkanlab ne hapuy ne kene egkataman.”
15 Ne migtabak a, “He Magbebaye, nakanengneng ka te langun ne neyitabu keddiey! Sumsumana a ubag wey bulihi a nikeykew. Sulii nu ka migbayad-bayad keddiey. Kena a ubag balahara ne eggimatayan dan. Sumsumana nu ne indeeg-deeg a nikandan tenged keykew.
16 Migpakiglalag ka keddiey, wey migpammineg a keykew, he Amana ne Maresen ne Manama, tenged su keykew ma ka umul ku. Nakapahale keddiey ka me lalag nu.
17 Wara a mig-apil-apil te duma ne etew ne mig-am-amana miggale-gale. Ne tenged te pegtuman ku te suhu nu, nakasabsabeke e naan de iya wey nabelu-belu tenged te mareet ne hinimuwan dan.
18 Ne mania te ware katamanan te peg-antus ku? Mania te kene egkeulian ka me pali ku? Egbalaharen e buwad iya nikeykew, iling te beuhan ne egkeetiyan te timpu te gulabung?”
19 Ne migtabak ka Magbebaye, “Emun ke eg-inniyug ka te me sale nu, egdawaten ku sikeykew wey eggimuwen kud man‑e sikeykew ne suluhuanen ku. Emun ke iyan nu igpangguhud ka due karuan ne me guhuren, kene ne seeye se ware karuan, eggimuwen kud man‑e sikeykew ne prupita ku. Ne eglibed ka me etew due te keykew, wey kene ne sikeykew ka egparani kandan.
20 Ne eglig‑enen ku sikeykew iling te burunsi ne alad ne egpekeelet te seini ne me etew. Egpakig-ehet sikandan keykew piru kene ka egkatalu nikandan, su egdumaan ku ma sikeykew wey egbulihan.
21 Ne egluwasen ku sikeykew puun te geem te maddeet wey mabbulut ne me etew. Sikeddiey se Magbebaye ne Manama ka miglalag kayi.”