16
Kene egpaasaween te Magbebaye si Hirimiyas
1 Ne impanengneng ad e man‑e te Magbebaye ne Manama,
2 “Kene ka asawa wey ke eanak naa kayi te seini ne inged.
3 Eglalahan ku sikeykew ke nekey ka egkeyitabu te me bate ne egkeetew te seini ne inged wey te me amey wey iney ran.
4 Egpatey sikandan te mangune-kune ne dalu, wey warad e eglungku wey ke eglebeng naa kandan. Ne egpekeiling e te tei ka me lawa ran ne egkengatalagtag diye te tane. Egpatey sikandan te gira wey gutas, wey egmangeenen e te me manuk-manuk wey te mahintalunan ne me mananap ka me lawa ran.”
5 Ne migpabulus ka Magbebaye ne migkahi, “Kene ka seled te baley ne due egderamag. Kene ka lungku duma kandan, wey kene ka papitew te himenew nu kandan su in-awe kud ka himenew ku, geyinawa ne kene egkabalbalawan, wey hid‑u ku te seini ne me etew.
6 Egpatey iya ka langun ne etew te seini ne inged, meyaman ma wey ke egkaayu-ayu. Piru warad e eglungku kandan wey ke eglebeng naa. Ne warad e egpamali-pali te lawa ran wey ke egpatabulug naa te pegpapitew te peglungku dan.
7 Ware egbehey te egkakeen wey ke egkeinum naa te etew ne impatayan eyew te pegliwang kandan te miglungku. Ware egpakita te himenew kandan minsan pad ke amey ran wey ke iney ran naa ka migpatey.
8 “Ne kene ka seled te baley ne due egsahakeen. Kene ka pinnuu eyew egkeen wey eg-inum duma kandan.
9 Su sikeddiey ka Amana ne Maresen ne Magbebaye ne Manama te Israil ka egkahi, ‘Egtamanen kud ka kahalaan te seini ne inged, minsan ka pegsahakeen te egmaas-asaweey. Ne egmakakita kayi ka keet-etawan te seini ne nasud.’
10 “Ne emun ke iglalag nu seini langun kandan, eg-inse e sikandan ke mania te eg-amanaan ku eglegpari sikandan, wey ke nekey ka sale ne neyimu ran keddi te Magbebaye dan.
11 Ne kahii nu sikandan te migkahi a se Magbebaye dan, ‘Mig-inniyuhan a te me kaap-apuan niyu. Migsimba sikandan wey migpamakey te me diyus-diyus. In-engkeran ad nikandan wey ware dan e tumana ka balaud ku.
12 Piru subla pad ne maddeet ka hinimuwan niyu du te me hinimuwan te me kaap-apuan niyu. Memakehal ka me ulu niyu langun, in-ikul niyu ka maddeet ne igkengeupii niyu, wey kene kew egpalintutuu keddiey.
13 Sikan naa ka egdeldelen kud sikaniyu puun te seini ne inged peendiye te inged ne ware niyu nanengnengi wey te me kaap-apuan niyu. Ne diye, egpamakey kew e te me diyus-diyus tagse aldew wey marusilem, wey kena ad e egkeyid‑u kaniyu.’ ”
Ka peglibed puun te pegkarakep
14 Ne migkahi pad man‑e ka Magbebaye, “Egginguma ka timpu ne kenad e egsaad ka me etew ne egkahi, ‘Igsaad ku te ware egpatayan ne Magbebaye ne Manama ne iyan migpalihawang te me Israilita puun te Ihiptu.’
15 Ke kene, egkahi e sikandan ka egsaad, ‘Igsaad ku te ware egpatayan ne Magbebaye ne Manama ne iyan migpalihawang te me Israilita puun te igkahibang ne balabahan, wey te langun ne nasud ne intalagtahan din kandan.’ Tenged su igpalibed ku red sikandan diye te inged ne imbehey ku te me kaap-apuan dan. Sikeddiey se Magbebaye ne Manama ka miglalag kayi.”
Ka egginguma ne legpad
16 Ne migpabulus ka Magbebaye ne migkahi, “Egpeuyan a te masulug ne talagngengalap eyew egpandakep te seini ne me etew. Ne egpeuyan a degma te masulug ne talagpanganup eyew egpanganup kandan diye te me bubungan, labuntud, wey diye te me sulung.
17 Nakita ku ka langun ne hinimuwan dan. Ware igpekeeles keddiey. Natahaan ku ka langun ne sale dan.
18 Egpabayaren ku sikandan te daruwa ne lupi tenged te me sale dan, wey te mareet ne hinimuwan dan, su inlinditan dan ma ka tane ku pinaahi te me diyus-diyus dan ne ware umul, wey in-empet dan te me diyus-diyus ka inged ne imbehey ku kandan.”
Ka mapahetpet ne peg-ampu ni Hirimiyas
19 Ne mig-ampu si Hirimiyas ne migkahi, “Magbebaye, sikeykew ka migduma keddiey wey ka migbehey keddiey te kanekal. Aputanan ku sikeykew te timpu te kalised. Egparani keykew ka me etew ne egpuun te maddiyu ne inged te kalibutan wey egkahi, ‘Ware me karuan wey mallehet te me diyus-diyus te me kaap-apuan ney.
20 Egpekeyimu bes naa ka me etew te magbebaye dan? Kene iya! Ne emun ke egpekeyimu ma sikandan, kene iya sika ne malehet ne magbebaye.’ ”
21 Ne migkahi ka Magbebaye, “Purisu, igpakita kud kandan ka geem wey karesen ku eyew egpekeila sikandan ne sikeddiey ka Magbebaye ne Manama.”