22
Ka lalag ni Hirimiyas te pamilya te Hari te Huda
1 Ne ingkahiyan a te Magbebaye ne Manama, “Hendiye ka te Hari te Huda, diye te palasyu rin wey kahii nu sikandin,
2 ‘He Hari te Huda ne kabuhalan ni Dabid, sikeykew wey ka me suluhuanen nu wey ka langun ne keet-etawan nu ne egmaneled-seled te me gumawan te seini ne palasyu, pammineha niyu seini se lalag te Magbebaye:
3 Himuwa niyu ka eleg ne peggukum wey matareng. Pangabangi niyu seeye se egmanakawan puun te seeye se egmanleig-leig kandan. Kene niyu le-leiha ka me lapu, me ilu, wey ka me balu ne malitan, wey kene niyu himatayi ka me etew ne ware sale kayi te seini ne inged.
4 Emun ke egtumanen niyu seini se insuhu ku, egpabulus eghari ka me kabuhalan ni Dabid. Egpabulus sikandan duma te me upisyal wey me etew ran ka egseled te me gumawan te seini ne palasyu ne egpanguntud te me karwahi wey me kudde dan.
5 Piru ke kene niyu egtumanen ka me suhu ku, egpahunlibet a te pegkeetew ku ne egkareetan iya seini se palasyu. Sikeddiey se Magbebaye ne Manama ka miglalag kayi.’ ”
6 Ne migkahi pad man‑e ka Magbebaye meyitenged te palasyu te Hari te Huda, “Mateles ka palasyu te Huda iling te me Puwalas te Gilyad, wey te puntul te Bubungan te Libanun. Piru eggimuwen kud seini ne disirtu wey iling te siyudad ne ware mahinged.
7 Igpahuhus ku te me etew ka palasyu. Egpanguyan sikandan langun te me wasey, wey egpanempuhen dan e ka me mateles ne sungkaleg ne sidar, wey egpanilaban dan e seini.”
8 Ne migkahi pad man‑e ka Magbebaye, “Ne ka me etew ne egmanlihad puun te nalein-lein ne me nasud, egmein-inseey ke mania te inggimu ku seini kayi te mabantug ne siyudad.
9 Ne egkahi sikandan, ‘Tenged su ware dan tumana ka kasabutan dan te Magbebaye ne Manama ran. Migsimba sikandan wey migpamakey te me diyus-diyus.’ ”
Ka lalag ni Hirimiyas meyitenged ki Huwakas
10 He keet-etawan te Huda, kene niyu sinehawi si Hari Husiyas.
Kene kew lungku te pegpatey rin.
Ke kene, pataman-taman kew sinehew para ki Huwakas, ne anak din,
su narakep e sikandin, wey kenad e sikandin egpekeuli,
wey kenad e egpakakita te inged ne neetawan din.
11 Su migkahi ka Magbebaye meyitenged ki Huwakas, ka migsubal te amey rin ne Hari te Huda, “Warad e sikandin te seini ne inged, wey kenad e sikandin egpakalibed.
12 Diyad e sikandin egpatey te nasud ne imprisuwan kandin, wey kenad e sikandin egpakakita te seini ne inged.”
Ka lalag ni Hirimiyas meyitenged ki Huwakim
13 Mekeyid‑u-hid‑u ka egkeyitabu te etew ne migpeyimu te palasyu rin te mareet ne paahi,
wey migsusumpul te me sinabeng pinaahi te pegpanlimbung.
Impatrabahu rin ka keet-etawan din ne ware suul.
14 Makabbayad ka egkeyitabu kandin te migkahi,
“Eggimu a te bubuyahen ne palasyu
ne due malluag ne sinabeng diye te dibabew.
Eggimuwan ku seini te malluag ne bintana,
eg-alabatan te sidar,
wey egbatekan ku seini te malalab.”
15 Kahiyen nu buwa ne sikeykew e ka mabantug ne Hari
ke eggimu ka te tetelesi ne palasyu puun te sidar?
Matubung ded degma dengan te egkakeen wey egkeinum ka amey nu,
piru inggimu rin mule ka eleg ne peggukum wey matareng,
sikan naa ka miglampus sikandin te langun ne inggimu rin.
16 Impangabangan din ka egkengaayu-ayu,
sikan naa ka meupiya ka peghari din.
Sika ka igpasabut te pegpamakey te Magbebaye.
17 Piru iyan nu re mule insuman-suman ka pegpanlimbung.
Impangimatayan nu ka me etew ne ware sale
wey intamtamanan nu le-leiha ka me etew nu.
Ka Magbebaye ne Manama ka miglalag kayi.
18 Purisu migkahi ka Magbebaye meyitenged te anak ni Husiyas ne si Huwakim ne Hari te Huda,
“Ware eglungku kandin ke egpatey e sikandin,
wey ke egkahi naa, ‘Keyid‑u te suled ku!’
Ne ware man‑e egsinehew wey ke egdeg-uy naa ne egkahi,
‘Keyid‑u te ahalen ku ne Hari!’
19 Egpekeiling de sikandin te asnu ne iglebeng.
Egganuyen de ka lawa rin wey igdegpak diye te lihawangan te me gumawan te Hirusalim.”
Ka lalag ni Hirimiyas meyitenged te egpangkusan te Hirusalim
20 Keet-etawan te Hirusalim, hendiye kew te Libanun wey panguleyi kew,
paninehew kew diye te inged te Basan wey diye te me bubungan te Abarim
su natalu e ka langun ne eglapig kaniyu.
21 Impanpanayan kud sikaniyu te matubung pad ka peg-ugpe niyu.
Piru ware kew migpammineg keddiey
iling te inggimu niyu puun te me bate kew pad.
Kene kew iya egpalintutuu keddiey.
22 Egtalagtahen ku ka langun ne pangulu niyu,
wey egpandakepen ka langun ne eglapig kaniyu.
Egkengeyilawan kew iya
tenged te langun ne maddeet ne hinimuwan niyu.
23 Sikaniyu se nangugpe te palasyu ne inggimu puun te kayu ne sidar te Libanun,
mekeyimmimenew kew ke eggingume e ka masakit
iling kasakit te eggeramen te malitan ne egpalelesut.
Ka peggukum te Manama ki Huwakin
24 Ne migkahi ka Magbebaye ne Manama ki Huwakin ne anak ni Huwakim, ne Hari te Huda, “Sikeddiey se manakel ne Manama, egpahunlibet a ne minsan pad ke sikeykew ka tuus te katenged ku, eg-awaan ku iya sikeykew te sika ne katenged.
25 Igbehey kud sikeykew diye te me etew ne igkaaldek nu wey te me etew ne egkeupian ne eggimatey keykew. Igbehey kud sikeykew ki Nibukadnisar ne Hari te Babilunya wey diye te me sundalu rin.
26 Igparakep kud sikeykew wey ka iney nu peendiye te inged ne ware niyu neetawi, wey diye kew e egpatey.
27 Ne kene kew e egpakalibed kayi te inged ne egtantanuran niyu.”
28 Ne migkahi a, “Huwakin, nekeiling ka te napese ne kuren ne tane ne indegpak e su warad e karuan. Sika ka egpuunan ne egdakepen ka wey ka me anak nu diye te inged ne ware niyu nanengnengi.”
29 He nasud te Huda, nasud te Huda, nasud te Huda!
Pammineg ka te inlalag te Magbebaye ne migkahi,
30 “Ilista niyu ne ware anak ni Huwakin,
wey kenad iya sikandin eglampus.
Ware kabuhalan din
ne egsubal egpinnuu te trunu ni Dabid
eyew egmandu te Huda. Sikeddiey se Magbebaye ne Manama ka miglalag kayi.”