23
Ka egkapallateng
1-2 Ne migkahi ka Magbebaye ne Manama te Israil, “Mekeyid‑u-hid‑u kew se me pangulu te keet-etawan ku! Iling kew perem te talagtameng te karniru ne egtanggu te keet-etawan ku, piru imbalahad niyu sikandan ne egpatey wey egkatalagtag. Ne tenged su imbalahad niyu ma sikandan ne egkatalagtag wey ware niyu tangguwa, eglegparan ku sikaniyu tenged te mareet ne inggimu niyu.
3 Ne egkataman, eglibulungen ku red ka nenasame ne keet-etawan ku puun te me nasud ne intalagtahan ku kandan, wey igpalibed ku red sikandan diye te inged dan. Ne egkengabuhal sikandan diye, wey egmasulug e man‑e.
4 Ne egbehayan ku sikandan te me pangulu ne egtanggu kandan. Ne kenad sikandan egkengaaldek wey egkabantalan, wey warad e egkalaag kandan.
5 Egginguma ka timpu ne egpaharien ku ka matareng ne Hari ne kabuhalan ni Dabid. Eghari sikandin ne due katagseb, wey eggimuwen din ka matareng wey eleg ne peggukum te intiru ne inged.
6 Ne emun ke eghari e sikandin, egkaluwas ka Huda wey egmeupiya ka peg-ugpe te keet-etawan te Israil. Egngaranan sikandin te ‘Ka Magbebaye ne egbehey kanta te eleg ne peggukum’.
7 “Te sika ne timpu, kenad e egsaad ka me etew ne egkahi, ‘Egsaad a te manekal ne Manama ne iyan migpalihawang te me Israilita puun te Ihiptu.’
8 Ke kene, egsaad e sikandan ne egkahi, ‘Egsaad a te manekal ne Manama ne iyan migpalihawang te me kabuhalan ni Israil puun te nasud te igkahibang ne balabahan, wey te langun ne nasud ne intalagtahan din kandan.’ Ne eg-ugpe e sikandan te inged dan. Sikeddiey se Magbebaye ne Manama ka miglalag kayi.”
Ka lalag ni Hirimiyas meyitenged te me prupita
9 Hendue te ingkeles ka pusung ku,
tenged te kene ne mallehet ne prupita.
Impangelkel ad,
wey egpekeiling ad te newubug
ne migpanaman-taman mig-inum te binu
tenged te inlalag te Magbebaye meyitenged kandan.
10 Su nekeempet e te inged ka me etew ne migsimba te me diyus-diyus.
Maddeet ka me himu te me prupita,
inggamit dan te mareet ka katenged dan.
Ne tenged te pegdilus te Magbebaye, miglungku e ka inged
wey nallanes e ka me patabtaban.
11 Ne migkahi ka Magbebaye,
“Nenekeg-iling de iya ne makasesale ka me talagpanubad wey ka me prupita.
Nakita ku sikandan ka egmangimu te maddeet minsan diye te timplu.
12 Sikan naa ka egmalurek wey egmarusilem e ka dalan dan.
Egkasaligkat sikandan wey egmakalangkeb
su igpasalerep ku ma sikandan te karereetan
te timpu ne eglegparan kud sikandan.
Sikeddiey se Magbebaye ne Manama ka miglalag kayi.”
13 Migkahi pad man‑e ka Magbebaye,
“Nakita ku ka amana ne maddeet ne hinimuwan te me prupita te Samarya.
Migpanagne sikandan te ngaran ni Baal
wey sikandan ka nakapanulud te keet-etawan ku ne me Israilita ne eggimu te mareet.
14 Piru nakita ku ne subla pad ne maddeet ka hinimuwan te me prupita te Hirusalim.
Migsimba sikandan te me diyus-diyus
wey egmanguubat pad man‑e.
Imbagget dan ka me etew ne eggimu te mareet,
sikan naa ka kenad e egkataman ka maddeet ne himu te me etew.
Para keddi, nekeiling e kareet ka keet-etawan te Hirusalim
te keet-etawan te Suduma wey Gumura.
15 “Purisu sikeddiey se Amana ne Maresen ne Manama, egkahi a meyitenged te me prupita te Hirusalim:
Egpakeenen ku sikandan te me mapeit ne egkakeen,
wey egpeinumen ku sikandan te weyig ne due eggilu.
Su tenged kandan, warad e egpalintutuu keddi kayi te intiru ne inged.”
16 Ne migkahi pad man‑e ka Amana ne Maresen ne Magbebaye diye te keet-etawan te Hirusalim, “Kene kew pammineg te me prupita su ubat ka egmanlalahen dan kaniyu wey egpekeindakel kew re ka egpallateng. Puun de te me suman-suman dan ka egmanlalahen dan kaniyu, wey kene ne puun keddiey.
17 Iyan dan iglalag layun te me etew ne kene egpammineg te lalag ku wey te me etew ne makehal se ulu ne egmeupiya kun ka peg-ugpe dan, wey ware karereetan ne egginguma kandan.”
18 Ne migpabulus ka Magbebaye ne migkahi, “Piru ware minsan sabeka te seini ne me prupita ne migparani keddi eyew egnengneng te suman-suman ku. Ware minsan sabeka kandan ne migpammineg wey ke miglinga-linga naa te inlalag ku.
19 Pammineg kew! Iling ka langet ku te bagyu wey ke balisusu naa ne egpakasuhat te ulu te maddeet ne me etew.
20 Kene iya egkabewu ka langet ku taman te egkeimpusan ku ka igkeupii ku ne eggimuwen. Egkaay-ayaran niyu red seini egkasabut te egginguma ne me timpu.
21 “Ware ku suhua ka me prupita, piru miggaan-gaan iya sikandan nangipanew. Wara a migpakiglalag kandan, piru migpanagne iya sikandan.
22 Piru ke nakataha sikandan te suman-suman ku, impangguhuran dan e perem te malehet ne lalag ku ka keet-etawan ku wey impeengked dan e perem sikandan te maddeet ne me batasan wey me himu ran.”
23 Ne migkahi pad man‑e ka Magbebaye, “Manama a te minsan hendei wey kene te sabeka re ne inged.
24 Ware etew ne egpekeeles keddiey minsan hendei. Ware kew bes nakataha ne diya a te langun ne inged te langit wey te tane?
25 Narineg ku ka ubat ne impanlalag te me prupita pinaahi te ngaran ku. Migkahi sikandan te migpakiglalag e kun kandan pinaahi te me taheinep dan.
26 Ken‑u naan pad mule egkataman ka me prupita ne egpanagne te ubat ne egpuun te me suman-suman dan ne limbungen?
27 Migsuman-suman sikandan ne ka igpanlalag dan ne me taheinep, egpakapalingew te keet-etawan ku keddiey. Iling te kaap-apuan dan ne nalingew keddiey wey migsimbe e ki Baal.
28 Balahara niyu re ka me prupita ne egpangguhud te me taheinep dan. Piru ka me prupita ne egpakarineg te lalag ku, keilangan ne egtumanen dan sika wey igguhud dan. Su lein ka taheinep dan te lalag ku, iling te lahami ne lein de iya du te trigu.
29 Egpekeiling te egkanlabkanlab ne hapuy ka me lalag ku wey te buntuk ne egpakalupet te batu.
30 Kuntere ku ka me prupita ne eg-iling-iling te lalag te duma ne me prupita, wey egkahi te egpuun kun keddi ka inlalag dan.
31 Kuntere ku man‑e ka me prupita ne egpangguhud te kandan de ne lalag, wey egkahi te sikeddi kun ka miglalag due.
32 Kuntere ku man‑e ka me prupita ne egpangguhud te me taheinep dan ne ubat. Impepalintutuu ran ka keet-etawan ku te ubat. Ware ku ipeuyan sikandan wey ke insuhu naa. Warad iya igkabulig dan te keet-etawan. Sikeddiey se Magbebaye ne Manama ka miglalag kayi.”
Ka kene ne malehet ne prupita
33 Ne ingkahiyan a te Magbebaye, “Hirimiyas, emun ke eg-inse keykew ka seini ne me etew, wey ke me prupita naa, wey ke me talagpanubad naa, ke nekey ka inlalag ku keykew, kahii nu sikandan te eg-inniyuhan kud e sikandan.
34 Ke due prupita wey ke talagpanubad naa wey ke minsan hentew ne egkahi te due lalag din ne egpuun keddiey, eglegparan ku sikandin wey ka pamilya rin.
35 Meupiya pad ke egmein-inseey kew te me alukuy niyu wey te me suled niyu ke nekey ka tabak ku wey ke inlalag ku naa.
36 Du te egkahi kew, ‘Due eglalahen ku ne egpuun te Manama!’ Kene kew e lalag te iling due su inlalag e sika te duma eyew egpalintutuuwen ka eglalahen dan. Ne tenged due, nabalbalawan e ka me lalag te manekal ne Manama, ka Amana ne Maresen ne Magbebaye ne Manama ta.
37 Ilinga niyu kayi te eg-inse te prupita: ‘Nekey‑a ka tabak te Magbebaye’ wey ke ‘Nekey‑a ka inlalag te Magbebaye?’
38 Piru ke seini ka eglalahen niyu, ‘Egpuun te Manama ka panagne’ egkahiyan ku sikaniyu, tenged su migkahi kew ma te ‘egpuun te Manama ka panagne’ minsan ke impanpanayan kud sikaniyu te kene eglalag te iling due,
39 eglingawan kud sikaniyu. Egpaaween kud e sikaniyu kayi te tangkaan ku, wey eg-engkeran kud seini se siyudad te Hirusalim ne imbehey ku te me kaap-apuan niyu.
40 Igpasalerep kud sikaniyu te pegkeyilew ne ware egtamanan, wey pegdali-di ne kene egkalingawan.”