24
Ka daruwa ne leban ne behas te iggira
1 Ne indakep ni Nibukadnisar ne Hari te Babilunya ka anak ni Huwakim ne si Huwakin ne Hari te Huda. In-uyan sikandin diye te Babilunya lagkes ka me upisyal rin, mangngateu ne me panday, wey me trabahanti rin. Pegkapenga dutu, due impakita te Magbebaye ne Manama keddi ne daruwa ne leban ne behas te iggira diye te tangkaan te timplu.
2 Ka an-anayan ne leban, intahuan te memeupiya wey memeyinug ne behas te iggira. Piru ka igkarangeb ne leban, intahuan te maddeet wey kenad e egkengakeen ne behas te iggira.
3 Ne ingkahiyan a te Magbebaye, “Hirimiyas, nekey ka nakita nu?”
Ne migtabak a, “Behas te me iggira. Memeupiya ka duma, piru maddeet ka duma wey kenad e egkakeen.”
4 Ne impanengneng ad e man‑e te Magbebaye,
5 “Egkahi a se Magbebaye ne Manama te Israil te eg-isipen ku ne iling te me mateles ne behas te iggira ka me Israilita ne immarakep ku wey immeuyan diye te Babilunya.
6 Egtamengan ku sikandan wey egtangguwen, wey igpalibed ku sikandan te seini ne inged. Egmatubungen ku sikandan, wey kene ku sikandan eglegparan. Igpamula ku sikandan iling te pinamula wey kene ku sikandan egbaruten.
7 Ne egbehayan ku sikandan te kabagget ne eg-ila keddiey te Manama ran. Egkeyimu sikandan ne keet-etawan ku, wey egkeyimu a ne Manama ran su eglibed man e sikandan kayi te keddiey te intiru ne pusung dan.
8 “Piru si Sidikiyas ne Hari te Huda, eg-isipen ku ne iling sikandin te mareet ne behas te me iggira ne kene egkakeen, wey ka me upisyal rin, lagkes ka me Israilita ne nasame kayi te Hirusalim wey seeye se diye nangugpe te Ihiptu.
9 Igpasalerep ku sikandan te karereetan wey egkaaldek ka keet-etawan te langun ne migharian te kalibutan ne egpakakita kayi. Ne egtetampeleen e sikandan wey egderali-dian te me etew. Eggimuwen sikandan ne panunggilingan te kareet wey pegdilus diye te me inged ne egdeldelan ku kandan.
10 Igpasalerep ku sikandan te gira, gutas, wey dalu taman te warad egkasame kandan kayi te tane ne imbehey ku kandan wey te me kaap-apuan dan.”