31
Ka peg-uli te keet-etawan te Israil
1 Ne migpabulus ka Magbebaye ne Manama ne migkahi, “Te sika ne timpu, egkeyimu a ne Manama te langun ne pamilya te Israil, wey egkeyimu e sikandan ne keet-etawan ku.
2 Egtangguwen ku ka me etew ne nasame te gira taheed te eggipanew sikandan diye te disirtu. Ne eglibed a wey egpeyimelayen kud ka keet-etawan te Israil.”
3 Migpakita dengan kandan ka Magbebaye wey ingkahiyan sikandan, “Eggeyinawaan ku sikaniyu te geyinawa ne ware egtamanan. Ne igpakita ku ka geyinawa ku kaniyu te langun ne timpu.
4 Igpasasindeg kud e man‑e sikaniyu, he keet-etawan te Israil. Eggamiten niyud man‑e ka me tamburin niyu wey egmanesayew kew te kahale.
5 Ne egpamula kew e man‑e te me paras diye te me bubungan te Samarya, wey egkabayangan kew te me behas kayi.
6 Egginguma iya ka timpu ne egmangumew ka me talagbantey te siyudad diye te labuntud te Ipraim, ‘Pangendini kew! Egpanakereg ki diye te Hirusalim ka egsimba te Magbebaye ne Manama ta.’ ”
7 Ne migkahi pad man‑e ka Magbebaye,
“Pangulahing kew te pegkahale para te Israil,
ka ahalen te langun ne nasud.
Ulahinga niyu ka ulahingen te pegsaye ne egkahi,
‘He Magbebaye ne Manama, inluwas nu ka keet-etawan nu ne me Israilita ne nenasame ne neuyag pad.’
8 Pammineg kew! Eg-uyanen ku sikandan puun te igkahibang ne balabahan
wey eglibulungen ku sikandan puun te maddiyu ne inged te kalibutan.
Ne egmanduma kandan ka me butud wey me pungku,
ka egkengaberes ne me malitan wey seeye se mahaan e egmanlesuti.
Susuluhi ran te egluyud ne eglibed kayi.
9 Egmanguli diye te ugpaan dan ka keet-etawan ku ne egmaninehew te kahale
wey eg-ampu taheed te eg-inahaken ku sikandan.
Egdumeen ku sikandan peendiye te me beuhan,
wey meupiya ne dalan ka egbayaan dan eyew kene sikandan egkasaligkat.
Tenged su sikeddiey ka amey te Israil,
wey si Ipraim ka panganey ne anak ku.”
10 Ne migkahi pad man‑e ka Magbebaye,
“Pammineg kew keddiey, he keet-etawan te me nasud,
wey ipangguhud niyu ka lalag ku diye te maddiyu ne inged.
Intalagtag ku ka keet-etawan ku, piru eglibulungen ku red sikandan
wey egtamengan ku iling te talagtameng te karniru.
11 Impalihawang kud ka keet-etawan te Israil
wey inluwas kud sikandan puun te maresen ne nasud.
12 Ne egmangendiye sikandan te Bubungan te Siyun
wey egmanguleyi te pegkahale dan.
Egkengahale sikandan su egpanalangin ku ma
te trigu, binu, lana te ulibu,
me karniru wey me baka.
Egpekeiling sikandan te kamet ne layun de egbisbisi,
wey kenad e sikandan eglungku.
13 Ne egmanesayew te pegkahale ka me mengebay,
ka me kanakan lagkes ka me buyag ne lukes.
Egliwangen ku sikandan wey egliwanan ku te kahalaan ka peglungku dan.
14 Egpeuralan ku ka me talagpanubad te dakel wey mannanam ne egkengakeen
wey igbehey ku ka langun ne keilangan te keet-etawan ku.
Sikeddiey se Magbebaye ne Manama ka miglalag kayi.”
Ka himenew te Magbebaye te Israil
15 Ne migpabulus ka Magbebaye ne migkahi,
“Due egkarineg ne laheng diye te Rama,
laheng te peglungku
wey mapeit-peit ne dalawitan.
Migpandalawit si Rakil tenged te me anak din su migpatey man e sikandan,
wey kenad iya sikandin egkaliwang.”
16 Ne migkahi ka Magbebaye ki Rakil,
“Engked kad ka egsinehew.
Punasa nud e ka luwe nu,
su eg-unahan ku sikeykew tenged te pegtanggu nu te me anak nu.
Eg-uli ded sikandan puun te inged te me kuntere.
17 Duen pad egkapallateng nu keureme,
su eg-uli ded ka me anak nu te inged dan.
Sikeddiey se Magbebaye ne Manama ka miglalag kayi.”
18 Ne migkahi pad man‑e ka Magbebaye,
“Narineg ku ka pegsinehew te keet-etawan te Israil ne migkahi,
‘Magbebaye ne Manama, nekeiling key te nati te baka ne ware pad nabasbas,
piru impanulu key nikeykew ne egpalintutuu.
Ipalibed key e nikeykew
su andam key e ne eglibed due te keykew,
sikeykew ka Magbebaye ne Manama ney.
19 Mig-inniyug key keykew,
piru nekegsendit key e.
Napanulu key
te pegparusa nu kanami.
Amana key neyilew wey nalaggew
tenged te inggimu ney te me bate key pad.’ ”
20 Ne migtabak ka Magbebaye ne Manama,
“He pinalangge ku ne me anak ne keet-etawan te Israil,
amana ku geyinawei sikaniyu.
Minsan due me timpu ne ingginalatan ku sikaniyu,
piru insuman-suman ku red sikaniyu.
Naal-alimengawan a kaniyu wey neyimmimenawan.
Sikeddiey se Magbebaye ka miglalag kayi.
21 Tahui niyu te me palinneu wey ke tuus naa ka dalan ne eg-ikulen niyu,
wey tantanuri niyu ka dalan ne imbayaan niyu
su sikan ded ne dalan ka egbayaan niyu ke eglibed kew.
Panlibed kew e, he matig-Israil,
Panlibed kew e diye te me siyudad niyu.
22 Ken‑u naan pad egkataman ka pegduwa-ruwa niyu, he me etew ne ware pegpalintutuu?
Due iyam ne eggimuwen ku kayi te kalibutan—
malitan e ka egtameng te lukes.”
Ka egginguma ne keupianan te keet-etawan te Israil
23 Ne migkahi e man‑e ka Amana ne Maresen ne Magbebaye, ka Manama te Israil, “Igpalibed kud ka me etew diye te inged dan,
wey egkahi e man‑e sikandan diye te inged te Huda wey te me lungsud diye,
‘Egpanalanginan perem te Magbebaye ne Manama ka matulus ne labuntud te Hirusalim,
ka matulus ne inged ne in-ugpaan din.’
24 Ne eg-ugpaan e te keet-etawan ka Huda wey ka langun ne lungsud diye, wey duen e me talagbasuk wey me talagtameng te karniru diye.
25 Ne egpeyimelayen ku ka seeye se nenabbeley, wey eggibulungen ku ka seeye se migmemagguye tenged te gutas.
26 Ne egkahi ka me etew, ‘Miglipereng a wey naheram ku ne nakameupiya keddiey ka peglipereng ku.’ ”
27 Ne migpabulus ka Magbebaye ne Manama ne migkahi, “Egginguma ka timpu ne egbuhalen ku ka keet-etawan te Israil wey Huda, wey ka me ayam dan.
28 Indereetan ku dengan sikandan wey inggule, piru kuntee, igpasasindeg ku red wey eglig‑enen ku red sikandan.
29 Te sika kangkuwa ne timpu, kenad egkahi ka me etew,
‘Migkeen te matahimtim ne behas te paras ka me amey,
piru ka me anak mule ka nangingilu.’
30 Tenged su ka etew ne egkeen te matahimtim ne behas te paras, iyan de egkangingilu. Ne ka etew re degma ne nakasale ka egpatey.”
31 Ne migpabulus ka Magbebaye ne Manama ne migkahi, “Egginguma ka timpu ne eggimu a te iyam ne kasabutan diye te me matig-Israil wey me matig-Huda.
32 Ne kene seini ne iling te tapey ne kasabutan ne inggimu ku duma te kaap-apuan dan te timpu ne in-inahak ku sikandan puun te Ihiptu. Ware dan tumana ka sika ne kasabutan minsan iling a te iglukes dan.
33 Seini ka iyam ne kasabutan ne eggimuwen ku te keet-etawan te Israil: Igtahu ku ka me balaud ku diye te suman-suman dan, wey igsulat ku seini diye te me pusung dan. Egkeyimu a ne Manama ran wey egkeyimu sikandan ne keet-etawan ku.
34 Ne kenad e ne keilangan ne egpanuluen dan pad ka me sumbaley ran ne eg-ila te Magbebaye ne Manama, tenged su sikandan langun—puun te lerew peendiye te mabantug ne me etew, eg-ila man e keddiey. Egpasayluwen ku ka me sale dan, wey kene kud egsumsumanen ka inggimu ran.”
35 Ne migpabulus ka Magbebaye ne Manama ne migkahi,
“Sikeddiey ka migsuhu te aldew ne eglayag te timpu te maaldew,
wey te bulan wey me bituen ne eglayag te timpu te marusilem.
Sikeddiey ka migkulibul te dahat ne miglehes ka me bunlud.
Iyan ku ngaran ka Amana ne Maresen ne Magbebaye ne Manama.
36 Ne taman te duen pad ka langit wey ka kalibutan,
egpabulus degma ne sabeka ne nasud ka Israil.
37 Iling te langit ne kene egkaseked,
wey te pabunsuranan te tane ne kene egkatirew,
kene ku degma egkasuman-suman ne eg-engkeran ka keet-etawan te Israil
tenged te maddeet ne hinimuwan dan.
Sikeddiey se Magbebaye ne Manama ka miglalag kayi.”
38 Ne migkahi pad man‑e ka Magbebaye ne Manama, “Egginguma ka timpu ne igpasasindeg e man‑e ka siyudad te Hirusalim para keddiey, ligkat diye te Matikang ne Baley ni Hananil peendiye te Gumawan te Pikungan.
39 Ne puun de iya te seeye ne me lungsud ka eletanan, taman diye te labuntud te Garib wey egtiku diye te inged ne Guwa.
40 Ne egmatulus e ka intiru ne napu ne lebenganan te me minatey wey degpakanan te me basura, wey ka langun ne kamet diye te dibabew te Beuhan ne Kidrun, taman diye te pikungan te gumawan ne egngaranan te Gumawan te Kudde dapit te igsile. Kenad e egkahuhus ka sika ne siyudad.”