32
Ka pegbeli ni Hirimiyas te kamet
1 Te igkasapulu (10) ne leg‑un te peghari ni Sidikiyas diye te Huda, ne iyan ka igkasapulu wey walu (18) ne leg‑un te peghari degma ni Nibukadnisar diye te Babilunya, migpakiglalag keddiey ka Magbebaye ne Manama.
2 Te seeye ne timpu, inlingutan te me sundalu te Babilunya ka Hirusalim, wey imprisu ad e diye te lama te me talagbantey te palasyu te Hari te Huda.
3 Imprisu a ni Hari Sidikiyas su impangguhuran ku ma ka langun ne etew te migkahi ka Magbebaye ne Manama, “Igbehey kud ka seini ne siyudad te Hari te Babilunya,
4 wey kene iya egpakapallahuy si Hari Sidikiyas. Igbehey e sikandin diye te Hari te Babilunya, wey egpekegkita iya sikandan.
5 Ne eg-uyanen sikandin diye te Babilunya, wey diye de iya sikandin taman te eglegparan kud sikandin. Ne minsan ke egsukul sikandin te matig-Babilunya, kene iya sikandin eglampus. Sikeddiey se Magbebaye ne Manama ka miglalag kayi.”
6 Ne impanengneng a te Magbebaye ne Manama
7 te egginguma si Hanamil ne anak te anggam ku ne si Salum eyew eghangyu keddiey ne egbeliyen ku ka kamet din diye te Anatut. Ne puun su sikeddi ma ka marani pad iya ne karumaan din, due katenged ku ne egbeli te tane.
8 Ne sumale iya te inlalag keddiey te Magbebaye ne Manama, inggendiyaan ad en iya ni Hanamil diye te lama te me talagbantey te palasyu. Ne ingkahiyan a nikandin, “Beliya nud ka kamet ku diye te Anatut ne diye te eletanan te tane te me kabuhalan ni Binhamin, su sikeykew ka amana pad iya ne karumaan ku.” Purisu nanengnengan kud ne migpakiglalag iya keddiey ka Magbebaye ne Manama.
9 Purisu imbeli kud ka kamet te suled ku ne si Hanamil ne diye te Anatut te sapulu wey pitu (17) ne timman ne seleppi ne pelata.
10 Ne impirmaan kud ka pepilis wey impiket kud diye te tangkaan te me tigpamalehet. Ne intimbang kud ka pelata wey imbayad kud seini ki Hanamil.
11 Ne ingkuwa kud ka daruwa ne kupiya te pepilis ne insulatan te kasabutan te pegbeli ku te kamet, ka impiket wey ka ware piketa.
12 Ne imbehey kud seini ki Baruk ne anak ni Niryas wey apu ni Masiyas. Imbehey ku seini kandin diye te tangkaan ni Hanamil ne suled ku, wey te me tigpamalehet ne migpirma, wey te me Hudiyu ne naminnuu diye te lama te talagbantey te palasyu.
13 Ne ingkahiyan ku si Baruk diye te tangkaan te me etew,
14 “Migkahi ka Amana ne Maresen ne Magbebaye, ka Manama te Israil te igpakuwa keykew seini se me pepilis, ka impiket wey ware piketa. Ne itahu nu naa seini diye te tane ne kuren eyew kene seini egkahaan-gaan egkareeti.
15 Su migkahi ka Amana ne Maresen ne Magbebaye, ka Manama te Israil te egginguma ka timpu ne egpameli e man‑e te me baley, me kamet, wey me parasan ka me etew te seini ne inged.”
Ka peg-ampu ni Hirimiyas
16 Te ingkabehey kud ki Baruk ne anak ni Niryas ka pepilis, mig-ampu ad e diye te Manama ne migkahi,
17 “He Magbebaye ne Manama, sikeykew ka miggimu te langit wey tane pinaahi te karesen nu. Warad iya igkaleheni nu.
18 Ne impakita nu ka geyinawa nu ne kene egkabalbalawan diye te libu-libu ne keet-etawan, piru inlegparan nu degma ka me kabuhalan dan tenged te me sale te kaap-apuan dan. Mabantug ka ne Manama, sikeykew ka Amana ne Maresen ne Magbebaye.
19 Amana ne meupiya ka me planu nu, wey kein-inuwan ka me himu nu. Ne egkakita nu ka langun ne eggimuwen te me etew, wey egdasahan nu sikandan sumale te batasan wey me hinimuwan dan.
20 Ne miggimu ka dengan te me kein-inuwan diye te Ihiptu wey inggimu nu seini taman kuntee kayi te Israil wey diye te duma ne me nasud. Ne tenged kayi, migmabantug ka taman kuntee diye te minsan hendei.
21 Inggamit nu ka me kein-inuwan ne himu nu wey ka geem nu ne nakapaaldek te me kuntere ney wey impalihawang nu ka keet-etawan nu puun te Ihiptu.
22 Ne imbehey nu kandan ka meupiya ne tane wey dakel se eg-uma ne insaad nu ne igbehey nu te me kaap-apuan dan.
23 Piru te pegginguma ran kayi wey te in-ugpaan dan e seini, ware dan e tumana ka me balaud nu wey ka langun ne impanulu nu kandan. Warad iya minsan sabeka ne inggimu ran te insuhu nu kandan. Purisu impasalerep nud sikandan te karereetan.
24 “Ne migpatetamundu ka me matig-Babilunya te tane ne impalingut te siyudad te Hirusalim eyew egpamaneyikan dan te eg-ahew te siyudad. Ne tenged te gira, gutas, wey me dalu, egkaahew iya te me matig-Babilunya ka siyudad sumale te inlalag nu.
25 Piru minsan pad due, he Magbebaye ne Manama, insuhu a nikeykew ne egbeli te kamet diye te tangkaan te me tigpamalehet, minsan ke mahaan e egkaahew te matig-Babilunya ka siyudad.”
26 Ne impanengneng a te Magbebaye ne Manama,
27 “Sikeddiey ka Magbebaye ne Manama, ka Manama te langun ne etew. Warad iya igkaleheni ku.
28 Igbehey kud ka seini ne siyudad diye te Hari te Babilunya ne si Nibukadnisar wey te me sundalu rin. Egkaahew ran iya seini.
29 Eglusuran dan ka seini ne siyudad wey egsilaban dan, lagkes ka me baley ne diye te me atep egtutunga te me etew ka insinsu para ki Baal, wey halaranan dan degma te me inumen para te duma ne me diyus-diyus ne iyan nakapeyibelu keddiey.
30 Ne puun pad dengan, warad lein ne inggimu te keet-etawan te Israil wey Huda ke kene ka eggimu re te sale. Impeyibelu a nikandan tenged te me hinimuwan dan.
31 Ne puun pad te pegpasasindeg te seini ne siyudad taman kuntee, impeyibelu ad e te me mahinged kayi. Sikan naa ka eglegparan ku iya seini
32 tenged te langun ne maddeet ne hinimuwan te keet-etawan te Israil wey Huda duma te me Hari dan, me pangulu ran, me talagpanubad dan, wey me prupita ran.
33 Mig-inniyuhan a nikandan, wey minsan migpabulus a ka migpanulu kandan, wara a pammineha nikandan.
34 Ne intahu dan pad iya man‑e ka mallindit ne me diyus-diyus dan diye te timplu ne inggimu eyew egsimbaan keddiey. Ne kuntee, inlinditan dan e seini.
35 Ne miggimu sikandan te altar diye te Napu te Hinum eyew egtutungan te igpanubad ki Baal. Ne diye dan man‑e igpanubad ka me anak dan para te diyus-diyus ne si Muluk. Ware ku sikandan suhua ne eggimu rue, wey ware kud iya nasuman-suman ne eggimuwen dan sika ne iyan egpuunan ne nakasale ka keet-etawan te Huda.”
Ka saad te Magbebaye
36 Ne ingkahiyan a te Magbebaye, ka Manama te Israil, “Hirimiyas, malehet iya ka inlalag nu ne tenged te gira, gutas, wey me dalu, egkaahew te Hari te Babilunya ka seini ne siyudad. Piru kuntee, egkahi a se Magbebaye ne Manama te Israil
37 te eglibulungen ku ka keet-etawan ku puun te langun ne nasud ne intalagtahan ku kandan tenged te mangune-kune ne langet ku. Ne igpalibed ku red man‑e sikandan te seini ne inged wey eg-ugpe sikandan ne ware samuk.
38 Egkeyimu sikandan ne keet-etawan ku wey egkeyimu a ne Manama ran.
39 Ne egbehayan ku sikandan te suman-suman ne egkasabeka re se tumung dan, ne iyan ka pegtahud keddiey te langun ne timpu para te keupianan dan wey te kabuhalan dan.
40 Eggimu a te ware egtamanan ne kasabutan duma kandan, ne kena a eg-engked ka eggimu te meupiya diye te kandan. Egpatahuren ku sikandan keddiey te intiru ne pusung dan, wey kenad e sikandan eg-inniyug keddiey.
41 Egkahala a ne eggimu te meupiya para kandan, wey te intiru ne pusung ku, egpeugpeen ku sikandan te seini ne inged ne egmatubung.”
42 Ne migkahi pad man‑e ka Magbebaye ne Manama, “Iling te pegpeuyan ku te mangune-kune ne karereetan te seini ne me etew, egbehayan ku degma sikandan te keupianan ne insaad ku kandan.
43 Ne minsan pad migkahi sikandan te nekeiling e te disirtu ka seini ne inged ne ware me etew wey ke me mananap naa, wey migkahi sikandan te imbehey kud seini te me matig-Babilunya, piru egmambebeli red sikandan te me kamet kayi ne inged.
44 Ne egbeliyen te me etew te pelata ka me kamet. Eggimu sikandan te kasabutan, ne egpirmaan dan wey egpiketen dan seini duma te me tigpamalehet. Egkeyitabu seini diye te inged ni Binhamin, wey diye te me bariyu ne nakalingut te Hirusalim, me lungsud te Huda, me lungsud diye te labuntud ne inged, me lungsud diye te iglineb, wey te me lungsud te Nigib. Igpalibed kud ka me etew diye te inged dan wey egpamatubungen kud e man‑e sikandan. Sikeddiey se Magbebaye ne Manama ka miglalag kayi.”