38
Ka peg-ulug ki Hirimiyas diye te mammara ne belun
1 Ne ensi Sipatiyas ne anak ni Matan, si Gidaliyas ne anak ni Pasur, si Hihukal ne anak ni Silimiyas, wey si Pasur ne anak ni Malkiyas, nakarineg te inlalag ku te me etew.
2 Seini ka ingkahi te Magbebaye ne Manama, “Ka minsan hentew ne egpalunggaat kayi te siyudad, egpatey te gira, gutas, wey dalu. Piru seeye se egpeiluk-iluk te me matig-Babilunya, kene egpatey. Egkaluwas sikandin wey egpabulus ne egkeuyag.”
3 Ne seini pad man‑e ka ingkahi te Magbebaye ne Manama, “Igbehey kud seini ne siyudad diye te me matig-Babilunya, wey egkaahew ran en iya seini.”
4 Nataman, ingkahiyan e te me upisyal ka Hari, “Mahal ne Hari, keilangan ne eggimatayan seini ne etew. Egkengaaldek e ka me sundalu ne nahaat te seini ne siyudad wey ka me etew degma tenged te egmanlalahen din. Kene sikandin egbulig kanta, ke kene, nasi ki nikandin egdereeti.”
5 Purisu migkahi si Hari Sidikiyas, “Sikaniyud e ka balahad kandin. Kena a egpakabalabag kaniyu.”
6 Purisu in-uyan ad e nikandan diye te belun ni Prinsipi Malkiyas ne diye te lama te me talagbantey, wey intuntun ad nikandan diye pinaahi te lubid. Warad weyig te belun; basak de iya ka tahu wey nakalebeng ad iya te basak.
7 Piru nakanengneng mule te inggimu ran keddiey si Ibid-Milik ne matig-Itiyupiya ne upisyal te Hari. Ne taheed te migpinnuu ka Hari diye te Gumawan ni Binhamin eyew eggukum,
8 miglihawang si Ibid-Milik te palasyu wey ingkahiyan din e ka Hari,
9 “Mahal ne Hari, mareet amana ka inggimu te seini ne me etew ki Hirimiyas. Intuntun dan si Hirimiyas diye te belun, wey egpatey e mule sikandin te gutas diye su warad ma paan te intiru ne siyudad.”
10 Purisu ingkahiyan te Hari si Ibid-Milik, “Duruma ka te tatelu ne pulu (30) ne etew puun kayi wey batuna niyu si Hirimiyas puun te belun te kene pad egpatey sikandin.”
11 Ne migdurume en iya si Ibid-Milik te me etew wey miggendiyad sikandin te tahuanan te me kasangkapan diye te palasyu. Migkuwa sikandin te me manggad wey intuntun din e seini keddiey diye te belun.
12 Ne ingkahiyan a nikandin, “Ihagpi nu te ilek nu ka me manggad eyew kene ka egkasakitan te lubid.” Ne inggimu kud iya seini,
13 wey imbatun ad nikandan puun te belun. Pegkapenga dutu, impalibed ad nikandan diye te lama te me talagbantey diye te palasyu.
Ka pegpatambag ni Hari Sidikiyas ki Hirimiyas
14 Nataman, impeumew ad ni Hari Sidikiyas diye te igkatelu ne gumawan te timplu te Magbebaye ne Manama. Ingkahiyan a nikandin, “Due ig-inse ku keykew, wey igkeupii ku ne eglalahan a nikeykew te langun.”
15 Ne migtabak a kandin, “Ke eglalahan ku sikeykew te malehet, egpeyimatayan a nikeykew. Ne minsan pad ke egtambahan ku sikeykew, kene ka egpalintutuu keddiey.”
16 Piru miggeles-heles de si Hari Sidikiyas ka migsaad keddiey ne migkahi, “Igsaad ku te manekal ne Manama ne migbehey te umul ta ne kene ku egpeyimatayan sikeykew wey ke igbehey naa diye te me etew ne egkeupian ne eggimatey keykew.”
17 Ne ingkahiyan kud si Sidikiyas te migkahi ka Amana ne Maresen ne Magbebaye ne Manama, ka Manama te Israil, “Emun ke egpeiluk-iluk ka te me upisyal te Hari te Babilunya, egkaluwas ka wey kenad egsilaban seini se siyudad. Kene ka eggimatayan wey ka pamilya nu.
18 Piru ke kene ka egpeiluk-iluk kandan, igbehey e seini se siyudad diye te me matig-Babilunya, wey egsilaban dan e seini wey kene ka iya egpakapallahuy kandan.”
19 Piru migtabak si Hari Sidikiyas, “Egkaaldek a te me Hudiyu ne miglapig e te me matig-Babilunya. Kema ke igbehey a te me matig-Babilunya diye te kandan wey egguhumian ad nikandan?”
20 Ne ingkahiyan ku sikandin, “Kene ka igbehey diye te me Hudiyu ke egtumanen nu ka Magbebaye ne Manama. Egkaluwas ka wey ware egkeyitabu keykew.
21 Piru seini ka impakita te Magbebaye ne Manama keddiey ke kene ka egpeiluk-iluk:
22 Ka langun ne malitan ne nahaat diye te palasyu, eg-uyanen te me upisyal te me sundalu te Hari te Babilunya. Ne egkahiyan ka te me malitan,
‘In-akalan ke re te insalihan nu ne me alukuy nu wey inlimbungan.
Ne kuntee te nakalebeng te basak ka me paa nu,
in-engkeran kad nikandan.’ ”
23 Ne ingkahiyan ku pad man‑e sikandin, “Ka langun ne asawa nu wey me anak nu, egpanguyanen te me sundalu diye te Babilunya wey kene ka iya egpakapallahuy kandan. Egdakepen ka te Hari te Babilunya wey egsilaban e seini se siyudad.”
24 Ne migtabak si Hari Sidikiyas, “Kene ka pangguhud te minsan hentew ke nekey ka impalalahey ta eyew kene ka eggimatayan.
25 Emun ke egkanengnengan te me upisyal ne migpalalahey ki, eggendiniyan ka nikandan te eg-inse ke nekey ka impalalahey ta. Ne emun ke kene ka egpangguhud, eggimatayan kad nikandan.
26 Purisu emun ke eg-insaan ka nikandan, kahii nu re sikandan te mighangyu ka keddiey ne kene egpaliberen diye te baley ni Diyunatan eyew kene ka egpatey diye.”
27 Nataman, migmanlepew en iya ka langun ne upisyal wey mig-insaan ad nikandan. Ne iyan ku re iya inlalag kandan ka impanulu te Hari keddiey. Sikan naa ka warad e sikandan mig-abey mig-inse keddiey, su ware ma iya minsan hentew ne nakarineg kanami te migpahuhurey.
28 Ne pegkapenga dutu, diya ad e man‑e nikandan prisuwa te lama te me talagbantey te palasyu taman te naahew e ka Hirusalim.