39
Ka pegkaahew te Hirusalim
1 Te igkasapulu (10) ne bulan te igkasiyam ne leg‑un te peghari ni Sidikiyas te Huda, inlusuran e ni Nibukadnisar ne Hari te Babilunya ka Hirusalim duma te langun ne sundalu rin.
2 Te igkasiyam ne aldew te igkeep‑at ne bulan, te igkasapulu wey sabeka (11) ne leg‑un te peghari ni Sidikiyas, nahebe e te me matig-Babilunya ka baad te matikang wey makepal ne batu ne alad te siyudad.
3 Te naahew ran e ka siyudad, nangendiye ka me upisyal te Hari te Babilunya te elat ne gumawan wey naminnuu diye. Sikandan ensi: Nirgal-Sarisir ne matig-Samgar, si Nibu-Sarsikim ne sabeka ne pangulu ne upisyal, ka sangey ni Nirgal-Sarisir ne dakel degma se katenged ne upisyal, wey duma pad ne me upisyal te Hari.
4 Pegkakita ni Hari Sidikiyas wey te me sundalu rin te neyitabu, migpamallahuy e sikandan te timpu te marusilem. Diye sikandan migbaye te gumawan ne elat-elat te daruwa ne alad te siyudad, marani te pinamulaan te Hari, wey miggendiyad e sikandan te napu te Araba.
5 Piru inlupug sikandan te me sundalu te Babilunya, wey neumaan sikandan diye te napu te Hiriku. Indakep dan e si Hari Sidikiyas wey in-uyan dan e sikandin diye ki Hari Nibukadnisar diye te Ribla ne sakup te nasud te Hamat. Ne diye, inggukuman e si Hari Sidikiyas ni Hari Nibukadnisar.
6 Ne impeyimatayan e ni Nibukadnisar ka me lukes ne anak ni Sidikiyas diye te tangkaan din, lagkes ka langun ne upisyal te Huda.
7 Ne impakulewut e ni Nibukadnisar ka mata ni Sidikiyas. Ne impabaku e sikandin te keddina wey in-uyan e diye te Babilunya.
8 Ne impanilaban e te me matig-Babilunya ka palasyu te Hari wey ka me baley te me etew, wey impangguhus dan ka matikang wey makepal ne batu ne alad te Hirusalim.
9 Ne impandume e ni Nibusaradan ne pangulu te me sundalu te Babilunya ka me etew ne nenasame diye te siyudad peendiye te Babilunya, lagkes ka me Hudiyu ne miglapig kandin.
10 Piru immanggaat din de diye te Huda ka egkengaayu-ayu ne me etew, wey impamehayan din e sikandan te me parasan wey me kamet.
Ka pegleke ki Hirimiyas
11 Nataman, insuhu e ni Hari Nibukadnisar si Nibusaradan ne pangulu te me sundalu te migkahi,
12 “Pamitawa nu si Hirimiyas, wey ay-ayari nu tangguwa sikandin. Kene nu sikandin dereeti, wey himuwa nu ka minsan nekey ne igkeupii rin.”
13 Purisu intuman en iya seini ni Nibusaradan, ni Nibusasdan ne pangulu te me upisyal, ni Nirgal-Sarisir ne sabeka degma ne upisyal ne dakel se katungdanan, wey te duma pad ne me upisyal te Hari te Babilunya.
14 Ne impaangey ad nikandan puun te lama te talagbantey te palasyu, wey ingkahiyan dan si Gidaliyas ne anak ni Ahikam ne apu ni Sapan te sikandin ka eg-uyan keddi diye te baley ku, wey sikandin degma ka egtanggu keddiey. Sikan naa ka mig-ugpa ad diye te Huda duma te me etew.
Ka egkapallateng ni Ibid-Milik
15 Ne taheed te naprisu e pad diye te lama te me talagbantey te palasyu, impanengneng a te Magbebaye ne Manama,
16 “Hendiye ka ki Ibid-Milik ne matig-Itiyupiya wey kahii nu sikandin te migkahi a se Amana ne Maresen ne Magbebaye ne Manama, ka Manama te Israil, te egtumanen kud ka inlalag ku ne karereetan te seini ne siyudad. Ne egpakakita ka iya kayi te egkeyitabu.
17 Piru egluwasen ku sikeykew te sika ne aldew. Kene ku sikeykew igbehey te me etew ne igkaaldek nu.
18 Egluwasen ku iya sikeykew. Kene ka egpatey te gira su migsalig ke ma keddiey. Sikeddiey se Magbebaye ne Manama ka miglalag kayi.”