40
Ka peglemung ni Hirimiyas ki Gidaliyas
1 Ne migpakiglalag keddiey ka Magbebaye ne Manama diye te Rama te impalihawang ad ni Nibusaradan ne pangulu te me sundalu te Babilunya. Ne nakita a nikandin ne imbaku duma te me matig-Hirusalim wey te me matig-Huda ne indakep peendiye te Babilunya.
2 Te pegkakita ni Nibusaradan keddi, ingkahiyan ad nikandin, “Migkahi ka Magbebaye ne Manama nu te egdereetan din ka Hirusalim.
3 Ne kuntee, neyitabu e seini, inggimu en iya te Magbebaye ne Manama ka inlalag din. Neyitabu seini langun su mareet ma ka inggimu niyu diye te Magbebaye ne Manama wey ware kew migtuman kandin.
4 Piru kuntee, eggekaren kud ka baku nu, wey igpalihawang kud sikeykew. Ne emun ke egkeupian ka, duma ka keddiey diye te Babilunya wey egtangguwen ku sikeykew. Piru ke kene ka egkeupian, ne kene ka duma. Ne sikan ded ka luluahi ne tane, iyan kad balahad ke hendei ka egkeupian ne eggendiye.”
5 Piru te ware e pad migtabak, migkahi e si Nibusaradan, “Libed kad diye te ki Gidaliyas ne anak ni Ahikam wey apu ni Sapan. Si Gidaliyas ka inggimu te Hari te Babilunya ne gubirnadur te me lungsud te Huda. Kaayun ne eglemung ka kandin wey ugpe ka duma te me etew, wey ke minsan hendei ka egkeupian ne eggendiye.” Ne imbehayan ad nikandin te dasag, wey bewu, wey impeyipanew ad e.
6 Ne miggendiya ad iya ki Gidaliyas diye te Mispa duma te me etew ne nahaat diye te Huda.
Si Gidaliyas ne gubirnadur te Huda
(2 Hari 25:22-24)
7 Ne due me upisyal te me sundalu te Huda ne ware miggural te me matig-Babilunya. Te pegkarineg dan te inggimu e te Hari te Babilunya ne gubirnadur diye te Huda si Gidaliyas ne anak ni Ahikam, wey impiyal e kandin ka langun ne egkaayu-ayu ne ware pandakepa wey panguyana diye te Babilunya,
8 miggendiyad e sikandan te Mispa ka egpakigkita ki Gidaliyas. Sikandan ensi Ismail ne anak ni Nitaniyas, si Diyuhanan wey si Diyunatan ne me anak ni Kariyas, si Sirayas ne anak ni Tanhumit, me lukes ne anak ni Ipay ne matig-Nitupa, wey si Hasaniyas ne matig-Maaka duma te langun ne etew ran.
9 Ne migpahunlibet si Gidaliyas ne migkahi kandan, “Kene kew kaaldek ne egpamakey te me matig-Babilunya. Telen kew e kayi wey paruma-ruma kew te Hari te Babilunya, wey ware mareet ne egkeyitabu kaniyu.
10 Ne kayi e re iya degma eg-ugpe te Mispa, wey sikeddiey e ka eg-elit-elit para kaniyu ke egmangendini ka me matig-Babilunya. Piru lilimud kew te binu, prutas, wey lana ne ulibu, wey pabulus kew ugpe diye te inged ne naahew niyu.”
11 Te nakanengneng e ka langun ne Hudiyu ne diye te Muwab, Amun, Idum, wey te duma pad ne me nasud te intuhutan e te Hari te Babilunya ne eg-ugpe ka me Hudiyu diye te Huda, wey inggimu rin e ne gubirnadur dan si Gidaliyas,
12 nanlibed e sikandan diye te Huda puun te nalein-lein ne inged ne natalagtahan dan. Ne nangendiye sikandan ki Gidaliyas diye te Mispa, wey miglilimud e sikandan te dakel ne binu wey me prutas.
Ka peggimatey ki Gidaliyas
(2 Hari 25:25-26)
13 Nataman, miggendiyad ki Gidaliyas diye te Mispa si Diyuhanan ne anak ni Kariyas wey ka me pangulu te me sundalu ne ware migpeiluk-iluk te me sundalu te Babilunya.
14 Ne ingkahiyan dan sikandin, “Ware ka nakataha te insuhu ni Hari Baalis ne matig-Amun si Ismail ne anak ni Nitaniyas eyew eggimatey keykew?” Piru ware migpalintutuu si Gidaliyas kandan.
15 Ne inlalahan e sikandin ni Diyuhanan te heles de te migkahi, “Tuhuti a ne eggimatayan ku si Ismail, wey ware egpakataha kayi minsan sabeka. Mania te egbalaharen nu sikandin ka eggimatey keykew? Sika kangkuwa ka egpuunan ne egkatalagtag ka langun ne Hudiyu ne mig-ugpe duma keykew, wey egpakabehey te karereetan te langun ne nenaggaat kayi te Huda.”
16 Piru migtabak si Gidaliyas, “Kene nu himuwa sika! Ubat ka inlalag nu meyitenged ki Ismail!”