6
Inlingutan te me kuntere ka Hirusalim
1 Pamallahuy kew wey pangeles kew keet-etawan te Binhamin! Pangawe kew te Hirusalim! Parahinga niyu ka me trumpita diye te Tikuwa wey pareketi niyu ka me palinneu diye te Bit-Hakirim! Su mahaan e egginguma ka karereetan ne egpuun te igkahibang ne balabahan.
2 Meupiya ne siyudad ka Hirusalim, piru egguhusen ded sika.
3 Eglingutan te me Hari wey te me sundalu ran ka Hirusalim. Egmanleleeb sikandan ne eglingut te siyudad wey egmangekampu sikandan te minsan hendei ne igkeupii ran.
4 Ne egkahi sikandan, “Egpangandam kid eyew eglusud te Hirusalim! Eglusuran ta sikandan te meudtu.” Piru egkataman, egkahi e man‑e sikandan, “Maapun e, wey mahaan e egkasagkup.
5 Marusilem kid e eglusud te Hirusalim wey egpangguhusen ta ka me malig‑en wey matikang ne me baley.”
6 Ne insuhu te Amana ne Maresen ne Magbebaye ka me Hari eyew egpameled te me kayu ne igpalingut igketal te Hirusalim, wey impatetamundu rin sikandan te tane eyew egpakaseled sikandan te siyudad. Migkahi ka Magbebaye, “Eglegparan ku ka seini ne siyudad su in-ugpaan seini te egmanleig-leig.
7 Ka mareet ne hinimuwan diye te Hirusalim, egpekeiling te weyig diye te belun ne layun iyam. Layun a egpakarineg te pegpangimatey wey te karereetan te sika ne siyudad; egkengakita ku ka egmanderalu wey ka egkengapalian.
8 Pegpaney-paney sika kaniyu, keet-etawan te Hirusalim! Emun ke kene kew egpammineg keddi, eg-engkeran kud e sikaniyu wey eggimuwen kud ne disirtu ka siyudad niyu, eyew warad e egpekeugpe kayi.”
Ka pegkamasinupaken te Israil
9 Ne ingkahiyan e pad man‑e te Amana ne Maresen ne Magbebaye, “Ka nenasame diye te Hirusalim, egpaay-ayaran ku egpepakilalawi iling te paras. Purisu hendiyei nu man‑e sikandan ne ubag kun egpakilalew ka te nenasame diye te me sugpang.”
10 Ne migtabak a, “Hentew naa ka egpammineg keddiey ke egpanpanayan ku sikandan? Kene sikandan egpakarineg su insagpeng dan ma ka me talinga ran. Ne kene sikandan egkeupian ne egpammineg te lalag nu, egngisiyan dan de iya ka impalalag nu keddi.
11 Egpekeiling ad e degma keykew te egkalangetan e kandan, Magbebaye, wey kene kud e seini egkaantus.”
Ne migtabak ka Magbebaye, “Egpasalerepen ku te langet ku ka me bate ne egmanggehalew diye te me deralanen, ka me kanakan ne egmanliblibulung, ka me alunggun, wey ka me buyag.
12 Igpamehey kud e ka me baley ran diye te duma, lagkes ka me kamet wey ka me asawa ran. Eglegparan ku ka me etew te seini ne inged.
13 Puun de iya te me lerew peendiye te mabantug ne me etew ne egmaneleppi pinaahi te limbung, minsan ka me prupita wey me talagpanubad.
14 Ware dan paay-ayari te egbawi ka pali te keet-etawan ku. Egkahi re iya sikandan te meupiya red ka langun, kunaleg te ubat bes.
15 Ingkeyilew ran naa ka malindit ne me hinimuwan dan? Ware, warad e me hilew ran. Sikan naa ka egpatey sikandan iling te duma. Egpatey sikandan te timpu ne eglegparan kud e sikandan. Sikeddiey se Magbebaye ne Manama ka miglalag kayi.”
Ka peg-inniyug te Israil te tambag te Manama
16 Ne migkahi ka Magbebaye diye te keet-etawan din, “Sasindeg kew diye te me bebalakan, wey ayad-ayad kew naa panginse ke hendei ka tapey, wey meupiya ne dalan, ne diye kew naa baye. Ke eggimuwen niyu sika, egkaangken niyu ka keupianan.”
Piru ware sikandan migpammineg.
17 Ne mig-alam ka Magbebaye te talagtameng kandan ne egpammineg ke egparahingen e ka trumpita isip pegpaney-paney, piru egkahi re iya sikandan, “Kene key egpammineg!”
18 Purisu migkahi ka Magbebaye, “Pammineg kew me nasud! Pitawa niyu ke nekey ka egkeyitabu te keet-etawan ku.
19 Pammineg kew se keet-etawan te intiru ne kalibutan, egpeuyanan ku te karereetan ka keet-etawan ku isip behas te mareet ne me planu ran. Ware dan palintutuuwa ka me lalag ku, wey ware dan tumana ka me balaud ku.
20 Egmenuwen ku naa ka me insinsu ne impanguyan dan kayi te keddi puun te Siyiba, wey ka me peemut ne egpuun te mariyu ne inged? Kene ku egdawaten ka igpanubad dan ne egtutungen; kena a egkahale due.
21 Sikan naa ka eg-eletan kud ka egbayaan te me etew, eyew egkasaligkat sikandan. Ne puun due, egpatey ka me amey wey me iney, ka me anak dan, lagkes ka me talag-alukuy wey ka me talagsumbaley.”
Ka me kuntere ne puun te igkahibang ne balabahan
22 Ne seini pad man‑e ka ingkahi te Magbebaye, “Egpangendini ka me sundalu puun te me nasud te igkahibang ne balabahan; maresen seini ne me nasud puun diye te subla ne mariyu ne baad te kalibutan, wey andam e ne eglusud.
23 Nasangkap sikandan te me piet wey me kelaab. Mabbulut sikandan wey ware me himenew. Egpekeiling te eglehes ne bunlud te dahat ka kahulub dan te egmangukudde, wey andam e sikandan ne eglusud kaniyu, he keet-etawan te Hirusalim.”
24 Ne migkahi ka me etew te Hirusalim, “Nakarineg key e te me guhuren meyitenged kandan, wey warad e keseg te me belad ney tenged te pegkaaldek ney, iling te malitan ne eglalung ne eg-antus te masakit.
25 Kene key egmaalag-alag egmangendiye te me kamet wey ke egmanleug-leug naa diye te me deralanen su due me kuntere ne due me panganiban. Delikaddu te minsan hendei.”
26 Ne ingkahiyan te Magbebaye ka keet-etawan din, “Kukumbale kew te saku wey hulad-hulad kew te abu. Lungku kew iling te impatayan kew te sabsabeka ne anak niyu, su te kene egkaluhey, eglusuran kew e te me kuntere niyu!
27 Hirimiyas, el-elehi nu ka keet-etawan ku, iling te peg-eleg-eleg nu te pelata eyew egkatahaan nu ka pegkeetew ran.
28 Memakehal ka ulu ran langun, me masinupaken sikandan wey me id-iranen, egpekeiling sikandan kakehal te burunsi wey putew wey neelin sikandan ne mareet.
29 Ka keet-etawan ku iling te kene ne telek ne pelata ne minsan eglalaben diye te hapuy ne impatamtamanan te egduluk, kene iya egkeyimu ne telek. Ware karuan te pegtelek kayi. Ne ka keet-etawan ku degma subla ne mareet, kene iya egkaawe puun kandan ka pegkamareet dan.
30 Ne egngaranan e sikandan te ‘Insamsamilian ne Pelata’ su sikeddi ka Magbebaye, ka migsamsamili kandan.”