7
Ka pegwali ni Hirimiyas diye te Timplu
1 Ne seini ka inlalag te Magbebaye ne Manama keddiey,
2 “Sasindeg ka due te gumawan te timplu wey ilalag nu seini: Pammineg kew langun se matig-Huda ne egseled kayi eyew egsimba te Magbebaye!
3 Seini ka inlalag te Amana ne Maresen ne Magbebaye, ka Manama te Israil, ‘Balbalawi niyud ka me batasan niyu wey ka hinimuwan niyu eyew egtuhutan ku sikaniyu ne eg-ugpe kayi te seini ne inged.
4 Kene kew palintutuu te seeye se egkahi te kene kew red egkamenu su kayi kew te Timplu te Magbebaye, ubat sika.’
5 “Balbalawi niyu ka me batasan niyu wey ka me hinimuwan niyu. Peup-upianey kew ka tagse sabeka.
6 Engked kew e ka egpanleig-leig te me lapu, me ilu wey me balu. Engked kew e ka egpangimatey te me etew ne ware sale te seini ne inged. Engked kew e ka egsimba te me diyus-diyus, su egpakarereet sika kaniyu.
7 Emun ke eggimuwen niyu sika, egtuhutan ku sikaniyu ne egpabulus eg-ugpe kayi te seini ne inged ne imbehey ku te me kaap-apuan niyu taman te ware egtamanan.
8 “Piru pitawa niyu ke nekey ka inggimu niyu! Migsalig kew te ubat ne me lalag ne kene egpakabulig kaniyu.
9 Migpanakew kew, migpangimatey, migpanlibug, migpanaad te ubat, migpanutung te igpanubad niyu ki Baal, wey migsimba kew te me diyus-diyus ne ware niyu neileyi dengan.
10 Migpabulus kew te me himu niyu ne igkalindit ku, wey seini kew kuntee te tangkaan ku kayi te timplu ne inggimu para keddiey ka egkahi ‘Kene ki red egkamenu!’
11 Kahiyen niyu buwa ne helesanan te me takawen ka timplu ku? Nakita ku ka langun ne egmangimuwen niyu.
12 Pangendiye kew te Silu, ka an-anayan ne inged ne in-alam ku eyew egsimbaan keddiey, wey pitawa niyu ke nekey ka inggimu ku diye tenged te me sale te me matig-Israil, ne keet-etawan ku.
13 Inggimu niyu ka langun ne sale minsan kapapila kud e sikaniyu panpanayi, piru ware kew migpammineg. In-umew ku sikaniyu piru ware kew migtabak.
14 Ne tenged due, ke nekey ka inggimu ku te Silu, eggimuwen ku red degma kayi te timplu ku ne insalihan niyu ne egpakabulig kaniyu, kayi te inged ne imbehey ku kaniyu wey te me kaap-apuan niyu.
15 Egpandeldelen ku sikaniyu puun te tangkaan ku iling te inggimu ku te me karumaan niyu, ne keet-etawan te Israil. Sikeddiey se Magbebaye ne Manama ka miglalag kayi.”
Ka pegkamasinupaken te me etew
16 Ne migkahi ka Magbebaye, “Hirimiyas, kene kad e ampu para te seini ne me etew. Kene kad sinehew wey ke peyimmimenew naa para kandan su kena a egpammineg keykew.
17 Mania, ware ke bes nakakita te impangimu ran diye te me siyudad te Huda wey diye te me deralanen te Hirusalim?
18 Egmangayu ka me bate, egmanetemeg ka me lukes, wey egmemasa ka me malitan te harina ne eggimuwen dan ne paan para te diyus-diyus ne ingngaranan dan te Rayna te Langit. Ne mighalad pad man‑e sikandan te binu diye te duma ne me diyus-diyus ne nakapeyibelu keddi.
19 Piru sikeddiey naan iya ka egkasakitan? Kene! Sikandan de iya mismu ka egkasakitan wey ka egkeyilawan kayi.
20 Purisu egkahi a se Magbebaye te igpaneem-neem kud ka mangune-kune ne langet ku kayi te seini ne inged. Egpakaneem-neem kayi ka me etew wey me mananap, me kayu wey me pinamula. Egpekeiling ka langet ku te hapuy ne ware minsan hentew ne egpekeebuk.”
21 Ne migpabulus miglalag ka Amana ne Maresen ne Magbebaye, ka Manama te Israil, “Me keet-etawan ku, meupiya pad ke egkeenen niyud ka me mananap ne egtutungen niyu perem due te altar duma te lein ne me halad niyu keddi.
22 Ware ku suhua ka me kaap-apuan niyu ne egmanubad te egtutungen wey te minsan nekey ne me halad te timpu ne impalihawang ku sikandan puun te Ihiptu.
23 Piru insuhu ku sikandan ne egpalintutuu keddiey, eyew egkeyimu a ne Manama ran wey egkeyimu sikandan ne keet-etawan ku. Ingkahiyan ku pad man‑e sikandan ne eg-ugpe sumale te igkeupii ku, eyew egmeupiya ka peg-ugpe dan.
24 Piru ware sikandan migpammineg wey ke miglinga-linga naa kayi. Nasi dan de iya himuwa ka minsan nekey ne igkeupii te makehal wey mareet ne me pusung dan, wey nasi de iya sikandan migpariyu wey mig-inniyug keddiey.
25 Puun pad te impalihawang ku ka me kaap-apuan niyu te Ihiptu taman kuntee, migpabulus a ka migpeuyan te me suluhuanen ku ne me prupita.
26 Piru ware kew en iya migpammineg kandan wey ke miglinga-linga naa. Nanasnasian de iya ne makehal ka me ulu niyu, wey maddeet pad ka me himu niyu du te me himu te me kaap-apuan niyu.
27 “Sikan naa Hirimiyas, ilalag nu seini langun kandan piru kene sikandan egpammineg keykew. Eg-umawen nu sikandan piru kene egtabak.
28 Ilalag nu seini kandan: Seini ka nasud te keet-etawan ne kene egpalintutuu te Magbebaye ne Manama ran, wey kene sikandan egkeupian ne egpanuluen. Warad e due te kandan ka kamalehetan wey kenad e sikandan eglalag te malehet.”
Ka mareet ne hinimuwan diye te napu te Hinum
29 “Lungku kew, keet-etawan te Hirusalim;
tamperi niyu ka me bulbul niyu wey iregpak niyu seini.
Ulahing kew te ulahingen te peglungku diye te masalad ne me bubungan,
su sikeddi se Magbebaye, mig-engked e
wey mig-inniyug e te keet-etawan ku ne nakapeyibelu keddi.
30 “Maddeet ka me himu te keet-etawan te Huda. Impanahu dan kayi te timplu ku ka me diyus-diyus dan ne igkalindit ku wey inlinditan dan e seini. Sikeddiey ka Magbebaye ne Manama ka miglalag kayi.
31 Ne miggimu sikandan te panubaran diye te Napu te Bin-Hinum ne migngaranan dan te Tupit, eyew diye dan egpanutunga ka me anak dan ne igpanubad dan. Ware ku suhua sikandan ne eggimu rue, wey warad iya migginguma te suman-suman ku ka iling due.
32 Ne kuntee, pammineg kew naa su eggingume e ka timpu ne kenad e seini egngaranan te Tupit wey ke Napu naa te Hinum. Ke kene, Bangalug e ne Gilanganan, su iglebeng dan ka me minatey kayi taman te warad e egkalebengan.
33 Ne egmangeenen e te me bayaku wey me mahintalunan ne mananap ka me minatey wey ware egpakaalew kandan.
34 Ne warad e laheng te me etew ne egmangngingisi wey egkengaggale diye te siyudad te Huda wey diye te me deralanen te Hirusalim. Warad e egkarineg ne laheng te pegsahakeen te pegpaasaweey. Egkeyimu e seini ne inged ne ware mig-ugpe.”