19
Ka peggendiye ni Ilyas te Bubungan ne Sinay
1 Te nekeuli e si Hari Ahab, ingguhuran din e ka asawa rin ne si Hisibil te langun ne inggimu ni Ilyas, wey ke immenu rin te egpangimatey ka langun ne prupita.
2 Sikan naa ka impanahaan e ni Hisibil si Ilyas te migkahi, “Eggimatayan a te me manama ke kene ku eggimuwen kaaselem keykew ka inggimu nu te me prupita.”
3 Ne naaldek e si Ilyas wey miggendiyad e sikandin te Birsiba ne sakup te Huda, duma te suluhuanen din.
Ne inggaat din e diye ka suluhuanen din.
4 Ne migpabulus e sikandin miggipanew ka sabsabeka te intiru ne aldew peendiye te disirtu. Ne migpinnuu pad sikandin diye te diralem te kayu, wey mig-ampu ne egkeupian e sikandin ne egpatey. Ne migkahi sikandin, “Magbebaye ne Manama, eleg e ubag. Angaya ad nikeykew, egkeupian ad ne egpatey iling te me apu ku!”
5 Ne miggibat e sikandin diye te diralem te kayu wey nakalipereng e. Nataman, sahuhune ne due panalihan te Manama ne migpukew kandin wey migkahi, “Enew kad wey keen ke pa.”
6 Migpanil-ap-sil-ap sikandin wey nakita rin e ka paan ne inggilutu wey ka sengegerepun ne weyig dapit te egke-ulunan din. Ne migkeen e sikandin wey mig-inum, wey miggibat e man‑e sikandin.
7 Ne miglibed e man‑e ka panalihan te Manama wey impukew e man‑e sikandin te migkahi, “Enew kad wey keen ke pa, su mariyu pad amana ka eggendiyaan nu.”
8 Ne mig-enew e man‑e si Ilyas, wey migkeen wey mig-inum e sikandin. Ne migmanekal e sikandin tenged te ingkeen din, wey miggipanew e sikandin te hep‑at ne pulu (40) ne aldew peendiye te Bubungan ne Sinay, ka bubungan te Manama.
9 Ne nekeume e sikandin diye te sulung wey diyad en iya sikandin miggirehe.
Ne impanengneng sikandin te Magbebaye ne Manama wey migkahiyan, “Ilyas, nekey‑a ka eggimuwen nu kayi?”
10 Ne migtabak si Ilyas, “Sikeykew re iya ka impamakey ku, he Amana ne Maresen ne Magbebaye ne Manama. Piru ware tumana te me Israilita ka kasabutan nu kandan. Immangguhus dan ka me altar nu, wey impangimatayan dan ka langun ne me prupita nu. Sikeddiey naan de iya ka nasame, wey egpamitawen ad e nikandan kuntee eyew eggimatayan ad degma.”
11 Ne migkahiyan sikandin te Magbebaye ne Manama, “Lihawang ka wey sasindeg ka kayi te tangkaan ku, kayi te puntul te bubungan.” Ne miglihad e ka Magbebaye ne Manama, wey migpangalamag te meemen. Ne nenaperi ka me bubungan wey nenallupet ka me batu, piru ware diye te kalamag ka Magbebaye ne Manama. Peg-engked te kalamag, miglilinug e piru ware diye te linug ka Magbebaye ne Manama.
12 Peg-engked te linug, duen e hapuy, piru ware diye te hapuy ka Magbebaye ne Manama. Peg-engked te hapuy, duen e meyimulung ne laheng.
13 Te pegkarineg ni Ilyas dutu, imbunbunan din ka ulaula rin te ingkukuyumbu rin ne manggad. Miglihawang sikandin wey migsasindeg diye te lihawangan te sulung. Ne due laheng ne narineg din ne migkahi, “Ilyas, nekey‑a ka eggimuwen nu kayi?”
14 Ne migtabak si Ilyas, “Sikeykew re iya ka impamakey ku, he Amana ne Maresen ne Magbebaye ne Manama. Piru ware tumana te me Israilita ka kasabutan nu kandan. Immangguhus dan ka me altar nu, wey impangimatayan dan ka langun ne me prupita nu. Sikeddiey naan de iya ka nasame, wey egpamitawen ad e nikandan kuntee eyew eggimatayan ad degma.”
15 Ne migkahiyan sikandin te Magbebaye ne Manama, “Libed ka diye te imbaye nu, wey hendiye ka te disirtu, marani te Damasku. Ne emun ke diye kad e, itisi nu te lana ka ulu ni Hasail palinneu ne eghari e sikandin te Sirya.
16 Itisi nu degma ka ulu ni Hihu ne apu ni Nimsi palinneu ne eghari e sikandin te Israil, wey ni Ilisyu ne anak ni Sapat ne matig-Abil-Mihula te egsubal keykew ne prupita.
17 Ne ka egpakapallahuy te kampilan ni Hasail, eggimatayan ni Hihu; ka egpakapallahuy te kampilan ni Hihu, eggimatayan degma ni Ilisyu.
18 Piru egsameen ku ka pitu ne libu (7,000) ne me etew te Israil ne ware migsimba te diyus-diyus ne si Baal wey ke miggarek naa te larawan kayi.”
Ka peg-alam te Manama ki Ilisyu
19 Sikan naa ka miggipanew e si Ilyas wey nakita rin e si Ilisyu ne anak ni Sapat ka egdaru wey ka sapulu wey sabeka (11) ne me duma rin. Naatul sikandan te naatag ne me baka ne igdaru, wey namewuriyan naa si Ilisyu ka egdaru. Migsapihu si Ilyas ki Ilisyu wey insaluub din e kandin ka ingkukuyumbu din ne manggad.
20 Ne in-engkeran e ni Ilisyu ka me baka rin, inlupug din si Ilyas wey migkahi, “Kaayun ne egpamare e pad ubag te iney ku wey amey ku, wey egduma ad e keykew?”
Ne migtabak si Ilyas kandin, “Hendiye kad iya, piru sumsumana nu ka inggimu ku keykew.”
21 Ne inliberan e ni Ilisyu ka me baka rin; impangimatayan din e seini wey impangilutu din e. Iyan din en iya impanemeg ka me yuggu te me baka. Ne impamehey rin e te me etew ka ngalap wey impangeen dan e seini. Nataman, migdume e si Ilisyu ki Ilyas wey neyimu e sikandin ne suluhuanen ni Ilyas.