20
Ka peglusud ni Bin-Hadad te Israil
1 Ne inlibulung ni Bin-Hadad ne Hari te Sirya ka langun te sundalu rin eyew egpakiggira. Indumaan sikandan te tatelu ne pulu wey daruwa (32) ne Hari duma te me kudde wey me karwahi ran. Inlingutan dan ka Samarya wey inlusuran dan seini.
2 Ne due me etew ne impeendiye ni Bin-Hadad te siyudad te Samarya eyew egpakahiyan si Ahab ne Hari te Israil, “Igkeupii ni Hari Bin-Hadad ne
3 igbehey nud kandin ka pelata wey bulawan nu, ka me mateles ne asawa nu wey ka me anak nu.”
4 Ne migtabak si Ahab, “Kahii niyu ka ahalen ku ne si Hari Bin-Hadad ne kandin en iya ka langun ne karatuan ku lagkes e ka umul ku.”
5 Nataman, migsuhu e man‑e si Bin-Hadad te me etew rin peendiye ki Ahab wey impakahiyan din sikandin, “Migkahiyan kud e sikeykew te ibehey nud keddi ka pelata wey bulawan nu, ka me asawa nu wey ka me anak nu.
6 Piru igpeenduen ku kaaselem te keykew ka me suluhuanen ku te iling ded ne uras, eyew egpamitew diye te palasyu nu wey diye te me baley te upisyal nu. Ne egmanguyanen dan ka minsan nekey ne igkeupii ran.”
7 Ne impeumew e ni Hari Ahab ka langun ne igbuyag te Israil wey migkahiyan din sikandan, “Pitawa niyu ka seini ne etew, egkeupian iya te gubut. Impakahiyan a nikandin te egkuen din e ka me asawa ku wey ka me anak ku, ka pelata wey ka bulawan ku, wey mig-uyun a iya te imbuyu din.”
8 Piru migkahiyan sikandin te langun ne igbuyag wey te langun ne etew, “Kene ka pammineg kandin!”
9 Sikan naa ka migkahiyan din e ka me suluhuanen ni Bin-Hadad, “Kahii niyu ka ahalen ku ne Hari ne eg-uyun a te hun‑a ne igkeupii rin, piru kena a eg-uyun te igkarangeb.”
Ne miglibed e ka me suluhuanen ni Bin-Hadad wey ingkahiyan dan e sikandin te impanaha ni Ahab kandan.
10 Ne migpanahe e man‑e si Bin-Hadad te migkahi, “Egtamtamanan a eglegpari te me manama ke kene egkahuhus egkatamtamani te me sundalu ku ka Samarya eyew warad iya egkasame minsan senge-kemkem dan naan de.”
11 Ne migtabak ka Hari te Israil, “Kahii nu si Hari Bin-Hadad ne ka malehet ne sundalu, kene egpaambug te kene pad egkapenga ka pegpakiggira.”
12 Nekeuma ki Bin-Hadad ka lalag ni Ahab te sasangan sikandin ne eg-iinum duma te me Hari diye te me leeb dan. Pegkarineg din dutu, impataggel rin e ka me sundalu rin eyew eglusud te siyudad. Ne migtaggel en iya sikandan.
13 Ne due sabeka ne prupita ne migparani wey migpanengneng ki Hari Ahab te inlalag te Magbebaye ne Manama kandin ne miggenendue, “Kene ka kaaldek due te susuluhi ne me sundalu, su te seini ne aldew egpepanaluwen ku sikeykew kandan, wey eyew egkatahaan nu ne sikeddiey ka Magbebaye ne Manama.”
14 Ne mig-inse si Ahab ne migkahi, “Hentew ka egpangulu te eglusud?”
Ne migtabak ka prupita, “Migkahi ka Magbebaye, te sika se egkankanakan pad ne me sundalu ne sakup te me gubirnadur ne diye te me distritu.”
Ne mig-inse e man‑e si Ahab ne migkahi, “Piru hentew ka eggun‑a eglusud?”
Ne migtabak e man‑e ka prupita, “Sikeykew!”
15 Ne inlibulung e ni Ahab ka daruwa ne gatus wey tatelu ne pulu wey daruwa (232) ne egkankanakan pad ne me sundalu, wey ka pitu ne libu (7,000) ne me sundalu te Israil.
16 Te meudtu e, migbunsud e sikandan miglusud te sasangan pad ne egmangiinum diye te me leeb ensi Bin-Hadad wey ka tatelu ne pulu wey daruwa (32) ne Hari ne miglapig kandin.
17 Miggun‑a miglusud ka egkankanakan pad ne me sundalu. Ne ka me sundalu ne impasisilib ni Bin-Hadad migkahi kandin, “Due me sundalu ne egpeendini puun te Samarya.”
18 Ne insuhu e ni Bin-Hadad ka me etew rin, “Keupianan ma wey ke gira ka innendini ran, dakepa niyu sikandan.”
19 Ne iyan miggun‑a miglusud ka egkankanakan pad ne me sundalu, wey migsinundul kandan ka me sundalu te Israil.
20 Ne tagse sabeka kandan nekeyimatey te tigsalimbeka ne etew. Migpamallahuy ka me matig-Sirya, wey impanlupug sikandan te me Israilita. Piru nakapallahuy si Bin-Hadad ka mig-untud te kudde duma te migmangudde ne me sundalu rin.
21 Ne miglihawang si Hari Ahab wey impangahew rin e ka me kudde wey me karwahi, wey inggule din pangimatayi ka susuluhi ne me matig-Sirya.
22 Pegkapenga dutu, migparani e ki Hari Ahab ka prupita wey migkahi, “Hendiye kad e, pangandam ka wey ayad-ayad ka pamalanu su te seup ne leg‑un, eglusuran kad man‑e te Hari te Sirya.”
Ka igkarangeb ne peglusud te me matig-Sirya
23 Ne ingkahiyan si Hari Bin-Hadad te me upisyal din, “Ka me manama te me Israilita, manama te me bubungan, sikan naa ka natalu ki nikandan. Piru ke diye ki te mapatag egpakiggira kandan, egkatalu ta iya sikandan.
24 Ne kuntee, seini himuwa nu: awei nud te katenged ka tatelu ne pulu wey daruwa (32) ne Hari, wey isubal nu kandan ka me pangulu te me sundalu.
25 Libulung ke naa te me sundalu ne iling ded kasulug te me sundalu nu ne mig-awe, wey libulung ka man‑e te me kudde ne iling ded kasulug te me kudde wey me karwahi nu dengan. Ne diye ki naa egpakiggira te me Israilita te mapatag eyew egkatalu ta iya sikandan.”
Ne mig-uyun si Hari Bin-Hadad wey intuman din en iya ka inlalag dan.
26 Te seup ne leg‑un, inlibulung e ni Bin-Hadad ka me sundalu rin, wey nangendiyad e sikandan te siyudad te Apik eyew eglusud te me Israilita.
27 Ne miglibulung e degma ka me Israilita, wey migpangandam te me keilangan dan wey miggipanew e sikandan ka eglusud. Migpangimu sikandan te daruwa ne kampu diye te egkatangkaan te me matig-Sirya; nekeiling de ubag sikandan te daruwa ne deisek ne punduk te me kambing, kene ne iling te me matig-Sirya ne nekeempet de iya te mapatag.
28 Ne duen e man‑e prupita ne migparani ki Hari Ahab wey migpanengneng kandin te inlalag te Magbebaye ne Manama ne miggenendue, “Migkahi ka me matig-Sirya te maname e kun de te me bubungan, kene ne manama te me mapatag. Purisu igpatalu ku keykew ka susuluhi ne me sundalu ran eyew sikeykew wey ka langun ne sundalu nu egpakataha ne sikeddiey ka Magbebaye ne Manama.”
29 Ware nanweil-weil ka me matig-Sirya wey me matig-Israil te pitu ne aldew, wey migmatangkeey re iya sikandan te kampu. Te igkapitu e ne aldew, migbunsud e sikandan ka egpahiggireey, wey nenekeyimatey ka me matig-Israil te sabeka ne gatus ne libu (100,000) ne me matig-Sirya te sabeka re ne aldew.
30 Nakapallahuy ka daruwa ne pulu wey pitu ne libu (27,000) ne nenasame peendiye te siyudad te Apik, piru nabunbunan sikandan te nahebe ne matikang wey makepal ne alad ne batu te siyudad.
Nakapallahuy degma si Bin-Hadad peendiye te siyudad, wey miggeles e sikandin diye te nekeelat-elat ne sinabeng te baley.
31 Ne miggendiyaan sikandin te me upisyal din te migkahi, “Nakarineg key ne hiimenawen kun ka me Hari te Israil. Peendiyaa key pa ubag nikeykew te Hari ka egsaluub te saku wey nabeleberan te lubid se lieg, eyew kene ke red nikandin eggimatayan.”
32 Ne migsaluub en iya sikandan te saku wey imbeleberan dan e te lubid ka me lieg dan, wey miggendiyad e sikandan ki Ahab wey migkahi, “Migkahi si Bin-Hadad ne suluhuanen nu ne ke egkaayun kun ubag, kene nu re sikandin himatayi.”
Ne migtabak si Ahab, “Iling e te suled ku sikandin! Manekal bes pad sikandin?”
33 Ne nasabut te me upisyal ni Bin-Hadad ne meupiya ne palinneu ka pegkahi ni Ahab te suled din si Bin-Hadad, wey migkahi sikandan, “Uya, si Bin-Hadad ne suled nu.”
Ne migkahi si Ahab, “Hendiye kew e, angaya niyu si Bin-Hadad.”
Te pegginguma ni Bin-Hadad, impeuntud e sikandin ni Ahab te karwahi duma kandin.
34 Ne migkahi si Bin-Hadad kandin, “Ig-uli kud e keykew ka me lungsud ne in-ahew te amey ku puun te amey nu, wey egkaayun kad e ne eggimu te tindaan nu diye te Damasku, iling te inggimu te amey ku diye te Samarya.”
Ne migtabak si Ahab, “Emun ke eggimuwen nu ka inlalag nu, eglekaan kud sikeykew.” Ne miggimu e sikandan te kasabutan wey inlekaan e ni Ahab si Bin-Hadad.
Ka pegdew‑ey te prupita te inggimu ni Ahab
35 Ne due prupita ne insuhu te Magbebaye ne Manama ne egpakahiyan ka duma rin ded ne prupita, “Sumbaha a ubag nikeykew!” Piru ware sikandin sumbaha te duma rin.
36 Purisu ingkahiyan te prupita ka duma rin, “Puun su ware nu ma tumana ka suhu te Magbebaye ne Manama, egdawiyen ka te liyun ke eggipanew kad e.” Te miggipanew e sikandin, insalambag en iya sikandin te liyun wey inggimatayan e.
37 Nataman, nakakite e ka prupita te lein ne etew wey ingkahiyan din e man‑e sikandin, “Sumbaha a ubag nikeykew!” Ne insumbag en iya sikandin te etew wey napalian sikandin.
38 Ne miggipanew e ka prupita wey intetaharan din e ka Hari te Israil diye te ilis te dalan. Imbunbunan din te manggad ka mata rin eyew kene sikandin egkeilaan.
39 Te eglihad e ka Hari, migbalukan e ka prupita kandin ne miggenendue, “Ahalen, miggendiya a se suluhuanen nu te elat-elat te egpahiggireey, wey due sundalu ne migparani keddi ne mig-uyan te pinirisu wey migkahi, ‘Tamengi nu seini ne etew. Emun ke egpakapallahuy sikandin, eggimatayan ku sikeykew, wey ke egpabayaren ku naa sikeykew te tatelu ne pulu wey hep‑at (34) ne kilu ne pelata.’
40 Piru taheed te nahulikid ka suluhuanen nu te masulug ne eggimuwen, nakapallahuy e mule ka etew.”
Ne ingkahiyan sikandin te Hari te Israil, “Eleg de iya ne eglegparan ka sumale te inlalag nu.”
41 Ne indagdahawan e awaa te prupita ka imbunbun din te mata rin, wey neilaan e sikandin te Hari ne sabeka te me prupita.
42 Ne inlalahan din e ka Hari te inlalag te Magbebaye ne Manama ne miggenendue, “Puun su impepallahuy nu ma ka etew ne igkeupii ku ne egpatey e, sikeykew e nasi ka egpatey wey ka me etew nu.”
43 Ne mig-uli e ka Hari te Israil diye te palasyu rin diye te Samarya ka nasuhey-suhey wey nalangetan.