16
Ka peghari ni Ahas te Huda
(2 Kru. 28:1-27)
1 Te igkasapulu wey pitu (17) ne leg‑un te peghari ni Pika ne anak ni Rimalya diye te Israil, migbunsud e degma mighari diye te Huda si Ahas ne anak ni Hutam.
2 Daruwa ne pulu (20) ka idad ni Ahas te neyimu sikandin ne Hari, wey mighari sikandin diye te Hirusalim te sapulu wey hen‑em (16) ne leg‑un. Mareet ka hinimuwan din diye te tangkaan te Magbebaye ne Manama, kene ne iling te hinimuwan te kaap-apuan din ne si Dabid.
3 Mig-ikul sikandin te maddeet ne hinimuwan te me Hari te Israil. Intutung din ka anak din isip igpanubad. In-ikul rin ka maddeet ne hinimuwan te keet-etawan ne impandeldel te Magbebaye te ware pad ka me matig-Israil.
4 Ne migpanubad sikandin wey migtutung te insinsu diye te me panubaran diye te me bubungan, wey diye te me labuntud, wey diye te me lebut te kayu ne malapung.
5 Nataman, inlusuran ni Risin ne Hari te Sirya wey ni Pika ne Hari te Israil ka Hirusalim. Inlingutan dan seeye piru ware dan iya natalu si Ahas.
6 Te seeye ne timpu, naawi te Hari te inged ne Idum ka Ilat, wey indeldel din e ka me matig-Huda ne mig-ugpe diye. Ne sikandan e ka migsubal mig-ugpe diye taman kuntee.
7 Purisu migsuhu si Ahas te me suluhuanen ne egpahuhuren ki Tiglat-Pilisir ne Hari te Asirya ne migkahi, “Suluhuanen a wey uripen a nikeykew, pangabangi a nikeykew su inlusuran a te Hari te Sirya wey te Hari te Israil.”
8 Ne migpanguwa sikandin te pelata wey bulawan diye te timplu te Magbebaye wey diye te tinesanan te karatuan te palasyu. Ne impeuyan din seini eyew igdasag te Hari te Asirya.
9 Ne migsuhut ka Hari te Asirya te hangyu ni Ahas, purisu, inlusuran din ka Damasku wey naahew rin seini. Ne indakep din e ka me etew wey in-uyan din e diye te inged ne Kir wey miggimatayan din e degma si Hari Risin.
10 Ne miggendiye te Damasku si Hari Ahas eyew egpakigkita ki Tiglat-Pilisir. Te diyad e sikandin, due nakita rin ne altar. Purisu impeuyanan din te larawan te altar si Uriyas ne talagpanubad, wey te eg-ilingan te peggimu kayi eyew egpeilingan kandin.
11 Ne miggimu en iya si Uriyas te altar ne impeiling din en iya te seeye se impeuyan ni Ahas puun te Damasku. Ne neimpusan din ka altar te ware pad mig-uli si Ahas.
12 Te peg-uli e ni Ahas puun te Damasku, impitew rin e ka altar wey mighalad sikandin dutu.
13 Migpanubad sikandin te egtutungen wey mighalad te egkakeen. Ne in-itis din ka igpanubad din ne eg-inumen. Migpanubad degma sikandin para te keupianan wey impabesik-besik din ka langesa diye te altar.
14 Ne impaawe din ka tapey ne altar ne burunsi puun te natahuan kayi ne diye te tangkaan te timplu te Magbebaye, elat-elat te altar din wey te timplu, wey impatahu din seini diye te igkahibang ne balabahan te iyam ne altar.
15 Ne migkahiyan ni Ahas si Uriyas, “Puun kuntee, seinid e se dakel ne altar gamita nu te egpanubad te egtutungen te maselem wey te eghalad te egkakeen te marusilem. Gamita nu degma seini te egpanubad te egtutungen ne igpanubad te Hari wey te halad din ne egkakeen, wey te egtutungen ne igpanubad te me etew lagkes ka ighalad dan ne egkakeen wey inumen. Pabesiki nu seini te langesa te langun ne igmanubad, piru kene nu ilagkes ka burunsi ne altar su eggamiten ku te eg-ampu.”
16 Ne intuman ni Uriyas ka insuhu kandin te Hari.
17 Nataman impangawe e ni Hari Ahas ka langun ne me burunsi ne impeunturan te me pelenggana ne inggamit te eglaglag te weyig para te timplu. Migpeyimu degma sikandin te batu ne eg-unturan te tahuanan te weyig ne egngaranan te Dahat su eyew egkakuwa rin ka baka ne inggimu puun te burunsi ne impeunturan kayi.
18 Ne in-awe din man‑e ka egpinpinuuwan ne in-atepan diye te timplu ne eggamiten te Aldew te Peggimeley wey inlekeban din ka dalan ne bayaanan te Hari peendiye te timplu, eyew te pegpahale te Hari te Asirya.
19 Ne ka duma pad ne neyitabu te peghari ni Ahas wey ka langun ne neyimu rin, nasulat diye te Sulatanan te me Guhuren te me Hari te Huda.
20 Ne migpatey e si Ahas wey diye sikandin isabal te siyudad te Hirusalim diye te insabalan ded te me kaap-apuan din. Ne si Isikiyas e ne anak din ka migsubal kandin mighari.