17
Ka peghari ni Husiyas te Israil
1 Te igkasapulu wey daruwa (12) ne leg‑un te peghari ni Ahas te Huda, migbunsud e degma mighari te Israil si Husiyas ne anak ni Ila. Diye sikandin mig-ugpe te Samarya wey mighari sikandin diye te Israil te siyam ne leg‑un.
2 Mareet ka hinimuwan din diye te tangkaan te Magbebaye ne Manama, piru kene de ne iling kareet te hinimuwan te me Hari te Israil ne nekewun‑a kandin.
3 Inlusuran sikandin wey insakup ni Salmanisir ne Hari te Asirya wey impabayad sikandin te buhis.
4 Piru nanengnengan ni Salmanisir ne Hari te Asirya ne mig-akalan de sikandin ni Husiyas su migpakigsabut sikandin ki Su ne Hari te Ihiptu, wey warad e degma migbehey sikandin te buhis din te tagse leg‑un. Purisu imparakep sikandin ni Salmanisir wey impaprisu.
Ka pegkatalu te Samarya
5 Nataman, inlusuran e te Hari te Asirya ka Israil, wey inlingutan dan ka Samarya taman te tatelu ne leg‑un.
6 Ne naahew ni Salmanisir ka Samarya te igkasiyam ne leg‑un te peghari ni Husiyas. Ne impandakep din e ka me matig-Israil wey impanguyan e diye te Asirya, wey impeugpe din sikandan diye te siyudad te Hala, diye te me inged ne ilis te weyig ne Habur ne diye te Gusan, wey ka duma diye te me siyudad te Midiyan.
7 Neyitabu seeye tenged su nakasale ka me matig-Israil te Magbebaye ne Manama ran ne iyan migpalihawang kandan puun te Ihiptu wey migluwas kandan puun te Paraun ne Hari te Ihiptu. Ne migsimba sikandan te duma ne me manama
8 wey mig-ikul te me hinimuwan te me nasud ne imparelrel te Magbebaye te me Israilita puun te tane dan su eyew iyan e egpekeugpe kayi ka me Israilita. Mig-ikul man‑e sikandan te hinimuwan te me Hari te Israil.
9 Ne miggeles-heles sikandan miggimu te igkeepes te Magbebaye ne Manama ran. Te tagse inged, deisek ma wey se dakel, miggimu sikandan te panubaran diye te me bubungan.
10 Migpasasindeg man‑e sikandan te me sungkaleg ne larawan ni Asira diye te me bubungan wey diye te egkaralungan te me kayu.
11 Migtutung sikandan te me insinsu diye te langun ne me panubaran diye te me bubungan iling te inggimu te keet-etawan ne imparelrel te Magbebaye te me Israilita puun te tane dan su eyew iyan e egpekeugpe kayi ka me Israilita. Ne miggimu sikandan te mareet ne me himu ne igkabelu te Magbebaye.
12 Ne migsimba sikandan te me diyus-diyus minsan ke impanpanayan e sikandan te Magbebaye ne kene igpeyimu seeye.
13 Ne impanpanayan te Magbebaye ka Israil wey ka Huda pinaahi te langun ne me prupita wey te me manenagne ne migkahi, “Engkeri niyud e ka maddeet ne hinimuwan niyu. Tumana niyu ka igsuhu ku kaniyu wey ikula niyu ka me tulumanen ne insuhu ku te me kaap-apuan niyu, wey impanulu ku kaniyu pinaahi te me suluhuanen ku ne me prupita.”
14 Piru ware sikandan migpalintutuu. Makehal ka me ulu ran iling te kaap-apuan dan ne ware migpalintutuu te Magbebaye ne Manama ran.
15 Ware dan tumana ka me tulumanen ne impanulu din kandan ne igpeyimu wey imbalahad dan ka kasabutan ne inggimu rin duma te me kaap-apuan dan, wey ka pegpaney-paney rin kandan. Nasi migsimba sikandan te me diyus-diyus ne ware karuan wey neyimu degma sikandan ne ware karuan. Mig-ikul sikandan te batasan te me etew diye te duma ne nasud minsan impanpanayan e sikandan te Magbebaye.
16 Ware dan tumana ka me suhu te Magbebaye ne Manama ran. Miggimu sikandan te larawan te daruwa ne nati te baka wey te sungkaleg ne larawan ni Asira, wey insimba ran si Baal wey ka langun ne bituen diye te aw-awangan.
17 Ne intutung dan ka me anak dan isip igpanubad dan, miggimu sikandan te minsan nekey ne mareet te pegtengteng te Manama, wey migparani sikandan diye te me manenagne wey me timbusawen. Nakapabelu seini te Magbebaye.
18 Tenged te subla ne langet din te me matig-Israil, indeldel rin sikandan. Ne iyan naan de nasame ka me kabuhalan ni Huda.
19 Piru ware ded man‑e migtuman ka me kabuhalan ni Huda te me suhu te Magbebaye ne Manama ran, su nasi de iya sikandan mig-ikul te me matig-Israil.
20 Purisu, in-ang-anggaan e te Magbebaye ka langun ne kabuhalan ni Israil. Imparusaan din sikandan wey impeuripen te me kuntere dan, taman te warad nasame kandan.
21 Te timpu ne impegsuwey te Magbebaye ka migharian te Israil wey ka migharian te Huda, te si Hirubuwam ne anak ni Nibat ka neyimu ne Hari te Israil, sikandin ka egpuunan ne nakapariyu ka me matig-Israil te Magbebaye wey nekeyimu te dakel ne sale.
22 In-ikul te me matig-Israil ka langun ne mareet ne hinimuwan ni Hirubuwam wey migpabulus-bulus sikandan miggimu te mareet.
23 Nataman, mig-ang-anggaan e te Magbebaye ka me matig-Israil sumale te impaney-paney rin kandan pinaahi te me prupita. Purisu naddakep wey neuyan sikandan diye te Asirya wey diye ded sikandan taman kuntee.
Ka peg-ugpe te matig-Asirya diye te Israil
24 Ne in-uyan te Hari te Asirya ka me matig-Babilunya, matig-Kuta, matig-Aba, matig-Hamat, wey matig-Siparbayim eyew igpeugpe diye te me siyudad te Samarya subal te me matig-Israil.
25 Te an-anayan ne peg-ugpe dan diye, ware sikandan migsimba te Magbebaye ne Manama, sikan naa ka migpeuyan ka Magbebaye te me liyun, wey neyimatayan ka duma kandan.
26 Ne due nakahuhud te Hari ne migkahi, “Ka seeye se me etew ne impeuyan nu wey impeugpe nu diye te me lungsud te Samarya, ware nakanengneng ke egmenuwen te pegsimba te manama te sika ne inged. Sikan naa ka migpeuyan ka manama te me liyun wey neyimatayan ka duma kandan, su ware sikandan nakanengneng ke nekey ka egkeilanganen te sika ne manama.”
27 Seeye naa, migsuhu ka Hari te Asirya ne miggenendue, “Paliberi niyu ka Samarya te sabeka te me talagpanubad ne narakep ta, wey diye niyud sikandin peugpaa eyew egpakapanulu te me etew meyitenged te egkeilanganen te manama te seeye ne inged.”
28 Seeye naa ka impalibed dan e diye te Samarya ka sabeka te narakep dan ne talagpanubad, wey diye ipeugpe te Bitil. Ne impanulu din e ka me etew ke egmenuwen te egpamakey ka Magbebaye.
29 Piru minsan pad dutu, ka keet-etawan te duma ne nasud ne diye ipeugpe te me siyudad te Samarya, migpabulus ded migpangimu te me diyus-diyus dan wey diye dan ipanahu te me panubaran diye te me bubungan ne impangimu te me mahinged diye te Samarya.
30 Ne ka me matig-Babilunya, miggimu te diyus-diyus dan ne si Sukut-Binut. Ne ka me matig-Kuta, miggimu te diyus-diyus dan ne si Nirgal. Ne ka me matig-Hamat, miggimu te diyus-diyus dan ne si Asima.
31 Ne ka me matig-Abit, miggimu te diyus-diyus dan ne si Nibhas wey si Tartak. Ne ka me matig-Siparbayim, migtutung te anak dan eyew igpanubad te diyus-diyus dan ne si Adramilik wey si Anamilik.
32 Migsimba sikandan te Magbebaye ne Manama, piru mig-alam ded man‑e sikandan te talagpanubad ne duma ran ded eyew egpanubad diye te me panubaran ne diye te bubungan.
33 Ne minsan iya migsimba sikandan te Magbebaye, migpabulus ded sikandan migsimba te me manama ran iling te inggimu ran diye te me nasud ne impanguyanan kandan.
34 Ne sikan ded ka inggimu ran taman te seini ne timpu.
Ware sikandan migsimba te Magbebaye wey ware sikandan mig-ikul te me balaud ne igpatuman te kabuhalan ni Hakub ne ingngaranan te Israil.
35 Miggimu ka Magbebaye te kasabutan te me matig-Israil wey migsuhu kandan ne migkahi, “Kene kew simba te duma ne me manama, wey ke egpanimbuel naa, wey ke egpamakey naa, wey ke egpanubad naa kandan.
36 Ke kene, sikeddi de simbaa niyu, ka Magbebaye ne migpalihawang kaniyu puun te Ihiptu pinaahi te karesen ku wey te geem ku. Keilangan ne sikeddi de panimbueli niyu wey panubari niyu.
37 Ne tumana niyu layun ka me balaud ku wey me suhu ne insulat ku para kaniyu. Kene kew en iya simba te duma ne me manama.
38 Kene niyu kalingawi ka kasabutan ne inggimu ku duma kaniyu wey kene kew simba te duma ne me manama.
39 Sikeddiey re simbaa niyu, ka Magbebaye ne Manama niyu, eyew egpangabangan ku sikaniyu puun te me kuntere niyu.”
40 Piru ware migpammineg te Magbebaye ka me etew ne migsubal te me matig-Israil diye te Samarya, wey nasi migpabulus miggimu te nabatasan dan e ne eggimuwen.
41 Sikan naa, migsimba sikandan te Magbebaye, wey migsimba red man‑e sikandan te ingkulit dan ne me larawan. Ne sikan ded degma ka eggimuwen te me kabuhalan dan taman kuntee.