21
Ka peghari ni Manasis te Huda
(2 Kru. 33:1-20)
1 Sapulu wey daruwa (12) ka idad ni Manasis te neyimu sikandin ne Hari. Ne mighari sikandin diye te Hirusalim te lalimma ne pulu wey lalimma (55) ne leg‑un. Si Hapsiba ka ngaran te iney rin.
2 Mareet ka hinimuwan din diye te tangkaan te Magbebaye ne Manama iling te hinimuwan te keet-etawan ne impandeldel te Manama te ware pad ka me matig-Israil.
3 Su impasasindeg din iabey ka me panubaran diye te me bubungan ne impandereetan te amey rin ne si Isikiyas. Migpeyimu man‑e sikandin te me altar ne para ki Baal wey te me sungkaleg ne larawan ni Asira iling te hinimuwan ni Ahab ne Hari te Israil. Ne migsimba degma sikandin wey migpamakey te langun ne eglayag diye te langit.
4 Migpasasindeg pad man‑e sikandin te me altar diye te timplu te Magbebaye, ka inged ne migkahi ka Magbebaye, “Kayi re egkabantug te Hirusalim ka ngaran ku.”
5 Ne diye te daruwa ne lama te timplu te Magbebaye, migpeyimu sikandin te me altar te langun ne eglayag diye te langit.
6 Ne minsan ka me anak din, intutung din isip igpanubad. Migpalintutuu man‑e sikandin te manenagne, tumanuren, tahalambusen, wey timbusawen. Mareet ne subla ka inggimu rin diye te tangkaan te Magbebaye wey nabelu ka Magbebaye kandin.
7 Ne ka impeyimu rin ne sungkaleg ne larawan ni Asira, intahu din diye te timplu te Manama, ka timplu ne diye kahii te Magbebaye si Dabid wey ka anak din ne si Sulumun, “Egbantuhen a te ware egtamanan kayi te seini ne timplu wey te Hirusalim, ka inged ne in-alam ku puun te langun ne inged te Israil.
8 Kene ku egpaaween ka me matig-Israil te seini ne tane ne imbehey ku te me kaap-apuan dan ke egtumanen dan ka langun ne me balaud ku, wey ka me tulumanen wey ka me suhu ne impanengneng ku kandan pinaahi ki Muwisis.”
9 Piru newuluan ni Manasis ka keet-etawan te Huda wey te Hirusalim ne eggimu te mareet, wey ka mareet ne inggimu ran labew pad ne mareet du te inggimu te me nasud ne indereetan te Magbebaye te ware pad ka me matig-Israil.
10 Purisu, impakahi te Magbebaye ka me prupita rin,
11 “Lilinditi naan de iya ka hinimuwan ni Manasis ne Hari te Huda, malindit pad du te hinimuwan te me Amurihanen ne nangugpe te seini ne tane te timpu ne ware pad ka me kabuhalan ni Israil. Miggimu man‑e sikandin te me larawan ne iyan egpuunan ne nakasale ka me matig-Huda.
12 Sikan naa, sikeddiey ka Magbebaye ne Manama te Israil ka egdereet te Hirusalim wey te Huda, wey egkaaldek iya ka langun ne egpakarineg kayi.
13 Egdusaan ku ka Hirusalim iling te pegdusa ku te Samarya wey te pamilya ni Hari Ahab. Eglinisan ku ka Hirusalim iling te peglu‑lu te bilu te tangkaan wey peka te palatu.
14 Eg-engkeran ku ka nasame ne keet-etawan ku wey igbehey ku sikandan diye te me kuntere dan. Egpangahawan sikandan wey egpanakawan te karatuan te langun ne me kuntere dan.
15 Egkeyitabu seini kandan su mareet ma ka hinimuwan dan kayi te tangkaan ku wey impeyibelu a nikandan puun pad te peglihawang te kaap-apuan dan te Ihiptu taman kuntee.”
16 Migdalanag diye te intiru ne Hirusalim ka langesa te ware sale ne me etew ne impangimatayan ni Manasis. Ware pad labet te sale ne neyimu rin diye te Huda ne iyan egpuunan ne nakasale ka me matig-Huda diye te tangkaan te Magbebaye.
17 Ka duma pad ne guhuren meyitenged te peghari ni Manasis, wey ka langun ne neyimu rin, lagkes ka neyimu rin ne me sale, nasulat diye te Sulatanan te me Guhuren te me Hari te Huda.
18 Ne migpatey si Manasis wey diye ilebeng te pinamulaan ne egngaranan te Usa ne marani te palasyu rin. Ne iyan migsubal kandin mighari si Amun ne anak din.
19 Daruwa ne pulu wey daruwa (22) ka idad ni Amun te neyimu sikandin ne Hari. Ne mighari sikandin diye te Hirusalim te daruwa ne leg‑un. Si Misulimit ne anak ni Hirus ne matig-Hutba ka iney rin.
20 Mareet ka hinimuwan ni Amun diye te tangkaan te Magbebaye iling te hinimuwan te amey rin ne si Manasis.
21 Iling ded te inggimu te amey rin, insimba rin wey impamakey ka me diyus-diyus ne insimba te amey rin.
22 In-engkeran din ka Magbebaye ne Manama te kaap-apuan din, wey ware din ikula ka igkeupii te Manama.
23 Ne migplanu te mareet ki Amun ka me upisyal rin wey inggimatayan dan sikandin diye te palasyu rin.
24 Piru impangimatayan te keet-etawan te Huda ka langun ne miggimatey ki Hari Amun. Ne si Husiyas e ne anak din ka impasubal ran kandin paharia.
25 Ka duma ne neyitabu te peghari ni Amun wey ka langun ne neyimu rin, nasulat diye te Sulatanan te me Guhuren te me Hari te Huda.
26 Ne inlebeng si Amun diye te pinamulaan ne egngaranan te Usa, wey si Husiyas ne anak din ka migsubal kandin mighari.