22
Ka peghari ni Husiyas te Huda
(2 Kru 34:1-2)
1 Walu pad ka idad ni Husiyas te migbunsud sikandin mighari. Ne mighari sikandin te Hirusalim te tatelu ne pulu wey sabeka (31) ne leg‑un. Si Hidida ne anak ni Hadaya ne matig-Buskat ka iney rin.
2 Meupiya ka hinimuwan din diye te tangkaan te Magbebaye ne Manama, wey mig-ikul sikandin te inggimu te kaap-apuan din ne si Dabid, wey eleg layun ka eggimuwen din.
Nakita ka libru ne insulatan te balaud
(2 Kru 34:8-28)
3 Te igkasapulu wey walu (18) ne leg‑un te peghari ni Husiyas, impeendiye din te timplu si Sapan ne sikritari rin ne anak ni Asaliya wey apu ni Misulam. Ne ingkahiyan te Hari si Sapan,
4 “Hendiye ka ki Hilkiyas ka Labew ne Talagpanubad wey ipaseel nu kandin ka seleppi ne egpuun te me etew ne nalimud te me Libita ne talagbantey te gumawan te timplu.
5 Ne ibehey nu naa sika diye te me etew ne impiyalan ne egpangulu te peg-ayad-ayad te timplu te Magbebaye su eyew sikandan e ka e egbayad te me trabahanti ne mig-ayad-ayad wey migbalew-balew te timplu,
6 te me panday, te me talagbebaley, wey te me masun. Ne ka duma ne seleppi, ipabeli nu te impanapsapsapan ne me batu wey kayu ne eggamiten te peg-ayad-ayad te timplu.
7 Ne kene nud e sikandan pamitawi te listaan te nahastuwan dan su egkasalihan ma sikandan.”
8 Ne intuman iya ni Sapan ka ingkahi kandin te Hari. Ne ingguhuran e ni Hilkiyas ne Labew ne Talagpanubad si Sapan ne sikritari te Hari te migkahi, “Nakita ku ka libru te Balaud diye te timplu te Magbebaye.” Ne imbehey e ni Hilkiyas seeye diye ki Sapan wey imbasa rin e seini.
9 Ne miglibed e si Sapan diye te Hari wey ingguhuran din e te migkahi, “Ingkuwe e te me suluhuanen nu ka seleppi ne inlimud diye te timplu wey imbehey e diye te me etew ne impiyalan ne egpangulu te peg-ayad-ayad te timplu te Magbebaye.”
10 Ne migkahi pad man‑e sikandin, “Due imbehey keddi ni Hilkiyas ne libru.” Ne imbasa rin seini diye te tangkaan te Hari.
11 Te pegkarineg te Hari te nasulat te libru te balaud, inggisi din e ka insaluub din te pegkalaggew rin.
12 Ne imbanasalan te Hari si Hilkiyas ne talagpanubad, si Ahikam ne anak ni Sapan, si Akbur ne anak ni Mikayas, si Sapan ne sikritari wey si Asayas ne suluhuanen din te migkahi,
13 “Hipanew kew wey panginginse kew te Magbebaye para keddi wey para te langun ne keet-etawan te Huda meyitenged te me lalag ne nasulat te seini ne libru. Nabelu-belu ka Magbebaye kanta tenged su ware tumana te kaap-apuan ta ka nasulat te seini ne baseen.”
14 Purisu miggendiye si Hilkiyas, si Ahikam, si Akbur, si Sapan, wey si Asiyas, te sabeka ne prupita ne malitan ne si Hulda ne diye mig-ugpe te Hirusalim. Si Hulda asawa ni Salum ne anak ni Tikbas, ne anak ni Harhas. Si Salum ka talagbantey dengan te me manggad diye te timplu wey ke me manggad naa te Hari. Ne ingguhuran dan e si Hulda te tuyu dan.
15 Ne ingkahiyan sikandan ni Hulda, “Guhuri niyu ka etew ne migpeendini kaniyu te seini ka ingkahi te Magbebaye, ka Manama te Israil,
16 ‘Egdereetan ku ka seini ne inged wey ka nangugpe kayi. Igpaneem-neem ku kandan ka langun ne lalag ne nasulat diye te libru ne imbasa diye te Hari te Huda.
17 Su in-engkeran e ma nikandan wey migpanubad e sikandan diye te me diyus-diyus. Nalangetan a tenged te immangimu ran. Purisu igpaneem-neem ku te seini ne inged ka langet ku ne mangune-kune wey ware egpakabalabag keddi.
18 Piru pangguhuri niyu ka Hari te Huda ne migpeendini kaniyu eyew te pegpanginginse te Magbebaye te seini ka inlalag te Magbebaye, ka Manama te Israil meyitenged te me lalag ne narineg din:
19 Puun su nekegsendit ke ma wey migpariralem ka te pegkeetew nu kayi te tangkaan ku te pegkarineg nu te pegbebantak ku te seini ne inged wey te nangugpe kayi, wey inggisi nu ka insaluub nu tenged te pegkalaggew nu, wey migsinehew ka kayi te tangkaan ku, egpamminehen ku ka peg-ampu nu.
20 Purisu, taheed te neuyag ke pad, kene ku igpeyinguma ka mareet ne ingkahi ku meyitenged te seini ne inged; kene nu egkakita ka karereetan ne igpeuyan ku te seini ne inged, wey egpatey ka ne malinawen duma te me kaap-apuan nu.’ ”
Ne ingguhuran dan e ka Hari te tabak ni Hulda.