Libitiku
Igpewun‑a
Ka kaluwasan te Libitiku iyan ka “Ka in-umew rin” ne iyan ka me talagpanubad eyew te pegpatuman te me balaud ne imbehey te Manama kandan.
Impalintutuuwan te me etew ne si Muwisis ded ka migsulat te seini ne libru diye te Bubungan ne Sinay te timpu te nangekampu sikandan diye, su egkabasa seini diye te: 1:1, 4:1, 6:1,24, wey te 8:1.
Ka Libitiku ne baseen meyitenged seini te eleg ne egbatasanen te me kabuhalan ni Israil eyew eg-isipen sikandan ne malinis te Manama. Ka sabeka ne paahi ne eg-isipen sikandan ne malinis te Manama iyan ka pegpanubad te igkeupii te Manama.
Ne eyew egkaay-ayaran iya ka pegpanubad, mig-alam ka Manama te etew ne si Aarun wey te me kabuhalan din.
Ka nenasulat te seini ne baseen
Ka me balaud meyitenged te me halad wey te me pegpanubad 1:1–7:38
Ka peghalad engki Aarun wey te me anak din ne me lukes eyew egkeyimu ne me talagpanubad 8:1–10:20
Ka me balaud meyitenged te peglinis wey te kene ne malinis 11:1–15:33
Ka aldew te pegpasaylu te sale 16:1-34
Ka me balaud meyitenged te pegpamatulus te pegkeetew wey te pegsimba 17:1–27:34
1
Ka egtutungen ne igpanubad
1 In-umew te Magbebaye ne Manama si Muwisis diye te Balungbalung ne Temuwanan wey ingkahiyan,
2 “Kahii nu ka me kabuhalan ni Israil ne emun ke due egpanubad te mananap diye te Magbebaye, keilangan ne iyan din igpanubad ka karniru, wey ke kambing naa.
3 Ke baka ka igkeupii rin ne igpanubad eyew egtutungen, keilangan ne turu seini ne ware nabalbalangi. Igpanubad din sika ne baka diye te gumawan te Balungbalung ne Temuwanan eyew egdawaten te Magbebaye.
4 Igdagket din ka palad din diye te ulu te baka ne egtutungen ne igpanubad wey egdawaten te Magbebaye ka pegpalangesa eyew iglinis te sale.
5 Ne eggilangen din ka turu ne baka diye te tangkaan te Magbebaye. Ne ka langesa rue, iglingut igsawig te me talagpanubad ne me kabuhalan ni Aarun diye te altar ne eg-unturan te igpanubad, ne diye te gumawan ne egkatangkaan te Balungbalung ne Temuwanan.
6 Ne egluwitan te migpanubad ka mananap wey egpanggupalen din e seini.
7 Ne egtetemeg e diye te altar ka me talagpanubad ne kabuhalan ni Aarun wey eg-ay-ayaran dan te egtemeg ka me kayu.
8 Ne igpaayad-ayad dan e igpanahu diye te altar ne intemehan ka impanggupal ran wey iglagkes dan degma ka ulu wey ka tabe.
9 Piru eglu‑luan pad te etew ne egpanubad ka me tahu te getek wey ka me paa te baka. Mesi egkeimpusan e, egtutungen e te talagpanubad ka intiru ne igpanubad diye te altar, wey meemut ka lansi due diye te Magbebaye ne Manama.
10 “Ne emun ke karniru wey ke kambing naa ka egtutungen ne igpanubad te sabeka ne etew, keilangan ne lukesan seini wey ware nabalbalangi.
11 Eggilangen din seini diye te igkahibang ne balabahan te altar ne tutunganan te igpanubad ne diye te tangkaan te Magbebaye. Ne ka langesa te sika ne igpanubad, igsawig diye te me kakiliran te altar te me talagpanubad ne me kabuhalan ni Aarun.
12 Ne egpanggupalen e seini te etew ne egpanubad wey egpaay-ayaran e seini igpanahu te me talagpanubad diye te altar ne intemehan wey iglagkes dan degma ka ulu wey ka tabe.
13 Piru eglu‑luan pad te etew ne egpanubad ka me tahu te getek wey ka me paa te karniru. Ke egkeimpusan e, egtutungen e te talagpanubad ka intiru ne igpanubad diye te altar, wey meemut ka lansi due diye te Magbebaye ne Manama.
14 “Emun ke manuk-manuk ka egtutungen ne igpanubad te sabeka ne etew, keilangan ne selepati seini wey ke tukmu naa.
15 Eg-uyanen seini te talagpanubad diye te altar wey eggulibiren din ka lieg taman te egkatempug, ne egtutungen din e ka ulu diye te altar ne eg-unturan te egtutungen. Ne igpatihis din ka langesa diye te kakiliran te altar.
16 Ne egpamulbulan din seini wey eg-aween din ka abenan wey igdegpak din seini diye te tahuanan te abu ne diye te lenged te altar dapit te igsile.
17 Egpeglimangen din te eggen-gen ka pakpak wey egbintengen din seini taman te egkapekang, piru kene din de egpeteen. Ne egtutungen din e seini langun diye te altar ne eg-unturan te egtutungen, wey meemut ka lansi due diye te Magbebaye ne Manama.”