2
Ka peghalad te egkakeen diye te Magbebaye
1 “Ke due egkeupian ne eghalad diye te Magbebaye ne Manama te egkakeen, keilangan ne amana ne meupiya ka harina ne ighalad din wey eg-itisan din sika te mentika wey egsewuhan din te meemut ne insinsu.
2 Ne eg-uyanen din sika diye te me talagpanubad ne me kabuhalan ni Aarun. Ne eggamak ka talagpanubad te harina ne amana ne meupiya ne insewuhan te mentika wey te langun ne insewug ne meemut ne insinsu. Ne egtutungen sika diye te altar isip pegsuman-suman te Magbebaye, wey meemut sika diye te Magbebaye.
3 Ka egkasame te inhalad, kandan e te me talagpanubad ne me kabuhalan ni Aarun wey amana ne matulus sika su baad ma te inhalad diye te Magbebaye.
4 “Ke due eghalad te paan ne inggilutu diye te hilutuanan te paan, keilangan ne iyan din eggilutuen ka harina ne amana ne meupiya wey kene egsewuhan te patulin. Egkaayun ne ighalad ka makepal ne paan ne insewuhan te mentika wey ke manipis naa ne paan ne inlakulasan te mentika.
5 Ne emun ke due eghalad te paan ne diye hilutua te kale, keilangan ne iyan din eggilutuen ka harina ne amana ne meupiya ne insewuhan te mentika piru ware sewuhi te patulin.
6 Egteptepiken din sika wey eg-itisan te mentika—sika ka egkakeen ne ighalad.
7 “Ke diye hilutua te kale ka paan ne ighalad, keilangan ne iyan eggilutuen ka harina ne amana ne meupiya wey egsewuhan te mentika.
8 Eg-uyanen din seini diye te talagpanubad wey ka talagpanubad e ka eg-uyan due diye te altar ne eg-unturan te egtutungen eyew ighalad diye te Magbebaye.
9 Ne egkuwa ka talagpanubad te seeye se paan ne inhalad e wey egtutungen din seini eyew te pegpapitew ne ka langun nakahalad e te Magbebaye, wey meemut sika diye te Magbebaye.
10 Ka egkasame te ighalad, kandan e te me talagpanubad ne me kabuhalan ni Aarun wey matulus seini su baad ma te inhalad diye te Magbebaye.
11 “Ka langun ne egkakeen ne ighalad, keilangan ne ware patulin, su kene kew egkaayun ne egtutung te patulin wey ke teneb naa ke eghalad kew diye te Magbebaye.
12 Egkaayun ne ighalad niyu diye te Magbebaye ka an-anayan ne me behas te me pinamula niyu piru kene egkaayun ne egtutungen sika diye te altar isip halad ne meemut.
13 Asini niyu ka langun ne egkakeen ne ighalad. Keilangan ne kene egkaawe ka asin su ka asin palinneu te kasabutan niyu te Magbebaye.
14 “Ke eghalad kew diye te Magbebaye te an-anayan ne me behas te egketuen ne me pinamula, iyan niyu ihalad ka inggaling wey ke insandag naa ne me trigu.
15 Itisi niyu sika te mentika wey sewuhi niyu te meemut ne insinsu. Sika ka egkakeen ne ighalad.
16 Ne egtutungen te talagpanubad ka duma ne inggaling ne egpuun te egkakeen ne ighalad ne insewuhan te mentika lagkes ka langun ne meemut ne insinsu ne insewug. Egtutungen sika ne ighalad eyew te pegpapitew ne ka langun nakahalad e diye te Magbebaye.”