13
Ka me tulumanen meyitenged te dalu te laplap
1 Ne migkahiyan te Magbebaye ne Manama si Muwisis wey si Aarun,
2 “Ke due etew ne due miglebag diye te laplap din, wey ke miglambetug naa wey ke migkekehang naa, ne hendue te egkeyimu ne ibung, keilangan ne eg-uyanen sikandin diye te talagpanubad ne si Aarun wey ke diye naa te sabeka te me talagpanubad ne me kabuhalan din.
3 Ne egpitawen te talagpanubad ka migbubusuwak. Ne emun ke migmaangkag e ka me bulbul diye te intubuan te busuwak, wey mig-ugseb e seini diye te sapu, ibung naa sika. Ne igpanengneng din e seini wey eg-isipen e ne malindit ka ibungen.
4 Piru ke migbubusuwak ka laplap din wey ware ded mig-ugseb ka miglebag diye te sapu wey ware migmaangkag ka bulbul dutu, igpasuwey te talagpanubad sikandin igpeugpe te pitu ne aldew.
5 Te igkapitu e ne aldew, egpitawen e man‑e te talagpanubad ka miglebag. Ne emun ke egkakita te talagpanubad ne ware seini migdalapdap, igpasuwey pad man‑e sikandin igpeugpe te talagpanubad puun te me etew te pitu e man‑e ne aldew.
6 Te igkapitu e ne aldew, egpitawen e man‑e sikandin te talagpanubad. Ne emun ke migkiles e wey ware migdalapdap ka miglebag, igpanengneng e te talagpanubad ne eg-isipen e ne malinis ka seeye ne etew su me busuwak de seini. Keilangan ne egpi‑pian e te etew ka insaluub din, wey eg-isipen e sikandin ne malinis.
7 Piru ke egdalapdap ka migbubusuwak diye te laplap din, keilangan ne egpapitew pad man‑e sikandin te talagpanubad minsan ke nakapanengneng e sikandin ne malinis e.
8 Ne egpitawen e man‑e sikandin te talagpanubad. Ne emun ke malehet ne migdalapdap ka migbubusuwak, igpanengneng te talagpanubad ne due ibung din wey eg-isipen e sikandin ne malindit.
9 “Ke due etew ne due dalu te laplap ne hendue te ibung, keilangan ne eg-uyanen sikandin diye te talagpanubad.
10 Ne emun ke egkakita te talagpanubad ne due migbubusuwak diye te miglebag ne iyan egpuunan ne migmaangkag ka me bulbul, wey egkakite e ka sapu,
11 ibung naa sika ne naluhey e diye te kandin. Ne igpanengneng e te talagpanubad ne due ibung din wey eg-isipen e ka sika ne etew ne malindit. Kenad igpasuwey sikandin, su natuenan e ne eg-isipen iya sikandin ne malindit.
12 Piru emun ke egkakita te talagpanubad ne migdalapdap e amana ka dalu te laplap diye te intiru ne lawa te etew—puun te ulu peendiye te paa,
13 keilangan ne eg-abayan egpitawa eg-ay-ayari te talagpanubad. Ne emun ke malehet ne migdalapdap e amana ka dalu te laplap din wey migbubusuwak e ka langun ne laplap din, igpanengneng te talagpanubad ne eg-isipen e sikandin ne malinis su busuwak de.
14 Piru ke egkakita ne migleput e ka sapu din, eg-isipen e sikandin ne malindit.
15 Piru ke pegpitew te talagpanubad ne migleput ka sapu, igpanengneng din e ne eg-isipen sikandin ne malindit su due dalu rin ne malindit su migleput ka sapu ne iyan palinneu te ibung ne dalu.
16 Piru ke egkabalbalawan e ka pali wey migmaangkag e, keilangan ne egpapitew man‑e sikandin te talagpanubad.
17 Ne eg-abayan e man‑e sikandin te egpitew te talagpanubad. Ne emun ke migmaangkag e ka pali, igpanengneng e te talagpanubad ne eg-isipen e sikandin ne malinis.
18 “Ke due etew ne due buu ne neulian e,
19 wey miglebag e seini wey ke migbubusuwak naa, keilangan ne igpapitew rin seini diye te talagpanubad.
20 Ne keilangan ne egpitawen seini te talagpanubad. Ke egkakita rin ne mig-ugseb e seini diye te sapu wey migmaangkag e ka bulbul, igpanengneng te talagpanubad ne eg-isipen ne malindit ne etew sikandin su due ibung din ne migbubusuwak.
21 Piru ke egkakita te talagpanubad ne ware mig-ugseb diye te sapu wey ware degma migmemaangkag ka bulbul te intubuan, ne bayew e neuli, igpasuwey sikandin te talagpanubad puun te me etew te pitu ne aldew.
22 Ne emun ke migdalapdap seini diye te laplap din, igpanengneng te talagpanubad ne due dalu rin wey eg-isipen e ne malindit; su sika ka palinneu ne due dalu rin ne makaaldek-haldek.
23 Piru ke ware seini migdalapdap, wey migbebateg de ka intubuan te buu, keilangan ne igpanengneng te talagpanubad ne eg-isipen sikandin ne malinis.
24 “Ne emun ke due etew ne natutung ka laplap wey migmalalab e ka sapu wey ke migbubusuwak naa,
25 keilangan ne igpapitew seini te talagpanubad. Ne emun ke mig-ugseb seini diye te sapu wey migmaangkag e ka me bulbul, ibung naa sika ne diye migtubu te natutung ne laplap. Ne igpanengneng te talagpanubad ne eg-isipen e sikandin ne malindit su due dalu rin ne ibung.
26 Piru emun ke egkakita te talagpanubad ne ware seini mig-ugseb diye te sapu wey ware migmemaangkag ka me bulbul te natutung ne laplap wey bayew e neulii, igsuwey sikandin te talagpanubad puun te me etew te pitu ne aldew.
27 Te igkapitu e ne aldew, eg-abayan e man‑e sikandin egpitawa te talagpanubad. Ne emun ke migdalapdap e ka migbubusuwak diye te laplap din, igpanengneng e te talagpanubad ne due ibung din wey eg-isipen e sikandin ne malindit su duen e ibung din.
28 Piru ke ware migdalapdap wey ke migkiles e seini, miglebag de ka natutung ne laplap. Ne igpanengneng e te talagpanubad ne eg-isipen e sikandin ne malinis su migbebateg de ka natutung.
29 “Ke due lukes wey ke malitan naa ne due migtubu ne dalu te laplap diye te ulu wey ke diye naa te bake,
30 keilangan ne igpapitew rin seini te talagpanubad. Ne emun ke mig-ugseb e seini diye te sapu wey migmakalawag e ka bulbul rin wey migmahalat e, igpanengneng te talagpanubad ne eg-isipen ka sika ne etew ne malindit su due ibung ne migtubu diye te ulu rin wey ke bake din naa.
31 Ne emun ke egkakita te talagpanubad ne ware mig-ugseb diye te sapu ka migtubu ne dalu te laplap wey warad meitem ne bulbul wey ke sumpe naa, igpasuwey te talagpanubad ka etew ne due migtubu ne dalu te laplap te pitu ne aldew.
32 Te igkapitu e ne aldew, egpitawen e man‑e te talagpanubad ka migtubu ne dalu te laplap. Ne emun ke ware seini migdalapdap wey ware migmakalawag ka bulbul wey ke sumpe naa, wey ware man‑e seini mig-ugseb te sapu,
33 eg-eabulug sikandin wey ke egpanumpe naa piru kene din iglagkes ka intubuan te dalu te laplap. Ne iglein sikandin te talagpanubad te pitu e man‑e ne aldew.
34 Te igkapitu e man‑e ne aldew, egpitawen e man‑e te talagpanubad ka migtubu ne dalu te laplap. Ne emun ke ware seini migdalapdap wey ware mig-ugseb te sapu, igpanengneng e te talagpanubad ne eg-isipen e sikandin ne malinis. Ne egpi‑pian din e ka insaluub din, wey eg-isipen e sikandin ne malinis.
35 Piru ke migdalapdap ka migtubu ne dalu te laplap din minsan impakapanengneng e sikandin ne malinis,
36 egpitawen sikandin eg-abayi te talagpanubad. Ne emun ke malehet ne migdalapdap ka kehang diye te laplap din, eg-isipen e sikandin ne malindit. Kenad keilangan ne egpamitew pad ka talagpanubad te bulbul ne egmakalawag.
37 Piru emun ke egkakita te talagpanubad ne ware migdalapdap ka migtubu ne dalu te laplap, wey migtubu e ka meupiya ne bulbul rin wey ke sumpe din naa, neulian naan e seini. Ne igpanengneng e te talagpanubad ne eg-isipen e sikandin ne malinis.
38 “Ke due lukes wey ke malitan naa ne due pamuti diye te laplap din,
39 keilangan ne igpapitew rin seini diye te talagpanubad. Ne emun ke kenad egkamelmelehan ka pamuti, me kaliskis de seini ne miglepew. Eg-isipen ka sika ne etew ne malinis.
40 “Ke egkaluluwan ka bulbul te sabeka ne lukes wey egkeupew e sikandin, eg-isipen ded sikandin ne malinis.
41 Ke egkaluluwan ka panabas din, eg-isipen ded man‑e sikandin ne malinis.
42 Piru ke due egmalalab ne egbubusuwak diye te naluluwan ne ulu rin, ibung naa seini ne migtubu diye.
43 Ne keilangan ne egpitawen sikandin te talagpanubad, ne emun ke egmalalab wey egmaangkag iling te ibung ka migbubusuwak diye te ulu rin,
44 ibung naa iya sika. Keilangan ne igpanengneng te talagpanubad ne eg-isipen sikandin ne malindit su due dalu te laplap ne migtubu diye te ulu rin.
45 “Ne ka ibungen ne etew, keilangan ne egsaluub te nahisi ne kumbale wey kene egpanugkad wey egdingdingan din ka be‑be din, wey egpanguleyi sikandin ne egkahi, ‘Malindit a! Malindit a!’
46 Eg-isipen sikandin ne malindit taman te kene pad egkeulian ka dalu rin. Ne keilangan ne egsuwey-suwey sikandin wey diye sikandin eg-ugpe te lihawangan te kampu.”
Ka balaud meyitenged te abungew
47 “Ke due abungew diye te kumbale wey ke diye naa te hinabel
48 ne inhabel puun te minsan nekey, puun te bulbul te ayam, wey ke diye naa te laplap te ayam, wey ke diye naa te minsan nekey ne inggimu puun te laplap te ayam,
49 ne migmeilem-ilem naa wey ke miglahem naa, abungew seini ne migdalapdap, wey keilangan ne igpapitew seini diye te talagpanubad.
50 Ne keilangan ne egpitawen te talagpanubad ka in-abungew, wey iglein din igtahu seini te pitu ne aldew.
51 Te igkapitu e ne aldew, eg-abayan seini egpitawa te talagpanubad. Ne emun ke migdalapdap ka abungew diye te hinabel, diye te inhabel puun te minsan nekey, wey ke diye naa te laplap te ayam, malehet naa seini ne abungew ne egpakarereet wey eg-isipen sika ne malindit.
52 Ne keilangan ne egtutungen te talagpanubad ka manggad, wey ke seeye naa se inhabel puun te minsan nekey, wey ke seeye naa se egpuun te bulbul te ayam, wey ke seeye naa se hinabel, wey ke seeye naa se minsan nekey ne inggimu puun te laplap te ayam, su abungew seini ne egpakarereet.
53 “Piru emun ke egkakita te talagpanubad ne ware migdalapdap ka abungew te minsan nekey ne kumbale,
54 egpapi‑pian din ka minsan nekey ne in-abungew wey iglein igtahu seini seled te pitu e man‑e ne aldew.
55 Egkataman, eg-abayan seini egpitawa te talagpanubad. Ke migmeilem ded wey miglahem ded ka manggad minsan napi‑pian e, eg-isipen ne malindit seini minsan ke ware migdalapdap ka abungew. Sikan naa, keilangan ne egtutungen e seini minsan ke iyan de in-abungew ka diye te tangkaan wey ke diye naa te peka.
56 Piru emun ke egkakita te talagpanubad ne kenad e egkamelmelehan ka abungew, te napengaan e te egpi‑pi ka manggad, egbindasen din ka in-abungawan diye te manggad wey ke diye naa te laplap te ayam, wey ke diye naa te inhabel puun te minsan nekey.
57 Piru ke eglibed ded wey egdalapdap ded ka abungew diye te kumbale, wey ke diye naa te inhabel puun te minsan nekey, wey ke diye naa te laplap te ayam, keilangan ne egtutungen e seini.
58 Piru ke naawe e ka abungew diye te manggad, wey ke diye naa te inhabel puun te minsan nekey, wey ke diye naa te laplap te ayam, te napi‑pian e ka manggad, egpi‑pian pad man‑e eg-abayi seini, wey eg-isipen e seini ne malinis.”
59 Sika iya ka tulumanen meyitenged te abungew diye te kumbale eyew egkanengnengan ke eg-isipen ne malinis wey ke malindit naa ka minsan nekey ne hinabel ne inggimu puun te bulbul te ayam, wey ke hinabel naa, wey ke inhabel naa puun te minsan nekey, wey ke minsan nekey ne inggimu puun te laplap te ayam.