14
Ka tulumanen te peglinis te ibungen
1 Ne ingkahiyan e man‑e te Magbebaye ne Manama si Muwisis,
2 “Seini ka me tulumanen te peglinis te etew ne neulian te ibung. Te aldew te peglinis kandin, igpapitew sikandin diye te talagpanubad.
3 Ne eglihawang diye te kampu ka talagpanubad eyew te pegpitew kandin. Ne emun ke egkakita te talagpanubad ne neulian en iya ka etew,
4 egpaangayen sikandin te seini: daruwa ne manuk-manuk ne neuyag pad wey in-isip ne malinis, sabeka ne sugpang te sidar, malalab-lalab ne hiket, wey sugpang te isupu.
5 Egkataman, igpahilang te talagpanubad ka sabeka ne manuk-manuk diye te ampew te kuren ne tane ne inweyihan te egpuun te sebseb.
6 Ne egbalakesen te talagpanubad te eggen-gen ka neuyag pad ne manuk-manuk, ka sugpang te sidar, ka malalab-lalab ne hiket, wey ka sugpang te isupu, wey ig-eled din seini diye te langesa te manuk-manuk ne nakaampew te weyig diye te kuren.
7 Ne egpabesikan din te langesa te kapapitu ka etew ne eglinisan. Pegkapenga kayi, igpanengneng din e ka etew ne malinis e, wey eglekaan din e ka sabeka ne manuk-manuk.
8 Ne egpi‑pian te etew ka insaluub din wey egkahisen din ka langun ne bulbul rin, wey egpamanihus sikandin. Ne puun due, eg-isipen e sikandin ne malinis wey egpakaseled e diye te kampu, piru diye pad sikandin eg-uugpe te lihawangan te Balungbalung din te pitu ne aldew.
9 Emun ke egpitu e ne aldew, eg-abayan din e man‑e te egkahis ka langun ne bulbul rin, ka sumpe din, wey kiley rin. Egpi‑pian din man‑e ka insaluub din wey egpamanihus man‑e sikandin, wey egmalinis e man‑e sikandin.
10 “Te igkawalu e ne aldew, keilangan ne eg-uyan sikandin te daruwa ne lukesan ne nati te karniru, wey sabeka ne beyan ne nati te karniru ne sabeka pad ne leg‑un wey ware nabalbalangi. Eg-uyan man‑e sikandin te tatelu ne kilu ne harina ne amana ne meupiya ne insewuhan te mentika, wey senge-ubab man‑e ne mentika.
11 Ne ka talagpanubad ne egpanengneng te malinis e ka etew, iyan eg-uyan te sika ne etew duma te langun ne igpanubad diye te gumawan te Balungbalung ne Temuwanan.
12 Egkataman, egkuen te talagpanubad ka sabeka ne lukesan ne karniru wey ka senge-ubab ne mentika, wey igpanubad eyew igbayad te sale. Ne igkayew rin seini diye te tangkaan te Magbebaye ne Manama eyew igdasag ne egkayawen.
13 Ne eggilangen din ka nati te karniru diye te gilanganan ne in-isip ne matulus ne eggilangan te ig-awe te sale wey te egtutungen ne igpanubad. Amana red degma ne matulus ka igpanubad ne igbayad te sale iling te igpanubad ne iglinis te sale, wey iyan egpakakamuney ka talagpanubad.
14 Egkataman, egkuwa ka talagpanubad te langesa te karniru ne igpanubad wey egpulitan din ka sesel-ayan te igkakawanan ne talinga te etew ne eglinisan, wey iglagkes degma ka timbebakal te kawanan ne belad wey paa te etew.
15 Egkuwa degma ka talagpanubad te mentika ne diye te ubab wey ig-itis din diye te gibang ne palad din,
16 ig-eled din dutu ka kemel te igkakawanan ne belad din, wey igpatihis din e seini te kapapitu diye te tangkaan te Magbebaye ne Manama.
17 Ne ka same te mentika ne diye te palad din, ig-ampew rin igpulit diye te langesa ne impulit din diye te sesel-ayan te igkakawanan ne talinga te etew ne eglinisan, wey iglagkes din degma ka timbebakal te kawanan ne belad wey paa te etew.
18 Ne ka langun ne nasame te mentika ne diye te palad te talagpanubad, igpulit din diye te ulu te etew ne eglinisan. Ne egpalangesaan sikandin te talagpanubad eyew iglinis te sale din diye te tangkaan te Magbebaye ne Manama.
19 “Ne igpanubad te talagpanubad ka igpalangesa eyew iglinis te kalindit te etew. Pegkapenga kayi, eggilangen din ka egtutungen ne igpanubad
20 wey igpanubad din e diye te altar lagkes ka egkakeen ne ighalad. Ne egpalangesa ka talagpanubad eyew iglinis te sale te etew wey eg-isipen e sikandin ne malinis.
21 “Piru ke egkaayu-ayu sikandin wey kene egpakabehey te seeye ne igmanubad, egkaayun ne iyan din de igbehey ka nati te karniru eyew igbayad te sale. Egkayawen seini eyew iglinis te sale. Egpakabehey re degma sikandin te sabeka ne kilu te harina ne amana ne meupiya ne insewuhan te mentika eyew ighalad, wey senge-ubab te mentika.
22 Ne egkaayun ne egbehey man‑e sikandin te daruwa ne tukmu wey ke daruwa naa ne selepati ke hendei ka egkaayunan din: ka sabeka para te igpalangesa ne ig-awe te sale, wey ka sabeka, igpanubad ne egtutungen.
23 Te igkawalu e ne aldew, eg-uyanen din seini langun diye te talagpanubad ne eglinis kandin diye te gumawan te Balungbalung ne Temuwanan diye te tangkaan te Magbebaye ne Manama.
24 Ne egkuen te talagpanubad ka nati te karniru ne igpanubad eyew igbayad te sale wey ka senge-ubab ne mentika, wey egkayawen din seini diye te tangkaan te Magbebaye eyew igdasag ne egkayawen.
25 Egkataman, eggilangen din ka nati te karniru ne igpanubad eyew igbayad te sale. Egkuwa sikandin te langesa wey igpulit din diye te sesel-ayan te kawanan ne talinga wey diye te timbebakal te kawanan ne belad wey paa te etew ne eglinisan.
26 Egtahuan degma te talagpanubad ka igkahibang ne palad din te mentika ne diye te ubab,
27 ig-eled din te mentika ka kemel te igkakawanan ne belad din wey igpatihis din e seini te kapapitu diye te tangkaan te Magbebaye ne Manama.
28 Ne ka same te mentika ne diye te palad din, ig-ampew rin igpulit diye te langesa ne impulit din diye te sesel-ayan te igkakawanan ne talinga te etew ne eglinisan wey iglagkes degma ka timbebakal te kawanan ne belad wey paa rin.
29 Ne ka langun ne nasame te mentika ne diye te palad te talagpanubad, igpulit din diye te ulu te etew ne eglinisan. Ne egpalangesa ka talagpanubad eyew iglinis te sale te etew diye te tangkaan te Magbebaye ne Manama.
30 Ne egpanubad ka etew te daruwa ne tukmu wey ke daruwa naa ne selepati ke hendei ka igpakabehey rin:
31 ka sabeka, igpalangesa eyew ig-awe te sale, wey ka sabeka, egtutungen ne igpanubad ne eglagkesan te egkakeen ne ighalad. Ne egpalangesa ka talagpanubad diye te tangkaan te Magbebaye ne Manama eyew iglinis te sale te etew ne eglinisan.
32 Sika ka me tulumanen te etew ne due ibung, ke ware ayam ne igpanubad ne igpakabehey rin eyew egkalinisan sikandin.”
Ka peglinis te abungew diye te baley
33 Ne migkahiyan te Magbebaye ne Manama si Muwisis wey si Aarun,
34 “Emun ke egpekeuma kew e te inged te Kanaan ne igbehey ku kaniyu, wey ke due baley diye ne egpaabungawan ku,
35 keilangan ne eggendiye te talagpanubad ka mahinged dutu wey igpangguhud kandin ka abungew.
36 Ne egpitawen e te talagpanubad ka baley wey egnengnengan ka abungew. Piru te kene pad sikandin eglasud te baley, igpalihawang din pad ka langun ne diye te seled eyew kene eg-isipen ne malindit.
37 Emun ke diye te alabat ka abungew wey migmeilem wey migmalalab ka migkepkep diye te me alabat,
38 eglihawang sikandin te baley wey eglekeban din seini wey kene eglukatan taman te pitu ne aldew.
39 Te igkapitu ne aldew, egpitawen din e man‑e seini. Ne emun ke migdalapdap e ka abungew diye te me alabat,
40 igpalekat din seeye se me batu ne in-alabat ne in-abungew wey igparegpak diye te lihawangan te siyudad ne egdegpakan te langun ne in-isip ne malindit.
41 Egkataman, egpakahisan din langun ka seled te alabat wey igparegpak dan ka kinahis diye te lihawangan te siyudad ne degpakanan te malindit.
42 Ne egkuwa man‑e sikandan te lein ne me batu ne igliwan te me batu ne in-awe, eg-akeban dan te egpulit ka alabat ne nakahisan.
43 “Ke eglibed ka abungew te naawe e ka batu, wey nakahisan e wey napulitan e,
44 eggendiyaan e man‑e seeye te talagpanubad wey egpitawen e man‑e. Ke migdalapdap e ka abungew diye te baley, abungew naa seini ne egpakarereet su eglibed-libed, wey eg-isipen ne malindit seini ne baley.
45 Purisu, igpahuhus din ka baley wey igparegpak ka langun-langun diye te lihawangan te siyudad, diye te degpakanan te eg-isipen ne malindit.
46 Ne minsan hentew ne egseled te seeye ne baley ne inlekeban pad, eg-isipen ne malindit taman te egkasagkup,
47 wey minsan hentew ne eglipereng wey ke egkeen naa diye te seled te sika ne baley, keilangan ne egpami‑pi te insaluub din.
48 “Piru ke egkakita te talagpanubad ne warad migdalapdap ka abungew diye te napulitan e, igpanengneng din ne kenad seeye ne malindit su naawe e ka abungew.
49 Ne eyew eg-isipen ne malinis ka baley, egkuwa ka talagpanubad te daruwa ne manuk-manuk, wey sabeka ne sugpang te sidar, wey malalab-lalab ne lubid, wey sugpang te isupu.
50 Ne eggimatayan din ka sabeka ne manuk-manuk ne egtayeen ka langesa te kuren ne due weyig.
51 Ne egbalakesen din te eggen-gen ka sabeka ne sugpang te sidar, wey ka malalab-lalab ne lubid, wey ka sugpang te isupu, wey iglagkes din ka sabeka ne manuk-manuk ne neuyag, wey ig-eled din ka langun diye te weyig ne due langesa te manuk-manuk ne inggimatayan. Ne egpapesikan din ka baley te kapapitu.
52 Iling due ka peglinis te baley ne iyan eggamiten ka langesa te manuk, ka weyig, ka neuyag ne manuk-manuk, wey ka kayu ne sidar, ka sugpang te isupu, wey ka malalab-lalab ne lubid.
53 Ne eglekaan ka neuyag ne manuk-manuk diye te lihawangan te siyudad. Iling due ka pegpalangesa rin te peglinis te baley ne in-abungew.”
54-56 Sika ka me tulumanen meyitenged te dalu te laplap iling te me kehang, buu wey ke busuwak naa, wey meyitenged te abungew ne diye te manggad, wey ke diye naa te me baley,
57 eyew egkanengnengan ke eg-isipen naan e ne malindit wey eg-isipen naan e ne malinis. Sika ka me tulumanen meyitenged te dalu ne egtubu te laplap wey te abungew.