16
Ka aldew te peglinis te sale
1 Te migpatey e ka daruwa ne anak ni Aarun tenged su migparani sikandan diye te tangkaan te Magbebaye ne Manama, migkahiyan e te Magbebaye si Muwisis,
2 “Kahii nu ka suled nu ne si Aarun ne kene egseled egtakuseng diye te Amana ne Matulus ne Sinabeng ne diye te limang te kurtina ne diye ka Tahuanan te Kasabutan. Ke egseled sikandin diye ne egpakakita te katelesan ku pinaahi te gapun diye te ampew te supe te Tahuanan te Kasabutan, egpatey sikandin.
3 Egpakaseled de sikandin diye te Amana ne Matulus ne Sinabeng ke eg-uyan sikandin te turu ne baka ne igpalangesa ne ig-awe te sale wey lukesan ne karniru ne igpanubad ne egtutungen.
4 “Keilangan ne egpamanihus sikandin wey igsaluub din ka egpekeiling te kumbale ne malayat se belad, malepet ne salual ne igbunbun te lebut, tabed, wey salakey.
5 “Egbuyuan din ka langun ne kabuhalan ni Israil te daruwa ne lukesan ne kambing ne igpalangesa ne ig-awe te sale wey lukesan ne karniru ne igpanubad ne egtutungen.
6 Ne keilangan ne igpanubad ni Aarun ka turu ne baka ne igpalangesa eyew ig-awe te sale din wey sale te pamilya rin.
7 Egkataman, eg-uyanen din ka daruwa ne kambing, wey igtahu din diye te tangkaan te Magbebaye ne Manama diye te gumawan te Balungbalung ne Temuwanan.
8 Ne egpintut-pintut sikandin eyew te pegnengneng ke hendei te daruwa ne kambing ka para te Magbebaye wey hendei ka para ki Asasil.
9 Ne ka kambing ne naalam ne para te Magbebaye, eg-uyanen ni Aarun diye te seled wey igpalangesa rin eyew ig-awe te sale.
10 Piru ka kambing ne para ki Asasil, igpanubad din diye te Magbebaye piru kene din seini eggimatayan. Ne eglekaan din seini diye te disirtu eyew iglinis te sale te me etew.
11 “Ne eg-uyanen ni Aarun ka igpanubad din ne igpalangesa ne ig-awe te sale wey egpalangesa sikandin para kandin mismu, wey te pamilya rin. Te egkeyimatayan din e ka turu ne baka ne igpalangesa eyew ig-awe te sale,
12 egkuen din ka tahuanan te insinsu wey eggipenuen din te baha ne egpuun te altar ne eg-unturan te egtutungen ne diye te tangkaan te Magbebaye. Ne egkuwa man‑e sikandin te daruwa ne kemkem te insinsu ne meemut ne impatamtamanan te eglupet, wey eg-uyanen din seini diye te Amana ne Matulus ne Sinabeng.
13 Ne igbukbuk din seini diye te baha ne diye te tangkaan te Magbebaye eyew egkabunbunan te ebel te insinsu ka supe te Tahuanan te Kasabutan eyew kene sikandin egpatey.
14 Ne egkuwa sikandin te langesa te baka wey ig-eled din te langesa ka kemel rin, wey egpabesikan din ka baad te supe ne diye nakatangke te igsile. Egpabesikan din degma te kapapitu ka ampew te supe.
15 “Eggilangen din degma ka kambing ne igpalangesa eyew ig-awe te sale te keet-etawan. Ne eg-uyanen din ka langesa te kambing diye te Amana ne Matulus ne Sinabeng wey egpabesikan din ka supe te Tahuanan te Kasabutan, iling te inggimu rin te langesa te turu ne baka.
16 Sika ka eggimuwen ni Aarun te pegpalangesa te peglinis te Amana ne Matulus ne Sinabeng tenged te kalindit te kabuhalan ni Israil wey te langun ne me sale dan, wey te pegsupak dan. Eggimuwen din degma seini diye te nalinditan ne duma ne baad te Balungbalung ne Temuwanan ne diye te taliware dan.
17 Keilangan ne ware etew diye te Balungbalung ne Temuwanan ke egseled si Aarun diye eyew eglinis te Amana ne Matulus ne Sinabeng taman te eglihawang sikandin. Ne emun ke egpakapalangese e sikandin eyew iglinis te sale dan te taltalaanak wey te langun ne kabuhalan ni Israil,
18 eglihawang e sikandin diye wey eggendiye sikandin te altar ne diye te lenged te gumawan te Balungbalung ne Temuwanan. Ne egkuwa sikandin te langesa te turu ne baka wey te kambing, wey egpulitan din kayi ka me sungey-sungey te altar.
19 Igpabesik ni Aarun te kemel rin te kapapitu ka duma ne langesa diye te altar, wey puun due, egkalinisan e seini wey egmatulus e puun te kalindit te me kabuhalan ni Israil.”
Ka kambing ne eglekaan
20 “Ke egkeimpusan e ni Aarun te egpalangesa ka Matulus ne Sinabeng wey ka Balungbalung ne Temuwanan, wey ka altar, eg-uyanen din e diye te Manama ka neuyag ne kambing ne para ki Asasil.
21 Igtel-eb din ka daruwa ne belad din te ulu te kambing wey igpangguhud din ka langun ne sale te kabuhalan ni Israil. Te seini ne paahi, egkaalin ka pegkamalindit dan, wey ka me seyyup dan diye te ulu te kambing. Ne egpalekaan e ni Aarun te me etew ne talagpaleke ka kambing diye te disirtu.
22 Ne egkeuyan e te kambing ka langun ne sale dan diye te diriyui ne inged, su eglekaan ma seini diye te disirtu.
23 “Ne egseled si Aarun te Balungbalung ne Temuwanan wey egluungen din ka insaluub din te migseled wey iggaat din de seini diye te Matulus ne Sinabeng.
24 Ne egpamanihus sikandin diye te Matulus ne Sinabeng, wey igsaluub din ka lerew ne kumbale din. Ne egkataman, eglihawang e sikandin wey egtutungen din e ka kandin ne igpanubad eyew iglinis te sale din, wey ka igpanubad degma te me etew eyew iglinis te sale dan.
25 Ne egtutungen din diye te altar ne tutunganan te igpanubad ka tabe te igpalangesa ne iglinis te sale.
26 Ne ka etew ne talagleke te kambing ne para ki Asasil, keilangan ne egpami‑pi te insaluub din, wey egpamanihus te kene pad sikandin egseled diye te kampu.
27 Keilangan ne eg-uyanen diye te lihawangan te kampu wey egtutungen ka nasame ne turu ne baka wey ka kambing ne in-angayan te langesa eyew iglinis te Matulus ne Sinabeng. Iglagkes te egtutung ka laplap, sapu, wey ka tei te me ayam.
28 Ne seeye se migtutung te same te me ayam, keilangan ne egpami‑pi pad te insaluub din wey egpamanihus pad human eglibed diye te kampu.”
Ka Aldew te Pegpasaylu te Sale
29 “Seini ka tulumanen ne eg-ikulen niyu te langun ne timpu: keilangan ne egpuasa kew te igkapitu ne bulan te igkasapulu ne aldew wey kene kew himu te minsan nekey, mahinged ma wey se lapu ne miglemung kaniyu.
30 Su sika ka aldew ne egpalangesaan kew eyew egmalinis kew diye te tangkaan te Magbebaye ne Manama.
31 Himeley kew wey peeneng-eneng kew te eggimuwen niyu te sika ne aldew wey puasa kew man‑e. Tulumanen seini ne kene egkataman.
32 Ne iyan egpalangesa kaniyu ka egkaalam ne talagpanubad ne eg-itisan te lana ne iyan igliwan te amey rin isip Labew ne Talagpanubad. Igsaluub din ka igsaluub te Labew ne Talagpanubad,
33 wey egpalangesaan din ka Amana ne Matulus ne Sinabeng wey ka balungbalung ne temuwanan, wey ka altar, wey iglagkes din te egpalangesa ka me talagpanubad wey ka langun ne keet-etawan eyew egmalinis.
34 Ne keilangan ne egtumanen niyu seini ne tulumanen ne pegpalangesa te langun ne sale te kabuhalan ni Israil te ware egtamanan wey himuwa niyu seini tagse leg‑un.” Ne intuman ni Muwisis ka insuhu te Magbebaye ne Manama kandin.