17
Ka inged ne eleg ne egpanubaran
1 Ne migkahiyan te Magbebaye ne Manama si Muwisis,
2 “Kahii nu si Aarun wey ka me anak din, wey ka langun ne kabuhalan ni Israil ne seini ka igsuhu ku kandan:
3 Minsan hentew kandan ne eggilang te baka wey ke nati naa te karniru wey ke kambing naa ne igpanubad, keilangan ne diye din seini eggimuwa te gumawan te Balungbalung ne Temuwanan eyew igdasag diye te Magbebaye ne Manama.
4 Ke diye din seini eggilanga te minsan hendei diye te kampu wey ke diye naa te lihawangan te kampu, nakasale sikandin iling te nakapatey. Ne puun due, egdeldelen e sikandin puun te me karumaan din.
5 Inggimu seini ne suhu eyew egkeengked ka pegpanubad te kabuhalan ni Israil te minsan hendei. Pegpehet-pehet man‑e seini ne ka igpanubad para te keupianan, igbehey diye te me talagpanubad ne diye te gumawan te Balungbalung ne Temuwanan ne iyan egpanubad diye te Magbebaye.
6 Ne egpatihisan te talagpanubad te langesa te igpanubad ka altar te Magbebaye ne diye dapit te gumawan te Balungbalung. Egtutungen sika wey meemut ka lansi due diye te Magbebaye.
7 Su kenad e egpanubad sikandan diye te me busew ne kambing ne insimba ran. Tulumanen seini ne ware egtamanan para kandan wey te egginguma pad ne kabuhalan dan.
8 “Sikan naa, kahii nu sikandan ne minsan hentew te kabuhalan ni Israil wey ke lapu naa ne miglemung kandan ne egpanubad te egtutungen
9 ne kene dan eg-uyanen diye te gumawan te Balungbalung ne Temuwanan eyew igpanubad te Magbebaye ne Manama, ka sika ne etew, egdeldelen e puun te me karumaan din.”
Ka balaud meyitenged te langesa
10 “Ne emun ke due kabuhalan ni Israil wey ke lapu naa ne miglemung kandan ne egkeen te due langesa, egbalaharen ku sikandin wey egdeldelen e sikandin te me kabuhalan din.
11 Su puun te langesa ka umul te langun ne eggeheyinawa. Ne ka langesa iya ka in-alam ku ne iglinis kaniyu diye te altar. Su ka langesa ne iyan egpuunan te umul, iyan egpakalinis te sale te me etew.
12 Seini ka egpuunan mania te inlalahan ku ka me kabuhalan ni Israil ne kene egkaayun ne egkeen te langesa ka minsan hentew kandan wey ke me lapu naa ne miglemung kandan.
13 “Ka minsan hentew ne kabuhalan ni Israil wey ke me lapu naa ne miglemung kaniyu ne egpanganup wey egpanitingen te egkaayun ne egkeenen, keilangan ne igpatihis din te tane ka langesa te egkeutel rin wey egbunbunan din.
14 Tenged su egpuun te langesa ka umul te langun ne eggeheyinawa, sikan naa, egbalabahan ku ka me kabuhalan ni Israil ne egkeen te langesa te minsan nekey ne mananap. Ka egkeen te langesa, egdeldelen e puun te me karumaan din.
15 “Ka minsan hentew te kabuhalan ni Israil wey ke me lapu naa ne mig-ugpe duma kaniyu ne egkeen te mananap ne napatey re due wey ke inggimatayan te lein ne mananap, keilangan ne egpami‑pi sikandin te insaluub din wey egpamanihus, piru eg-isipen ded sikandin ne malindit taman te egkasagkup.
16 Piru ke kene din egpi‑pian ka insaluub din wey kene egpamanihus, due egkaneem-neem din ne legpad.”