18
Ka kene ne eleg ne pegpeyilabetey
1 Ne migkahiyan te Magbebaye ne Manama si Muwisis,
2 “Kahii nu ka me kabuhalan ni Israil te seini: Sikeddiey ka Magbebaye niyu.
3 Kene kew ikul te me hinimuwan te me matig-Ihiptu ne mig-ugpaan niyu dengan, wey kene kew ikul te me hinimuwan te me matig-Kanaan ne eg-uyanan ku kaniyu. Kene kew ikul te me batasan dan.
4 Tumana niyu ka me suhu ku wey ikula niyu ka me balaud ku kaniyu. Sikeddiey ka Magbebaye ne Manama niyu.
5 Sikan naa, tumana niyu ka me suhu ku wey ikula niyu ka me balaud ku kaniyu, su ka egtuman due, egkeuyag. Sikeddiey ka Magbebaye.
6 “Kene kew hilabet te karumaan niyu pad iya. Sikeddiey ka Magbebaye.
7 Kene kew hilabet te iney niyu su egpakapeyilew sika te amey niyu. Iney niyu sikandin; kene niyu sikandin huliri.
8 Ne kene kew hilabet te duwey te amey niyu, su egpakapeyilew sika te amey niyu.
9 Kene kew hilabet te atebey niyu, minsan ke nekegtalaari kew re te amey wey ke iney naa, minsan ke diye miglesut sikandin te baley niyu wey se ware.
10 Ne kene kew hilabet te apu niyu ne malitan—apu niyu ma sikandin te anak niyu ne lukes wey se malitan—su egpekeyilew kaniyu sika.
11 Kene kew hilabet te anak te amey niyu te lein ne malitan su atebey niyu red sikandin.
12 Ne kene kew hilabet te aye niyu su atebey pad iya sikandin te amey niyu.
13 Kene kew hilabet te hari te iney niyu ne malitan, su karumaan pad iya sikandin te iney niyu.
14 Kene kew hilabet te asawa te anggam niyu su egpakapeyilew sika te anggam niyu, wey egkaaye niyu pad man‑e ka asawa rin.
15 Kene kew hilabet te ambey niyu su asawa ma sikandin te anak niyu. Keilangan ne kene niyu egguliran sikandin.
16 Ne kene kew hilabet te ipag niyu su egkeyilawan ka suled niyu.
17 Kene niyu peglakita te eggilabet ka anak wey ka iney. Kene kew man‑e hilabet te me apu din su amana rin pad iya sikandan wey mareet sika ne himu.
18 Kene kew duruwey te ipag niyu wey kene kew hilabet kandin su neuyag pad ka asawa niyu wey eyew kene egpekeg-ehet sikandan.
19 “Kene kew man‑e hilabet te eglangeseen ne malitan, su in-isip sikandin ne malindit.
20 Ne kene kew hilabet te asawa te senge-etew eyew kene kew eg-isipen ne malindit.
21 Kene niyu ipanubad ka me anak niyu diye te diyus-diyus ne si Muluk, su eyew kene egkabaley-baley ka ngaran te Manama niyu. Sikeddiey ka Magbebaye ne Manama.
22 Kene kew hilabet te iling niyu red ne lukes iling te peggulid niyu te malitan, su eg-isipen sika ne malindit.
23 Ne sikaniyu se me lukes, kene kew hilabet te mananap eyew kene kew eg-isipen ne malindit. Ne sikaniyu degma se me malitan, kene kew peyilabet te me mananap su eg-isipen iya sika ne malindit.
24 “Kene niyu linditi ka pegkeetew niyu te minsan hendei te seeye ne me himu, su sika ka nakalindit te me etew ne egdeldelen ku te in-ugpaan dan eyew egkasubalan niyu.
25 Tenged te nalinditan dan e ka intiru ne tane, imparusaan ku ka inged dan, purisu narelrel e sikandan.
26 Piru tumana niyu mule ka me suhu ku wey ka me balaud ku, sikaniyu se kabuhalan ni Israil wey ke me lapu naa. Ne kene niyu himuwa ka minsan hendei te seeye se eg-isipen ne malindit ne himu
27 su sika iya ka nakalindit te tane te me etew ne egsubalan niyu.
28 Su emun ke eg-iling kew red kandan, egdeldelen ku degma sikaniyu iling te pegdeldel ku kandan te nekewun‑a kaniyu.
29 Minsan hentew ne eggimu te seeye se eg-isipen ne malindit, egdeldelen e puun te me karumaan din.
30 “Purisu tanud-tanud kew ne egkatuman niyu ka igpeyimu ku kaniyu, wey kene niyu ilingi ka mallindit ne hinimuwan te me etew ne nekewun‑a kaniyu. Kene kew en iya bul‑ug himu te iling due su egpakamalindit sika kaniyu. Sikeddiey ka Magbebaye ne Manama niyu.”