4
Ka me halad ne iglinis te sale
1 Ne ingkahiyan te Magbebaye ne Manama si Muwisis,
2 “Kahii nu ka me kabuhalan ni Israil ne emun ke due etew ne nakasale te minsan nekey te me suhu te Magbebaye ne ware tuyui, seini ka eggimuwen dan:
3 “Emun ke iyan egpakasale ka Labew ne Talagpanubad ne egpakalagkes ka me kabuhalan ni Israil, keilangan ne eg-uyan sikandin diye te Magbebaye te turu ne nati te baka ne ware nabalbalangi eyew igpanubad ne iglinis te sale din.
4 Ne diye din seini eg-uyana te gumawan te Balungbalung ne Temuwanan wey igdagket din ka palad din te ulu te turu ne nati te baka, wey eggilangen din seini diye te tangkaan te Magbebaye.
5 Egkataman, egkuwa ka Labew ne Talagpanubad te langesa te turu ne baka wey eg-uyanen din seini diye te seled te Balungbalung ne Temuwanan.
6 Ne ig-eled din te langesa ka kemel rin wey igpabesik din seini te kapapitu diye te tangkaan te kurtina ne indingding te Amana ne Matulus ne Sinabeng ne diye ka Magbebaye.
7 Ne egpulitan din degma te langesa ka me sungey-sungey te altar ne tutunganan te insinsu ne diye te tangkaan te Magbebaye ne diye te seled te Balungbalung ne Temuwanan. Ne ka egkasame ne langesa, ig-itis din diye te pabunsuranan te altar ne eg-unturan te egtutungen ne diye te gumawan te Balungbalung.
8 Ne egkataman, eg-aween e te talagpanubad ka langun ne tabe te turu ne baka ne igpalangesa ne ig-awe te sale—ka langun ne tabe ne diye te getek,
9 ka me iihian wey ka nandeket ne me tabe kayi, wey ka atey ne indeketan te tabe.
10 (Ne iling ded degma due ka eggimuwen diye te ayam ne igpanubad para te keupianan.) Ne egtutungen seini te talagpanubad diye te altar ne eg-unturan te egtutungen.
11 Piru ka nasame iling te laplap, ka langun ne sapu, ka ulu, ka me paa, ka me tahu te getek, wey ka tei,
12 eg-uyanen din seini diye te lihawangan te kampu, diye te dapit ne in-isip ne malinis ne tambuanan te abu wey diye din seini egtutunga.
13 “Emun ke iyan nakasale ka langun ne kabuhalan ni Israil te minsan nekey ne me suhu te Magbebaye ne Manama ne ware dan tuyui, nakasale ded sikandan minsan ka se kasuluhan kandan ware nakanengneng te seini ne sale.
14 Ke nanengnengan dan e ne nakasale bes sikandan, keilangan ne eg-uyan sikandan te turu ne nati te baka eyew igpalangesa ne ig-awe te sale dan diye te tangkaan te Balungbalung ne Temuwanan.
15 Egkataman, igtel-eb te me igbuyag te langun ne kabuhalan ni Israil ka me belad dan diye te ulu te baka wey eggilangen dan seini diye te tangkaan te Magbebaye.
16 Ne egkuwa ka Labew ne Talagpanubad te langesa te turu ne nati te baka wey eg-uyanen din seini diye te Balungbalung ne Temuwanan.
17 Ig-eled din te langesa ka kemel rin wey igpabesik din seini te kapapitu diye te tangkaan te kurtina ne indingding te Amana ne Matulus ne Sinabeng ne diye ka Magbebaye.
18 Ne egpulitan din degma te langesa ka me sungey-sungey te altar ne tutunganan te insinsu ne diye te tangkaan te Magbebaye ne diye te seled te Balungbalung ne Temuwanan. Ne ka egkasame ne langesa, ig-itis din diye te pabunsuranan te altar ne eg-unturan te egtutungen ne diye te lenged te gumawan te Balungbalung ne Temuwanan.
19 Egkataman, egkuen din ka langun ne tabe te turu ne nati te baka, wey egtutungen din seini diye te altar ne eg-unturan te egtutungen.
20 Ka inggimu rin te turu ne baka ne impalangesa ne ig-awe te sale, iling ded degma ka eggimuwen din te seini ne turu ne baka. Iling due ka eggimuwen te talagpanubad te pegpalangesa eyew iglinis te sale te kabuhalan ni Israil wey egpasayluwen sikandan te Magbebaye.
21 Egkataman, eg-uyanen din seini diye te lihawangan te kampu wey egtutungen din seini iling te pegtutung din te seeye se impanubad te sale din. Sika ka peglinis te sale te langun ne kabuhalan ni Israil.
22 “Ke iyan nakasale ka pangulu te minsan nekey ne me suhu te Magbebaye ne ware tuyui, nakasale ded degma sikandin,
23 ke nakamaan-maan e ne nakasale bes sikandin. Keilangan ne eg-uyan sikandin te igpanubad din ne lukesan ne kambing ne ware nabalbalangi.
24 Igdagket din ka palad din te ulu te lukesan ne kambing wey eggilangen din seini diye te gilanganan te egtutungen ne igpanubad ne diye te tangkaan te Magbebaye, eyew ig-awe te sale din.
25 Ne ig-eled te talagpanubad ka kemel rin diye te langesa te igpanubad te peg-awe te sale wey egpulitan din ka me sungey-sungey te altar ne eg-unturan te egtutungen. Ne ka nasame ne langesa ig-itis din diye te pabunsuranan te altar ne eg-unturan te egtutungen.
26 Ne egtutungen din ka langun ne tabe te ayam diye te altar iling te pegtutung din te tabe te igpanubad para te keupianan. Iling due ka eggimuwen te talagpanubad te pegpalangesa eyew iglinis te sale te pangulu wey egpasayluwen sikandin te Magbebaye.
27 “Emun ke iyan nakasale ka lerew ne etew te minsan nekey ne me suhu te Magbebaye ne ware din tuyui, nakasale ded sikandin.
28 Ke nakamaan-maan e ne nakasale bes sikandin, keilangan ne eg-uyan sikandin te igpanubad din ne beyan ne kambing ne ware nabalbalangi.
29 Igdagket din ka palad din te ulu te beyan ne kambing wey eggilangen din seini diye te gilanganan te egtutungen ne igpanubad.
30 Ne ig-eled te talagpanubad ka kemel rin diye te langesa wey egpulitan din ka me sungey-sungey te altar ne eg-unturan te egtutungen. Ne ka nasame ne langesa, ig-itis din diye te pabunsuranan te altar ne eg-unturan te egtutungen.
31 Eg-aween din ka langun ne tabe te beyan ne kambing iling te peg-awe te tabe te seeye se igpanubad para te keupianan, wey egtutungen din sika diye te altar ne eg-unturan te egtutungen wey ka lansi due igkeemuti te Magbebaye. Iling due ka eggimuwen te talagpanubad te pegpalangesa eyew iglinis te sale te etew wey egpasayluwen sikandin te Magbebaye.
32 “Piru ke iyan din igpanubad ka nati te karniru eyew igpalangesa ne ig-awe te sale din, iyan din eg-uyanen ka beyan ne ware nabalbalangi.
33 Igdagket din ka palad din te ulu te nati te karniru, wey eggilangen din seini diye te gilanganan te egtutungen ne igpanubad.
34 Ne ig-eled te talagpanubad ka kemel rin te langesa te karniru, wey egpulitan din ka me sungey-sungey te altar ne eg-unturan te egtutungen. Ne ka nasame ne langesa, ig-itis din diye te pabunsuranan te altar ne eg-unturan te egtutungen.
35 Eg-aween din ka langun ne tabe te nati te karniru iling te peg-awe te tabe te seeye se igpanubad para te keupianan, wey egtutungen sika te talagpanubad diye te altar duma te egtutungen ne igmanubad para te Magbebaye ne Manama. Iling due ka eggimuwen te talagpanubad te pegpalangesa eyew iglinis te sale wey egpasayluwen sikandin te Magbebaye.”