5
Ka igpanubad eyew ig-awe te sale
1 “Ke due etew ne kene egpamalehet diye te hukumanan ke nekey ka nakita rin, wey ke nanengnengan din naa, nakasale sikandin wey due egkaneem-neem din ne legpad.
2 “Ke due etew ne nakasamsam te minsan nekey ne in-isip ne malindit, iling te ayam ne napatey, nakasale sikandin wey eg-isipen sikandin ne malindit minsan ke ware sikandin nakamaan-maan ne nakasamsam bes sikandin.
3 “Ke nakasamsam sikandin te egpakamalindit te etew ne ware sikandin nakataha ne egmalindit bes sikandin, egpakasale e sikandin ke egpakamaan-maan e sikandin.
4 “Ke due etew ne mahaan egsaad wey kene egsuman-suman ke meupiya wey ke mareet naa ka igsaad din ne iyan egpuunan ne eg-isipen sikandin ne malindit—egpakasale sikandin ke egpakamaan-maan e sikandin ne naseyyup sikandin.
5 “Ke due etew ne egpakasale te minsan hendei te sika ne me sale, keilangan ne igpangguhud din sika.
6 Ne keilangan ne egpanubad sikandin diye te Magbebaye ne Manama te beyan ne nati te karniru wey ke kambing naa eyew igbayad te sale din. Ne igpanubad seini te talagpanubad eyew igpalangesa ne ig-awe te sale din.
7 “Piru ke ware nati te karniru ne igpakabehey rin, egkaayun ne iyan din naan de igpanubad ka daruwa ne tukmu wey ke daruwa naa ne selepati eyew igbayad te sale din: Ka sabeka igpalangesa ne ig-awe te sale wey ka sabeka igpanubad ne egtutungen.
8 Eg-uyanen din seini diye te talagpanubad wey iyan din iggun‑a igpalangesa ka ig-awe te sale. Eggulibiren de te talagpanubad ka lieg te igpanubad piru kene din egpeteen.
9 Ne igpatihis din ka duma ne langesa te impanubad diye kakiliran te altar ne eg-unturan te egtutungen, wey ka nasame ne langesa, ig-itis din ig-amin diye te pabunsuranan te seeye ne altar. Igpalangesa seini eyew ig-awe te sale.
10 Egkataman, igpanubad te talagpanubad ka ikarangeb ne manuk-manuk ne egtutungen, sumale te me tulumanen te pegpanubad te sika ne igpanubad. Iling due ka eggimuwen te talagpanubad te pegpalangesa eyew iglinis te sale wey egkapasaylu e ka sale din.
11 “Piru ke ware pad iya man‑e tukmu wey ke daruwa naa ne selepati ne igpakabehey rin, egkaayun ne iyan din naan de ighalad ka senge-kilu ne harina ne amana ne meupiya. Keilangan ne kene din egsewuhan te mentika wey ke meemut naa ne insinsu, su halad seini te peglinis te sale.
12 Eg-uyanen din ka harina ne amana ne meupiya diye te talagpanubad wey eggamak ka talagpanubad dutu eyew te pegpapitew ne ka langun nakapanubad e te Magbebaye ne Manama, wey egtutungen din ka inggamak din duma te me halad diye te altar ne eg-unturan te egtutungen ne para te Manama. Halad seini ne ig-awe te sale.
13 Iling due ka eggimuwen te talagpanubad te pegpalangesa eyew iglinis te minsan nekey ne sale te etew. Ne ka same, kandin e te talagpanubad iling te egkakeen ne ighalad.”
Ka ig-awe te sale
14 Ne ingkahiyan te Magbebaye ne Manama si Muwisis,
15 “Ke due etew ne nakasupak te Magbebaye tenged su ware sikandin nakabehey te ighalad diye te Magbebaye, keilangan ne egpanubad sikandin te lukesan ne karniru ne ware nabalbalangi eyew igbayad te sale din. Ne keilangan ne ka kentiddad te karniru igpeiling te kentiddad te pelata ne intimbang diye te timbangan te me talagpanubad. Sika ka igpanubad eyew igbayad te sale.
16 Ne keilangan ne egbayaran din pad man‑e ka ware din ikabehey diye te Magbebaye, wey egtimulan din pad seini te daruwa ne pulu (20) ne pursintu. Ne igbehey rin seini te talagpanubad ne iyan egpalangesa te sabeka ne lukesan ne karniru eyew te peglinis te sale din wey egkapasaylu e sikandin.
17 “Ke due etew ne nakasupak te Magbebaye, minsan ke ware din nataheyi, nakasale sikandin wey due egkaneem-neem din ne legpad.
18 Keilangan ne eg-uyan sikandin diye te talagpanubad te lukesan ne karniru ne ware nabalbalangi eyew igpanubad te talagpanubad te peg-awe te sale. Ne keilangan ne ka kentiddad te karniru, igpeiling te kentiddad te pelata ne intimbang diye te timbangan te me talagpanubad. Iling due ka eggimuwen te talagpanubad te pegpalangesa eyew iglinis te sale te etew ne ware tuyui wey egkapasaylu e sikandin te sale din.
19 Sika ka igpanubad ne ig-awe te sale, su nakasale ma sikandin diye te Magbebaye ne Manama.”