7
Ka igpanubad ne igbayad te sale
1 “Seini ka me tulumanen meyitenged te igpanubad eyew igbayad te sale. Amana ne matulus seini ne igpanubad:
2 Ka igpanubad eyew igbayad te sale, diye eggilanga te gilanganan te egtutungen ne igpanubad. Ka langesa te sika ne igpanubad, iglingut igsawig diye te me kakiliran te altar ne eg-unturan te egtutungen.
3 Ne igpanubad ka langun ne tabe te ayam: ka malambu ne ikug, ka me tabe ne diye te getek,
4 ka me iihian wey ka nandeket ne me tabe kayi, wey ka atey ne indeketan te tabe. Sika ka egpangaween duma te iihian.
5 Egtutungen sika te talagpanubad diye te altar eyew igpanubad diye te Magbebaye ne Manama. Igpanubad sika eyew igbayad te sale.
6 Ka langun ne lukes ne kabuhalan te me talagpanubad, egpakakeen te nasame te impanubad. Ne keilangan ne diye dan de egkeena sika te matulus ne inged su amana sika ne matulus.
7 “Nekeg-iling de ka tulumanen te igpalangesa eyew ig-awe te sale wey te igpanubad eyew igbayad te sale; ka ngalap te impanubad, kandin e te talagpanubad ne iyan migpalangesa.
8 Ka laplap te ayam ne impanubad te minsan hentew eyew igpanubad ne egtutungen, kandin e te talagpanubad ne iyan migpanubad te ayam.
9 Ka langun ne halad ne egkakeen ne egpuun te egketuen ne me pinamula ne inggilutu diye te hilutuanan te paan, minsan ka inggilutu diye te kale, wey ke diye naa te kuren, kandin e te migpanubad.
10 Piru ka langun ne halad ne egpuun te egketuen ne me pinamula ne ware hilutua ne insewuhan te mentika wey ke ware naa sewuhi, kandin e te me talagpanubad ne kabuhalan ni Aarun wey eg-ay-ayaran dan seini egba-baara.”
Ka igpanubad para te keupianan
11 “Seini ka me tulumanen meyitenged te igpanubad para te keupianan ne ighalad diye te Magbebaye ne Manama.
12 Ke egpanubad sikandin te mananap para te keupianan eyew te pegpasalamat, keilangan ne egpatapikan din te nakalkalasi ne paan ne ware patulin—makepal ne paan ne insewuhan te mentika, manipis ne paan ne inlakulasan te mentika, wey paan ne inggimu puun te harina ne amana ne meupiya ne insewuhan ded te mentika.
13 Egpanguyanen din seini duma te igpanubad para te keupianan wey egtimulan din pad seini te paan ne due patulin eyew te pegpasalamat din.
14 Ne egkuwa sikandin te tigsalimbeka puun te nalein-lein ne paan ne ighalad eyew igdasag te Magbebaye ne Manama. Ne iyan egpakakamuney due ka talagpanubad ne migsawig te langesa te igpanubad para te keupianan.
15 Ne ka ngalap te impanubad din eyew te pegpasalamat, keilangan ne egkeenen de te sika ne aldew, ware egsameen minsan deisek de taman te egkapawe.
16 Piru ke iyan din igpanubad ka para te keupianan eyew te pegtuman te saad wey ke pegpanubad naa ne egpuun te pusung, sikan de iya ne aldew egkeena ka ngalap due. Piru ke duen pad egkasame te egkapawe, egkaayun ded ne egkeenen.
17 Ne emun ke duen pad iya man‑e egkasame te igkarangeb ne aldew, keilangan ne egtutungen e seini.
18 Ne emun ke due etew ne egkeen te ngalap te igkatatelu e ne aldew, kene egdawaten te Magbebaye ne Manama ka etew ne migpanubad wey egkeyimu ne ware karuan te pegpanubad din. Eg-isipen seini ne malindit wey ke due egkeen kayi egpakaneem-neem sikandin te legpad.
19 Ne emun ke egpakaragket ka ngalap te minsan nekey ne in-isip ne mallindit, kenad e sika egkeenen, su egtutungen e. Ne iyan de egpakakeen te impanubad seeye se malinis.
20 Piru ka etew ne in-isip ne malindit pad ne egkeen te ngalap te igpanubad para te keupianan, keilangan ne egdeldelen e sikandin puun te me karumaan din.
21 Ne emun ke due etew ne egpakahen-gen te in-isip ne mallindit—ka minsan nekey ne egpakamalindit te etew, ka mananap wey ka langun ne in-isip ne mallindit, ke egkeen sikandin te ngalap te igpanubad para te keupianan, ka sika ne etew, egdeldelen e puun te me karumaan din.”
Ka tulumanen meyitenged te tabe wey te langesa
22 Ne ingkahiyan e man‑e te Magbebaye ne Manama si Muwisis,
23 “Kahii nu ka me kabuhalan ni Israil ne kene sikandan egkaayun ne egkeen te tabe te baka, te karniru wey ke kambing naa.
24 Ne ka tabe te mananap ne napatey re due wey ke inggimatayan naa te mahintalunan, egkaayun ne eggamiten niyu seini piru kene niyu keena.
25 Su ka egkeen te tabe te ayam ne igpanubad diye te Magbebaye ne Manama eyew egtutungen, egdeldelen e sikandin puun te me karumaan din.
26 Ne kene ne sikan de, minsan ke hendei kew egpekeugpe, kene kew iya egkaayun ne egkeen te langesa te manuk-manuk wey te ayam.
27 Ka egkeen te langesa, keilangan ne egdeldelen e puun te me karumaan din.”
Ka igteil ne baad te talagpanubad
28 Ne migkahiyan e man‑e te Magbebaye ne Manama si Muwisis,
29 “Kahii nu ka me kabuhalan ni Israil te minsan hentew ne eg-uyan te igpanubad para te keupianan, keilangan ne egteil te baad te Magbebaye ne igbehey diye te talagpanubad.
30 Ne sikandin de ka eg-uyan te seeye se igdasag diye te Magbebaye. Eg-uyanen din degma ka tabe duma te kumeng. Ne ighalad ne egkayawen ka kumeng diye te tangkaan te Magbebaye.
31 Egtutungen te talagpanubad diye te altar ka tabe piru ka kumeng, igbehey diye ki Aarun wey te me karumaan din ne talagpanubad.
32 Ne ka kawanan ne bubun te igpanubad ne ayam, igbehey diye te talagpanubad su sika iya ka baad din te igpanubad para te keupianan.
33 Ne ka talagpanubad ne migpanubad te langesa wey te tabe te igpanubad para te keupianan, iyan egbehayan te igkakawanan ne bubun te ayam su sika iya ka baad din.
34 Su ka kumeng ne indasag wey bubun te igpanubad para te keupianan, igbehey e ki Aarun wey te me anak din su sika iya ka baad dan te ware egtamanan puun te igmanubad te me kabuhalan ni Israil.
35 Sika ka baad ni Aarun wey te me anak din puun te igmanubad ne egtutungen para te Magbebaye. Egkarawat dan sika ne baad puun te aldew ne immatulus sikandan eyew egpamakey te Magbebaye isip me talagpanubad.
36 Igpabehey sika kandan te Magbebaye te me kabuhalan ni Israil te timpu ne egkeitisan e sikandan ni Muwisis te lana. Sika ka baad dan wey te me kabuhalan dan keureme.”
37 Seeye ka me tulumanen te igpanubad ne egtutungen, te egkakeen ne ighalad, te igpanubad te peg-awe te sale, te igpanubad eyew igbayad te sale, te igpanubad te peg-urdina te me talagpanubad, wey te igpanubad para te keupianan.
38 Seeye ne me tulumanen insuhu te Magbebaye ne Manama ki Muwisis diye te Bubungan ne Sinay te timpu ne insuhu te Manama ka langun ne kabuhalan ni Israil ne eg-uyan te ighalad wey igpanubad diye te kandin.